English
ကညီကျိာ်
မြန်မာ
Print:တၢ်ပာ်ဖျါအဖုၣ် တဘ့ၣ်အံၤ ပာ်ဖျါဝဲ တၢ်ကဲထီၣ်အသးဖဲ ထီတထူၣ်ကီၣ်ဆၣ်, တီအူကီၢ်ရ့ၣ်ပူၤန့ၣ်လီၤ. ဖဲလါယူၤလံ ၂၁ သီ, ၂၀၂၅ နံၣ်န့ၣ် ကီၢ်ပယီၤသုးခးလီၤကျိဖးဒိၣ်ချံလၢ ကက--- သဝီ, စယဲၣ်ကၠံတီၤခၠါကရူၢ်ပူၤအဃိ ပိာ်မုၣ်ဖိ သးနံၣ်အိၣ် (၁၄) နံၣ်တဂၤဒီး ပိာ်မုၣ်ဖိသးနံၣ်အိၣ် (၇) နံၣ်တဂၤ ဘၣ်ဒိဝဲဒၣ်န့ၣ်လီၤ. လၢန့ၣ်အမဲာ်ညါ, သဝီဖိအဟံၣ်တဖၣ် ဘၣ်ဒိဘၣ်ထံးဝဲဒၣ်န့ၣ်လီၤ. တၢ်ခးလီၤကျိဖးဒိၣ်ဝံၤအလီၢ်ခံ သဝီဖိတဖၣ် ဃ့ၢ်ထီၣ်ကွံာ်လၢ အဝဲသ့ၣ်ဒူသဝီအပူၤန့ၣ်လီၤ. သဝီဖိတဖၣ်ဃ့ၢ်ထီၣ်ကွံာ်ဖဲဂီၤခီဝံၤအလီၢ်ခံ ကီၢ်ပယီၤသုး ကဘီယူၤတဘ့ၣ် ဟဲခးလီၤတၢ်လၢ သဝီပူၤန့ၣ်လီၤ. ကဘီယူၤခးလီၤတၢ်အံၤ တဘၣ်ဒိဘၣ်ထံး ပှၤနီတဂၤဘၣ်သနာ်က့ သဝီဖိတဖၣ်အဟံၣ် ဘၣ်ဒိဘၣ်ထံးဝဲ (၃) ဖျၣ်န့ၣ်လီၤ. တနံၤဃီအတီၢ်ပူၤ ကီၢ်ပယီၤသုးခးလီၤအါထီၣ် ကျိးဖးဒိၣ်ချံဒီး သဝီဖိအဂၤတဂၤအဟံၣ် ဘၣ်ဒိးဘၣ်ထံးဝဲဒၣ်န့ၣ်လီၤ.[1]
ဖဲလါယူၤလံ ၂၁ သီ, ၂ဝ၂၅ နံၣ်အနံၤ, ဂီၤခီ (၈) နၣ်ရံၣ် ဃၣ်ဃၣ်န့ၣ် ကီၢ်ပယီၤသုး ခီၣ်သုးရ့ၣ် (ခလရ) နီၣ်ဂံၢ် (၇၃) ခးလီၤကျိဖးဒိၣ် (၃) ဖျၢၣ်ဒီး လီၤတဲာ်လၢ အအ--- သဝီ, စယဲၣ်ကၠံတီၤခၠါကရူၢ်, ထီတထူၣ်ကီၢ်ဆၣ်, တီအူကီၢ်ရ့ၣ်ပူၤန့ၣ်လီၤ. ကျိဖးဒိၣ် (၂) ဖျၢၣ်လီၤတဲာ်ဝဲလၢ ဒီၤအ--- အဟံၣ်ကရၢၢ်ပူၤန့ၣ်လီၤ. ကျိဖးဒိၣ်တၢတဖျၢၣ်န့ၣ် လီၤတဲာ်လၢဟံၣ်လီၤခံဒီး ခံဖျၢၣ်တဖျၢၣ်န့ၣ် လီၤတဲာ်လၢကမါအိၣ်လၢဟံၣ်လီၢ်ခံ ကရၢၢ်ချၢန့ၣ်လီၤ. သနာ်က့ ကျိဖးဒိၣ်ခံဖျၢၣ်တဖျၢၣ်န့ၣ် တပိၢ်ဖးဒိၣ်ဝဲဒၣ်ဒံးဘၣ်. ကျိဖး ဒိၣ်သၢဖျၢၣ်တဖျၢၣ်လီၤတဲာ်ဒီး ပိၢ်ဖးထီၣ်လၢအဟံၣ်မဲာ်ညါ ဃီထိးနါလၢ ဘၣ်တၢ်တ့အီၤဒီးအိးန့ၣ်လီၤ.
ဖဲကျိးဖးဒိၣ်တၢတဖျၢၣ်ပိၢ်ဖးထီၣ်အဆၢကတီၢ် ကျိဖးဒိၣ်အက့အခီဘၣ် မဘ--- အဖိမုၣ် (၂) ဂၤလၢအအိၣ်ဟံပူၤလၢ အအိၣ်ဘူးလိာ်သးဖဲအဖံ ဒီၤအ--- အဟံၣ်န့ၣ်လီၤ. အဖိမုၣ်တဂၤလၢ အမ့ၢ်မၣ်ဆ--- သးနံၣ်အိၣ် (၁၄) နံၣ် ဘၣ်ဒိလၢအစုနၢဘိအစ့ၣ်ဒီး အစုထွဲန့ၣ်လီၤ. အဖိမုၣ်အဂၤတဂၤလၢအမ့ၢ် မဒ--- သးနံၣ်အိၣ် (၇) နံၣ်န့ၣ် အမဲာ်တီၤခိၣ်ဘၣ်ကွးတစဲးဖိန့ၣ်လီၤ. မ့ၢ်လၢကျိဖးဒိၣ်အက့အခီဘၣ်အဝဲသ့ၣ်အဟံၣ်အဃိ ဟးဂူာ်ဟးဂီၤဝဲခဲလၢာ်န့ၣ်လီၤ. အဝဲသ့ၣ်ဟံၣ်လၢ အဟးဂူာ်ဟးဂီၤတဖျၢၣ်အံၤန့ၣ် ကက့ၤသူထီၣ်ဘှီထီၣ်က့ၤအီၤအဂီၢ် တၢ်လၢာ်ဘူၣ်လၢၤစ့ၤ ကလၢာ် (၅,၀၀၀,၀၀၀) ကၠးန့ၣ်လီၤ.
တချုးလၢ တၢ်ခးလီၤ ကျိဖးဒိၣ် ခံဖျၢၣ်တဖျၢၣ်ဒီး သၢဖျၢၣ်တဖျၢၣ်ဒံးဘၣ်န့ၣ် ဖိသၣ်လၢအဘၣ်ဒိ (၂) ဂၤဒီး ပှၤအိၣ်လၢဟီၣ်ကဝီၤဖဲန့ၣ်ကိးဂၤဒဲး ဃ့ၢ်အိၣ်ကမှံလံန့ၣ်လီၤ. အဃိ သဝီဖိအဂုၤအဂၤတဘၣ်ဒိဘၣ်ထံးနီတဂၤလၢၤဘၣ်. ကမျၢၢ်တၢ်ဒီသဒၢသုး (PDF) ဆူၣ်ချ့ပှၤမၤတၢ်တဖၣ် ဆှၢမၣ်ဆ--- ဆူအဘ--- တၢ်ဆါဟံၣ်လၢ သုးမီၤစိရိၤ ပၢဆှၢရဲၣ်ကျဲၤအီၤလၢ အအိၣ်ဖဲတီၤအူဝ့ၢ် ဒ်သိး ကဒိးကူစါယါဘျါသးအဂီၢ်န့ၣ်လီၤ. လၢတၢ်ဆါဟံၣ်န့ၣ် ပှၤထီန့ၣ်အစုနၢတဖၣ်ဒီးစတံဘိဒီး ဆးတံၢ်အီၤန့ၣ်လီၤ. သနာ်က့အစုနၢတဖၣ် အမၤဟူးဒ်သိးလၢအပူၤကွံာ်တသ့လၢၤဘၣ်. PDF ဆူၣ်ချ့ပှၤမၤစၢၤတၢ်ဖိတဖၣ် ရဲၣ်ကျဲၤတၢ်လဲၤတၢ်က့ၤအဃိလၢတၢ်လဲၤတၢ်က့ၤတကပၤ တၢ်ကီတၢ်ခဲတအိၣ်ဘၣ်သနာ်က့ အတၢ်ကူစါယါဘျါသးန့ၣ် လၢာ်ဝဲ ၂,၀၀၀,၀၀၀ ကၠးန့ၣ်လီၤ. မ့ မ့ၢ်လၢမၣ်ဒ--- အတၢ်ဘၣ်ဒိဘၣ်ထံးဆံးကိးဖိန့ၣ် ကူစါယါဘျါက့ၤဝဲလၢဟံၣ်န့ၣ်လီၤ.
တနံၤဃီအတီၢ်ပူၤ ဖဲ ၁၀ နၣ်ရံၣ်ဒီး ၁၁ နၣ်ရံၣ်အဘၢၣ်စၢၤန့ၣ် ကဘီယူၤဒုးသုးဟဲခးလီၤတၢ်န့ၣ်လီၤ. တၢ်ခးလီၤကျိဖးဒိၣ်ဝံၤအလီၢ်ခံ သဝီဖိတဖၣ်ဃ့ၢ်အိၣ်ကမှံလံအဃိ သဝီဖိတဘၣ်ဒိဘၣ်ထံးနီတဂၤဘၣ် န့ၣ်လီၤ. သနာ်က့ သဝီဖိခံဂၤလၢ အမ့ၢ်ကိၤဃ--- ဒီး ကိၤန--- အဟံၣ်ခံဖျၢၣ်လၢာ် ဟးဂူာ်ဟးဂီၤကွံာ်ဝဲခဲလၢၤန့ၣ်လီၤ. လၢန့ၣ်အမဲာ်ညါ အူဂ--- လကအမ့ၢ်ကရူၢ်ခိၣ်အဟံၣ်စ့ၢ်ကီးဘၣ်ဒိဘၣ်ထံးဝဲန့ၣ်လီၤ. သဝီဖိတဖၣ်ပာ်ဖျါထီၣ်ဝဲလၢ လၢခံတၢ်ခးလီၤအါထီၣ်ကျိဖးဒိၣ်ချံန့ၣ်လီၤ. ကျိဖးဒိၣ်ချံတဖျၢၣ် လီၤတဲာ်ဒီးပိၢ်ဖးထီၣ်လၢ အူဟ--- အဟံၣ်လီၢ်ခံ အဘူးဒီးဖၣ်ကပူၤန့ၣ်လီၤ. ဟံဖိဃီဖိတဖၣ်ဃ့ၢ်ကမှံအဃိ တဘၣ်ဒိဘၣ်ထံး အဝဲသ့ၣ်နီတဂၤဘၣ်န့ၣ်လီၤ.
သဝီဖိတဖၣ် ပာ်ဖျါထီၣ်ဝဲလၢ SAC (ထံကီၢ်တၢ်ပၢတၢ်ပြးကီၣ်ကးကရၢ) ခီၣ်သုးရ့ၣ် (ခလရ) နီၣ်ဂံၢ် (၇၃) ခးလီၤဝဲကျိဖးဒိၣ်န့ၣ်လီၤ. တၢ်ဒုးတၢ်ယၤတအိၣ်ဘၣ်သနာ်က့ ပညိၣ်ခးလီၤဝဲကျိဖးဒိၣ်လၢ အအ--- သဝီပူၤန့ၣ်လီၤ. ခးလီၤကျိဖးဒိၣ်ချံ (၈) ဖျၢၣ်ဒီးကဘီယူၤဟဲခးလီၤတၢ်တဘျီန့ၣ်လီၤ. ခးလီၤဝဲကျိဖးဒိၣ်ခဲလၢာ်ပှဲၤဖျၢၣ်လဲၣ်န့ၣ် တၢ်တသ့ညါအီၤဘၣ်. သဝီသးပှၢ် အူဧ---ပာ်ဖျါ ထီၣ်ဝဲလၢဟံၣ်ဘၣ်ဒိဘၣ်ထံးအိၣ်ဝဲ (၈) ဖျၢၣ်န့ၣ်လီၤ.
Footnotes:
[1] တၢ်ဂ့ၢ်တၢ်ကျိၤလၢ လံာ်ပာ်ဖျါတဘ့ၣ်အံၤအပူၤန့ၣ် တၢ်ဒိးန့ၢ်ဘၣ်အီၤဖဲ လါမးရှး ၂၀၂၆ နံၣ် အပူၤန့ၣ်လီၤ. ဘၣ်တၢ်ဆှၢဟ့ၣ်ထီၣ်အီၤလၢ လီၢ်ကဝီၤၦၤမၤ သကိးတၢ်တဂၤ ဖဲ တီအူကီၢ်ရ့ၣ် အပူၤ လၢအဘၣ်တၢ်သိၣ်လိအီၤ လၢကညီဂ့ၢ်ဝီခွဲးယာ်ကရူၢ် (KHRG) လၢကမၤနီၣ်မၤဃါတၢ်မၤဘၣ်ဒိ ၦၤဟီၣ်ခိၣ်ဖိ ခွဲးယာ်အတၢ်အိၣ် သးတဖၣ်ဖဲလီၢ်ကဝီၤပူၤန့ၣ်လီၤ. ၦၤတူၢ်ဘၣ်တၢ်တဖၣ်အမံၤ, တၢ်ဂီၤဒီး အိၣ်ဆိးလီၢ်ကျဲ လီၤတံၢ်လီၤဆဲးတဖၣ်န့ၣ် တၢ်မၤလီၤဘၢအီၤ လၢအဝဲနီၢ်ကစၢ် တၢ်ဘံၣ်တၢ်ဘၢအဂီၢ်န့ၣ်လီၤ. တၢ်ဂ့ၢ်တၢ်ကျိၤလၢ တၢ်ကွဲးၡဲပၠးအါထီၣ်အီၤ ဖဲပနိကဝီၤအပူၤန့ၣ် မ့ၢ်ဝဲဒၣ် KHRG အတၢ်ကွဲးၡဲ ထီၣ်တၢ်ဂ့ၢ် တၢ်ကျိၤန့ၣ်လီၤ.
