ဤမှုခင်းဖော်ပြသည့်မှတ်တမ်းလွှာသည် ၂၀၂၅ ခုနှစ်၊ စက်တင်ဘာလအတွင်း မူတြော် (ဖာပွန်) ခရိုင်၊ ဘူးသိုမြို့နယ်တွင် ဖြစ်ပွားခဲ့သော လိင်ပိုင်းဆိုင်ရာအကြမ်းဖက်မှုဖြစ်စဉ်အကြောင်းကို ဖော်ပြထားသည်။ ၂၀၂၅ ခုနှစ်၊ စက်တင်ဘာလ ၂၀ ရက်နေ့တွင် ဒွယ်လိုးမြို့နယ်၊ ဇဘ---ကျေးရွာအုပ်စု၊ ဇအ---ကျေးရွာမှ အသက် (၂၇)နှစ်အရွယ် အမျိုးသားတစ်ဦးဖြစ်သူ စောတ---သည် ဘက---ကျေးရွာအုပ်စု၊ ပဇ---ကျေးရွာမှ အသက်(၁၇)နှစ်အရွယ်မိန်းကလေး တစ်ဦးဖြစ်သူ နော်ရ--- အား အကြိမ်ကြိမ်အဓမ္မပြုကျင့်ခဲ့သည်။ နော်ရ---သည် ကယ---ကျေးရွာအုပ်စု၊ ရက---ကျေးရွာရှိ ရက---စာသင်ကျောင်းတွင် ပညာဆည်းပူးနေသောကျောင်းသူတစ်ဦးဖြစ်သည်။ ကျောင်းပိတ်ရက်တွင် နော်ရ---သည် ပဇ---ကျေးရွာရှိ သူမ၏တဝမ်းကွဲဆီသို့ အလည်ပြန်လာခဲ့သည်။ ပြန်လာသည့်လမ်းတွင် စောတ---နှင့်ဆုံတွေ့ခဲ့သည်။ စောတ---သည် နော်ရ---၏ တဝမ်းကွဲဖြစ်သူက သူမအား လာကြိုခိုင်းစေသည်ဖြစ်၍ သူမကိုဆိုင်ကယ်ဖြင့်တင်ကာ လိမ်လည်ခေါ်ဆောင်သွားခဲ့သည်။ လမ်းတစ်လျှောက်တွင် စောတ---သည် ဆိုင်ကယ်ကိုရပ်လိုက်ပြီး နော်ရ---အား ဆွဲညစ်ကာထိုး၍ သူမ၏အသက်ကို ခြိမ်းခြောက်ပြောဆိုခဲ့သည်။ ထို့နောက် သူသည် သူမအားအကြိမ်ကြိမ် အဓမ္မပြု ကျင့်ပြီးမှသာ သူမအားပြန်လွှတ်၍ လမ်းဘေးတွင်ထားရစ်ခဲ့သည်။ နော်ရ---သည် သူမ၏တဝမ်းကွဲအိမ်သို့ရောက်ရှိပြီး နောက်တွင် တဝမ်းကွဲဖြစ်သူအား သူမကြုံတွေ့ရသည့်အဖြစ်အပျက်ကို ပြောပြခဲ့သည်။ ထို့နောက် သူမ၏တဝမ်းကွဲ သည် ဤဖြစ်စဉ်ကို ဒေသခံအာဏာပိုင်များအား တင်ပြခဲ့သည်။ ကရင်အမျိုးသားရဲတပ်ဖွဲ့ (KNPF) သည် ဤအမှုကိုစုံစမ်းစစ်ဆေးပြီးနောက် အမှုကို ကရင်အမျိုးသမီးအစည်းအရုံး (KWO) အား လွှဲပြောင်းပေးခဲ့သည်။ နော်ရ---အနေဖြင့် ဆေးကုသမှုရရှိရန်အတွက် သူမအား ဘက---ကျေးရွာအုပ်စု၊ စတ---ကျေးရွာတွင်တည်ရှိသည့် စတ---ဆေးခန်းသို့ပို့ဆောင်ပေးခဲ့သည်။ KWO အပါအဝင် ဒေသခံအာဏာပိုင်များက သူမအားကြည့်ရှုစောင့်ရှောက်ခဲ့သည်။ မူတြော်ခရိုင်တရားရုံးမှ ပြစ်မှုကျူးလွန်သူတရားခံအားအရေးယူ၍ ထောင်ဒဏ် (၁၃)နှစ်ကျစေ၍ လျော်ကြေးငွေ (၁၀၀၀၀၀) ဘတ်ပေးဆောင်ရန် ပြစ်ဒဏ်ချမှတ်ခဲ့သည်။ သို့သော်လည်း အစီရင်ခံစာရေးသားနေစဉ်ကာလအတွင်း နစ်နာသူဖြစ်သည့်နော်ရ---သည် မည်သည့်လျော်ကြေးငွေမှမရရှိခဲ့ပါ။ ထို့အပြင် တရားခံသည် တရားရုံးအား ပြစ်ဒဏ်လျှော့ပေါ့ပေးရန်အယူခံဝင်ပြီးနောက် တရားရုံးမှ ၎င်းအား ထောင်ဒဏ် (၁၂)နှစ်ကျစေရန် ပြစ်ဒဏ်ကို ပြန်လည်ချမှတ်ခဲ့သည်။ ယခုအချိန်တွင် တရားခံကို ခရိုင်အချုပ်ထောင်ထဲ တွင် ထိန်းသိမ်းထားပါသည်။