ကီၢ်ပယီၤသုးတၢ်ဟူးတၢ်ဂဲၤဖဲစ့ၣ်ကၠံဝ့ၢ်ပူၤဒီးဟီၣ်ကဝီၤလၢအဘူးသ့ၣ်တဖၣ်

စးထီၣ်လၢ ၂၀၂၁ နံၣ်သုးဟံးန့ၢ်ဆူၣ်ထံကီၢ်တၢ်စိတၢ်ကမီၤဝံၤအလီၢ်ခံကီၢ်ပယီၤသုးခးလီၤဝဲကျိဖးဒိၣ်ခဲအံၤခဲအံၤဒီးကျိဖးဒိၣ်ချံ တနီၤလီၤတဲာ်လၢသဝီတဖၣ်လၢအအိၣ်ဘူးဒီးစ့ၣ်ကၠံဝ့ၢ်, နိၣ်တကီကီၢ်ဆၣ်, ဒူပျာ်ယာ်ကီၢ်ရ့ၣ်အကပၤန့ၣ်လီၤ. ကီၢ်ပယီၤသုး သ့ၣ်တဖၣ်ခးလီၤဝဲကျိဖးဒိၣ်တဘျီလၢ်လၢ်ဖဲ KNLA [ကညီဒီကလုာ်တၢ်ထူၣ်ဖျဲးသုးမုၢ်ဒိၣ်] ဟဲခးအဝဲသ့ၣ်ဒီးဒြိန့ၣ်လီၤ. တၢ်ဟဲ ခးအဝဲသ့ၣ်မ့တမ့ၢ်တၢ်ဒုးတၢ်ယၤမ့ၢ်တအိၣ်ဘၣ်သနာ်က့တဘျီတခီၣ်အဝဲသ့ၣ်ခးလီၤနါစိၤစ့ၢ်ကီးဝဲကျိဖးဒိၣ်န့ၣ်လီၤ.

စ့ၣ်ကၠံဝ့ၢ်ဒီးသဝီလၢအဘူးသ့ၣ်တဖၣ်အါတက့ၢ်အိၣ်လၢကီၢ်ပယီၤသုးအတၢ်ပၢဆှၢဖီလာ်န့ၣ်လီၤ. [ကီၢ်ပယီၤသုး] ခီၣ်သုးရ့ၣ် (ခ လရ) နီၣ်ဂံၢ်-၂၈၄ အံၤအိၣ်ဆီလီၤအသးဘူးဖဲစ့ၣ်ကၠံဝ့ၢ်န့ၣ်လီၤ. ဖဲ ၂၀၂၁ နံၣ်သုးဟံးန့ၢ်ဆူၣ်ထံကီၢ်တၢ်စိတၢ်ကမီၤဝံၤအလီၢ်ခံ ခလရ နီၣ်ဂံၢ်-၂၈၄ သုးဖိသ့ၣ်တဖၣ်ဟးဆှၣ်တၢ်ဖဲဟီၣ်ကဝီၤဖဲအဝဲသ့ၣ်သုးကလၢၤအခိၣ်အဃၢၤဝးဝးလၢတၢ်ဘံၣ်တၢ်ဘၢအဂီၢ် န့ၣ်လီၤ. ဖဲဟးဆှၣ်တၢ်လၢမုၢ်နၤခီအဆၢကတီၢ်ပယီၤသုးသ့ၣ်တဖၣ်ညီနုၢ်ခးဝဲကျိစဲးတဖၣ်လၢခံထံၣ်ဒီးသၢထံၣ်အဘၢၣ်စၢၤန့ၣ် လီၤ. ဒ်ကီၢ်ပယီၤသုးတိာ်ပာ်ဝဲလၢကမၤတၢ်ဃုထၢဖဲ လါယနူၤအါရံၤ ၂၀၂၆ နံၣ်အသိးအဝဲသ့ၣ်မၤအါထီၣ်ဝဲသုးတၢ်ဟူးတၢ်ဂဲၤဖဲ ဟီၣ်ကဝီၤတဖၣ်လၢအအိၣ်လၢအဝဲသ့ၣ်တၢ်ပၢတၢ်ဆှၢအဖီလာ်န့ၣ်လီၤ.

[စးထီၣ်ဖဲ ၂၀၂၁ နံၣ်သုးဟံးန့ၢ်ဆူၣ်ထံကီၢ်တၢ်စိတၢ်ကမီၤလံၤလံၤန့ၣ်] ကီၢ်ပယီၤသုးတဖၣ်တြီတံာ်ဃာ် [စ့ၢ်ကီး] ဝဲသဝီဖိသ့ၣ်တ ဖၣ်အကျဲလၢကလဲၤဆူစ့ၣ်ကၠံဝ့ၢ်ပူၤန့ၣ်လီၤ. အဝဲသ့ၣ်အိးထီၣ်ဝဲတြဲၤ [တၢ်နုာ်လီၤတြဲၤ] ဖဲဂီၤခီ ၆ နၣ်ရံၣ်ဒီးကးတံာ်ဃာ်ဝဲစးထီၣ် လၢဟါခီ ၆ နၣ်ရံၣ်န့ၣ်လီၤ. မ့ၢ်ဘၣ်ဃးဒီးဂ့ၢ်ဂီၢ်အူတၢ်ကူစါယါဘျါအဂီၢ်တခီသဝီဖိသ့ၣ်တဖၣ်ဘၣ်ဒုးသ့ၣ်ညါဝဲကီၢ်ပယီၤသုးန့ၣ် လီၤ. သဝီဖိသ့ၣ်တဖၣ်ဘၣ်တၢ်ပျဲနုာ်လီၤဆူဝ့ၢ်ပူၤထဲဒၣ်မ့ၢ်ဒိးန့ၢ်ဘၣ်ဝဲတၢ်ပျဲလၢကီၢ်ပယီၤသုးအိၣ်ဝံၤအလီၢ်ခံန့ၣ်လီၤ. ကီၢ်ပယီၤ သုးဟ့ၣ်ဃာ်အလီတဲစိနီၣ်ဂံၢ်ဆူသဝီသးပှၢ်အအိၣ်ဒ်သိးသဝီဖိသ့ၣ်တဖၣ်ကဆဲးကျၢအဝဲသ့ၣ်လၢဂ့ၢ်ဂီၢ်အူ [ကသံၣ်ကသီတၢ်ကူ စါယါဘျါ] အဂီၢ်န့ၣ်လီၤ. ခီဖျိလၢတၢ်တြီတံာ်ဃာ်သ့ၣ်တဖၣ်အံၤအဃိသဝီဖိသနီၤဘၣ်ကွၢ်ဆၢၣ်မဲာ်ဝဲဒီးတၢ်တၤတၢ်သ့ၣ်တဖၣ် လၢကလဲၤဆူတၢ်ဆါဟံၣ်လၢကၠၤအ့ဝ့ၢ်ပူၤလၢတၢ်ကူစါယါဘျါသးအဂီၢ်န့ၣ်လီၤ.

ကီၢ်ပယီၤသုး ခီၣ်သုးရ့ၣ် (ခမရ) နီၣ်ဂံၢ်-၂၈၄ သုးကလၢၤတဖျၢၣ်အံၤအိၣ်ဘူး [စ့ၢ်ကီး] ဒီး ကက--- သဝီ, တခးကျိကရူၢ်, နိၣ်တ ကီကီၢ်ဆၣ်န့ၣ်လီၤ.

လါယနူၤအါရံၤ ၂၀ သီ ၂၀၂၆ နံၣ်အနံၤ- ကီၢ်ပယီၤသုးဖိတဖၣ်ခးသံဝဲသဝီဖိတဂၤဖဲ တခးကျိကရူၢ်ပူၤ 

ဖဲလါယနူၤအါရံၤ ၂၀ သီ ၂၀၂၆ နံၣ်အနံၤ မၣ်က--- ဒီးအဝၤ [လၢအအိၣ်ဖဲ ကက--- သဝီ] လဲၤဆူအဝဲသ့ၣ်ရီဘၢၣ်ကျီးဒ်သိးက လဲၤကွးရီဘၢၣ်ထုးအဂီၢ်န့ၣ်လီၤ. ကဘၣ်ဖဲမုၢ်နၤခီ ၇ နၣ်ရံၣ်အဆၢကတီၢ်ကီၢ်ပယီၤသုး ခလရ နီၣ်ဂံၢ်-၂၈၄ အပှၤသုးဖိတဖၣ်ခးဝဲ အဝဲသ့ၣ်ဒီးကျိတဘျုးထံၣ်အဃိဘၣ်သံဝဲ မၣ်အ--- (၄၁ နံၣ်) တဂၤတကတီၢ်ဃီန့ၣ်လီၤ. တၢ်ဘၣ်ဝဲအနၢ်တကံၤထံးဒီးသံကွံာ် ဝဲတကတီၢ်ဃီဖဲရီဘၢၣ်ထူၣ်သ့ၣ်တဖၣ်အဖီလာ်န့ၣ်လီၤ. တၢ်ကဲထီၣ်သးဝံၤအလီၢ်ခံအဝၤဟဲက့ၤစိာ်အီၤဆူသဝီပူၤန့ၣ်လီၤ.

သဝီဘံၣ်ဘၢလၢအအိၣ်ဖဲ အအ--- သဝီဒီးလၢအမံၤမ့ၢ် အူဘ--- တဂၤနာ်ဝဲလၢကီၢ်ပယီၤသုးအသုးဖိတဖၣ်ပညိၣ်ခးဝဲ မၣ်အ--- လိၤလိၤန့ၣ်လီၤ. အဝဲနာ်ဝဲလၢကီၢ်ပယီၤသုးအပှၤသုးဖိတဖၣ်လဲၤဝဲဆူဒဲတဖျၢၣ်လၢအအိၣ်ဘူးဒီးတၢ်ကဲထီၣ်သးအလီၢ်ဒီးခးဝဲပိာ် မုၣ်တဂၤန့ၣ်, ခီဖျိဖဲအဝဲလဲၤဃိထံဝဲတၢ်ကဲထီၣ်သးအလီၢ်အခါ ကီၢ်ပယီၤသုးအပှၤသုးဖိအိၣ်တၢ်အလီၢ် [ဖဲတၢ်ကဲထီၣ်သးအဆၢ ကတီၢ်] ဒီးတၢ်ကဲထီၣ်သးအလီၢ်န့ၣ်တၢ်ဒ့ၣ်စၢၤဘူးဒိၣ်မးန့ၣ်လီၤ. အူဘ--- စံးဘၣ် KHRG ဒ်အံၤ, “အဝဲသ့ [ကီၢ်ပယီၤသုးအပှၤ သုးဖိတဖၣ်] မ့တသ့ၣ်ညါဝဲအဝဲသ့ၣ်တၢ်ခးပနီၣ်လီၤတံၢ်လီၤဆဲးဘၣ်န့ၣ်အဝဲသ့ၣ်တကြၢးခးဘၣ်. အလီၢ်မ့ၢ်အိၣ်ဒီးအဝဲသ့ၣ် [ကီၢ်ပယီၤသုး] ကြၢးခးထီၣ်ကျိဆူမူခိၣ်လၢတၢ်ဟ့ၣ်ပလီၢ်အဂီၢ်လီၤ. တၢ်ကဲထီၣ်သးတဘျီအံၤမ့ၢ်ဝဲတၢ်ပညိၣ်ခးတၢ်လိၤလိၤလီၤ.” အဝဲစံးအါထီၣ်ကဒီးဝဲလၢ, “ပှၤသဝီဖိတဖၣ်ဘၣ်ဒိးသန့ၤထီၣ်အသးလၢတၢ်မၤမုၢ်ဆ့ၣ်မုၢ်ဂီၤလၢအဝဲသ့ၣ်တၢ်လုၢ်အီၣ်နီၢ်ခိသးသ မူအဂီၢ်ဘၣ်ဆၣ်ခီဖျိတၢ်ကဲထီၣ်သးအံၤအဃိပှၤအါဒံအါဂၤသူၣ်ပျံၤသးဖုးဝဲလၢကလဲၤကွးဝဲရီဘၢၣ်ထုးအဂီၢ်လီၤ. တၢ်ပျံၤတၢ်ဖုး အံၤဒုးအိၣ်ထီၣ်ဝဲတၢ်လုၢ်အီၣ်နီၢ်ခိသးသမူအတၢ်တၤတၢ်ဒိၣ်ဒိၣ်မုၢ်မုၢ်လီၤ. တၢ်ခးတၢ်ဒ်အံၤမ့ၢ်ကဲထီၣ်ကဒီးအသးကွ့ၢ်ကွ့ၢ်န့ၣ်သဝီ ဖိတဖၣ်ကအိၣ်ဒီးတၢ်ပျံၤတၢ်ဖုးလၢကဖံးတၢ်မၤတၢ်အဂီၢ်လီၤ. ကီၢ်ပယီၤသုးကဘၣ်ဟ့ၣ်ဝဲတၢ်ဟ့ၣ်ကၣ်လၢပှၤတူၢ်ဘၣ်တၢ်အ ဟံၣ်ဖိဃီဖိလီၤ.”

လၢအပူၤကွံာ် အအ--- သဝီပူၤန့ၣ်တၢ်ပာ်ပနီၣ်ဃာ်ဝဲတၢ်ဆၢကတီၢ်လၢတၢ်တဘၣ်ဟးထီၣ်က့ၤလီၤအကတီၢ်တအိၣ်ဘၣ်. တၢ် ကဲထီၣ်သးအံၤဝံၤအလီၢ်ခံကီၢ်ပယီၤသုးပာ်ပနီၣ်ဃာ်ဝဲတၢ်ဆၢကတီၢ်လၢတၢ်တဘၣ်ဟးထီၣ်က့ၤလီၤအကတီၢ်ဒီးသဝီဖိတဖၣ်တၢ်ဟ့ၣ်အခွဲးလၢကဟးထီၣ်က့ၤလီၤန့ၢ်တုၤဒၣ်ထဲတချုးမုၢ်နၤခီ ၇ နၣ်ရံၣ်ဘၣ်န့ၣ်လီၤ.