တၢ်ကဲထီၣ်သးတၢ်ပာ်ဖျါတဘ့ၣ်အံၤပာ်ဖျါထီၣ်ဝဲတၢ်ကဲထီၣ်သးဖဲကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ်ဖဲလါမ့ၤ ၂၀၂၅ နံၣ်န့ၣ် လီၤ. ဖဲလါမ့ၤ ၂၅ သီ, ၂၀၂၅ နံၣ်အနံၤန့ၣ်, ထံကီၢ်တၢ်ပၢတၢ်ပြးကီၣ်ကးကရၢ (SAC) ဟဲခးလီၤတၢ်လၢကဘီယူၤဖဲအဘ---သဝီ, သ့ၣ်ဘီဘိကရူၢ်, ကီးတရံးကီၢ်ဆၣ်အပူၤဘၣ်ဆၣ်တၢ်ဘၣ်ဒိဘၣ်ထံးတအိၣ်ဘၣ်န့ၣ်လီၤ. ဖဲတၢ်တနံၤန့ၣ်ကဘီယူၤခးလီၤ တၢ်ဝံၤအ လီၢ်ခံ SAC သုးဖိခးလီၤဝဲကျိဖးဒိၣ်လၢတၢ်တသ့ၣ်ညါအနီၣ်ဂံၢ်နီၣ်ဒွးဘၣ်ဆူသဝီပူၤဒီးဘၣ်ဒိဝဲပှၤဒီပုၢ်ဝဲ (၂) ဂၤန့ၣ်လီၤ. ဒ်န့ၣ်အသိး, ဖဲလါမ့ၤ ၂၉ သီ, ၂၀၂၅ နံၣ်အနံၤန့ၣ် SAC ကဘီယူၤဒုးသုးတဘ့ၣ်ဟဲတ့ၢ်လီၤမ့ၣ်ပိၢ်ဖဲအဘ---သဝီတီၤဖုၣ်ကၠိမဲာ်ညါ ကအိၣ်လၢ (၄) ဖျၢၣ်မ့တမ့ၢ် (၅) ဖျၢၣ်ညါဒီးဘၣ်ဒိဝဲကၠိဒီးဟံၣ်ဒွဲန့ၣ်လီၤ. တနံၤဃီအတီၢ်ပူၤ, SAC ကဘီယူၤဒုးသုးတဘ့ၣ် ဟဲတ့ၢ်လီၤဝဲမ့ၣ် ပိၢ် (၁၁) ဖျၢၣ်လၢအအ---သဝီပူၤန့ၣ်လီၤ. လၢသဝီပူၤအံၤတၢ်ဒုးတၢ်ယၤဒီးသုးဖိသ့ၣ်တဖၣ်တအိၣ်ဘၣ်န့ၣ်လီၤ. လၢတၢ်တ့ၢ်လီၤ ဝဲမ့ၣ်ပိၢ်တဘျီအံၤသဝီဖိဘၣ်ဒိအိၣ်ဝဲ (၄) ဂၤပၣ်ဃုာ်ဒီးကၠိဖိ (၃) ဂၤလၢအသးနံၣ်တပှဲၤဒံးဘၣ်န့ၣ်လီၤ. ကၠိဖိအကျါတဂၤ လၢအဘၣ်ဒိနးဒီးဘၣ်ဒိဝဲဖဲအကံၣ်ဒုၣ်တဂၤဘၣ်တၢ်ဆှၢအီၤဆူကၠီၣ်တဲၣ်တၢ်ဆါဟံၣ်ဒီးမ့မ့ၢ်အဝဲ (၂) ဂၤန့ၣ် ဘၣ်တၢ်ကူစါယါဘျါအီၤဖဲတၢ်ဟ့ၣ်ကသံၣ်ဒၢးတဖျၢၣ် လၢအဘၣ်တၢ်တီခိၣ်ရိၣ်မဲအီၤလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) န့ၣ်လီၤ. မ့ၣ်ပိၢ်အက့သ့ၣ်တဖၣ်ဘၣ်ဒိစ့ၢ်ကီးဝဲတၢ်သူၣ်ထီၣ်လၢအအိၣ်ဖဲသဝီပူၤပၣ်ဃုာ်ဒီးကၠိတဖျၢၣ်, သီခါဖၠၣ်တ ဖျၢၣ်ဒီးသဝီဖိအဟံၣ်သ့ၣ်တဖၣ်န့ၣ်လီၤ. မ့ၢ်လၢတၢ်ခးလီၤတၢ်လၢကဘီယူၤဒီးကျိဖးဒိၣ်အဃိ, သဝီဖိအါအါဂီၢ်ဂီၢ်ဘၣ်ဃ့ၢ်အိၣ် ကမှံဝဲလၢပှၢ်ပူၤ, လၢတၢ်ဖံးအီၣ်မၤအီၣ်အလီၢ်ဒီးလၢဒူသဝီအဂၤသ့ၣ်တဖၣ်န့ၣ်လီၤ. ပှၤလၢဃ့ၢ်အိၣ်ကမှံသ့ၣ်တဖၣ်ထံၣ်ဘၣ်ဝဲ တၢ်ကီတၢ်ခဲသ့ၣ်တဖၣ်အါမးခီဖျိအဝဲသ့ၣ်စိာ်ဃုာ်ဝဲတၢ်ဖိတၢ်လံၤလၢအဟံၣ်ပူၤတန့ၢ်အါအါဘၣ်ဒီးဒိးန့ၢ်တၢ်ဆီၣ်ထွဲမၤစၢၤထဲတ ဆံးတက့ၢ်န့ၣ်လီၤ. အါန့ၢ်အန့ၣ်ကၠိသ့ၣ်တဖၣ်ဘၣ်ပတုာ်ကွံာ်အသးခီဖျိတၢ်ဘံၣ်တၢ်ဘၢတဂ့ၤဘၣ်ဒီးကၠိဖိသ့ၣ်တဖၣ်ဘၣ်ဖံးလိ မၤဒိးတၢ်ဖဲပှၢ်ပူၤန့ၣ်လီၤ. ဒူသဝီဖိသ့ၣ်တဖၣ်ဘၣ်ကွၢ်ဆၢၣ်မဲာ်စ့ၢ်ကီးတၢ်အိၣ်ဆူၣ်အိၣ်ချ့အတၢ်ဂ့ၢ်ကီသ့ၣ်တဖၣ်ခီဖျိလၢသဝီ ပူၤတၢ်ဟ့ၣ်ကသံၣ်ဒၢးဒီးတၢ်ဆါဟံၣ်တအိၣ်ဘၣ်, ကသံၣ်ကသီတလၢပှဲၤဘၣ်ဒီးဖဲပှၤတဂၤဂၤမ့ၢ်လိၣ်ဘၣ်တၢ်ကူစါယါဘျါလၢ အဆိအချ့န့ၣ်တညီစ့ၢ်ကီးဝဲလၢတၢ်ကဆဲးကျၢဆူၣ်ချ့ပှၤမၤတၢ်ဖိဘၣ်န့ၣ်လီၤ.

တၢ်ကဲထီၣ်သးတၢ်ပာ်ဖျါတဘ့ၣ်အံၤ ပာ်ဖျါထီၣ်ဝဲတၢ်ကဲထီၣ်သးဖဲ တၢ်ကြဲၢ်ကီၢ်ဆၣ်, ဖၣ်အၣ်ကီၢ်ရ့ၣ်အပူၤ ဖဲလါစဲးပထ့ဘၢၣ် ၂၀၂၅ နံၣ်န့ၣ်လီၤ. ဖဲလါစဲးပထ့ဘၢၣ် ၃ သီ, ၂၀၂၅ နံၣ်န့ၣ်, ပယီၤသုးပျၢ်ထီၣ်ဝဲအကၤမံၤကၤစ့ၤဒြိတဘ့ၣ်ဒီး လီၤတဲာ်ပိၢ်ဖးထီၣ်ဝဲ လၢတီၤခၢၣ်သးကၠိတဖျၢၣ်အဖီခိၣ် လၢအအိၣ်ဖဲ ကက--- သဝီ, ပံၢ်တခးကရူၢ်, တၢ်ကြဲၢ်ကီၢ်ဆၣ်, ဒီးဘၣ်ဒိဝဲကၠိသရၣ်,သရၣ်မုၣ် (၂) ဂၤ, ကၠိဖိ ၁၅ နံၣ်တဂၤ, ဒီးဘၣ်ဟးဂီၤဝဲကၠိအရူတဖျၢၣ်န့ၣ်လီၤ. ပှၤတူၢ်ဘၣ်တၢ်သ့ၣ်တဖၣ်အံၤ ဒိးကူစါယါဘျါဝဲအသး ဖဲ တၢ်ဆါဟံၣ်တဖျၢၣ်လၢအအိၣ်ဖဲ ပံၢ်တခးကရူၢ်ပူၤန့ၣ်လီၤ. ဖဲတၢ်ကဲထီၣ်သးဝံၤအလီၢ်ခံ, သဝီဖိတဖၣ် ပျံၤတၢ်ဖုးတၢ်အဃိ တၢ်ပာ်ပတုာ်ကွံာ်ကၠိတၢ်သိၣ်လိန့ၣ်လီၤ.

တၢ်ကဲထီၣ်သးတၢ်ပာ်ဖျါတဘ့ၣ်အံၤပာ်ဖျါထီၣ်ဝဲတၢ်ကဲထီၣ်သးလၢ လၢၢ်ကဆီကီၢ်ဆၣ်, ဘျံးဒဝဲၢ်ကီၢ်ရ့ၣ် အပူၤဖဲ လါမး ၡး ၂၀၂၅ နံၣ်အတီၢ်ပူၤန့ၣ်လီၤ. ဖဲလါမးၡး ၁၂ သီ, ၂၀၂၅ နံၣ်န့ၣ်, ဒီၤတ--- သးနံၣ် (၅၁) နံၣ်လၢအအိၣ်ဖဲ ဖန--- သဝီ, စတ့ၢ် ကရူၢ်, လၢၢ်ကဆီကီၢ်ဆၣ်, တဂၤဘၣ်ဒိဝဲဒီးဟီၣ်လာ်မ့ၣ်ပိၢ်နးနးကလဲာ်ဖဲအဝဲမၤတၢ်လၢ ယူၣ်စနၣ်ဃီၤသိအခီပနံာ်အဃီၤသိ ကျီးပူၤအဆၢကတီၢ်န့ၣ်လီၤ. အခီၣ်လၢအစ့ၣ်တကပၤန့ၣ်ဘၣ်ဒိဝဲနးဒိၣ်မးန့ၣ်လီၤ. ဖဲတချုးဒံးလၢတၢ်လဲၤ ဆှၢအီၤဆူတၢ်ဆါဟံၣ် ဒံးဘၣ်န့ၣ် ကမျၢၢ်တၢ်ဒီသဒၢသုး (PDF) အကသံၣ်သရၣ်ကူစါန့ၢ်အီၤတၢ်ပူၤလီၢ်န့ၣ်လီၤ. ဟီၣ်က ဝီၤလၢအဝဲဖံးမၤတၢ်အလီၢ်န့ၣ် ဘၣ်တၢ်သ့ၣ်ညါဘၣ်စ့ၢ်ကီးလၢ အမ့ၢ်တၢ်လီၢ်လၢ SAC အသုးသ့ၣ်တဖၣ်ညီနုၢ်ထိသုးကျိၤ ဒီး ဒိးလီၤပာ်စ့ၢ်ကီးဟီၣ်လာ်မ့ၣ်ပိၢ် အလီၢ်န့ၣ်လီၤ. တၢ်အံၤကဲထီၣ်စ့ၢ်ကီးတၢ်ပျံၤတၢ်ဖုးလၢလီၢ်ကဝီၤသဝီဖိသ့ၣ်တဖၣ်အ ဂီၢ်န့ၣ်လီၤ. ဒီၤတ--- ဒီး အဟံၣ်ဖိဃီဖိ သ့ၣ်တဖၣ်မ့ၢ်ပှၤသ့ၣ်တဖၣ်လၢအိၣ်ဟဲန့ၣ်ခီၣ်ထံးခီၣ်ဘိလၢ ဝ့ၢ်တကူၣ် (ရန်ကုန်) အပူၤန့ၣ်လီၤ. ဖဲတၢ်ကဲထီၣ်သးအဆၢကတီၢ် န့ၣ် အဝဲသ့ၣ်မၤတၢ်ဒ်အမ့ၢ်ပှၤမၤဒိးလဲတၢ်ဖိဖဲ ယူၣ်စနၣ်ဃီၤသိအခီပနံာ် လၢအအိၣ်ဘူးဒီး ဖန--- သဝီန့ၣ်လီၤ. ဖဲလၢ ဒီၤတ--- ဘၣ်ဒိဝံၤအလီၢ်ခံ မ့ၢ်လၢအဖိသ့ၣ်တဖၣ်ဆီၣ်ထွဲမၤစၢၤအီၤတန့ၢ် ဘၣ်အဃိ အဝဲဘၣ်ကွၢ်ဆၢၣ်မဲာ်ဝဲဒီး တၢ်လုၢ်အီၣ်နီၢ်ခိသးသမူ အတၢ်ဂ့ၢ်ကီဒိၣ်မးန့ၣ်လီၤ. အခီပနံာ် မ့ၢ်ဟ့ၣ်န့ၢ်အီၤက သံၣ်ပှ့ၤဘၣ်ဆၣ်သနာ်က့, ခဲအံၤအဝဲဘၣ်ဒိးသန့ၤထီၣ်ဒၣ်အသးလၢ တၢ်မၤဘူၣ်လၢအဒိးန့ၢ်ဘၣ်ဝဲလၢအပှၤမၤသကိးတၢ် ဖိသ့ၣ်တဖၣ်အအိၣ် ဒီး တၢ်မၤစၢၤဆီၣ်ထွဲလၢအဖိမုၣ်အအိၣ်လီၤအဃိ လိၣ်ဘၣ်ဝဲတၢ်မၤစၢၤဆီၣ်ထွဲလၢအတၢ်အိၣ်မူဆူ ညါအဂီၢ်န့ၣ်လီၤ. ဖဲလၢတၢ်ကဲထီၣ်သးတခါအံၤဝံၤအလီၢ်ခံ သဝီဖိလၢအအိၣ်ဖဲ ဟီၣ်ကဝီၤဖဲန့ၣ်အပူၤသ့ၣ်တဖၣ် ကလဲၤ လၢအဝဲသ့ၣ်အကျီးပူၤအဂီၢ်တူၢ်ဘၣ်ဝဲလၢ တၢ်ဘံၣ်တၢ်ဘၢတအိၣ်လၢအဝဲသ့ၣ်အဂီၢ် ဘၣ်န့ၣ်လီၤ.