လါစဲးပထ့ဘၢၣ် ၂၀၂၄ နံၣ်, SAC ဃ့ဆူၣ်သ့ၣ်ဒီးဝၣ်တဖၣ်ဆူသဝီဖိသ့ၣ်တဖၣ်အအိၣ်

ဖဲလါစဲးပထ့ဘၢၣ် ၂၇ သီ, ၂၀၂၄ နံၣ်အနံၤ, သုးဖိလၢအမ့ၢ် ထံကီၢ်တၢ်ပၢတၢ်ပြးကီၣ်ကးကရၢ (SAC) ခီၣ်ချ့သုးရ့ၣ် (ခမရ) (နီၣ်ဂံၢ်-၄၀၉), လၢအအိၣ်လၢစုကဝဲၤဒိၣ် (အမတ)  (နီၣ်ဂံၢ်-၈) အစုတီၤဖီလာ်လၢအအိၣ်ဆီလီၤအသးဖဲလ့က့ၣ်သဝီ, ဖယၢ် ရီကရူၢ်, ဘံလ့ကီၢ်ဆၣ်, ဒူသထူၣ်ကီၢ်ရ့ၣ်အပူၤသ့ၣ်တဖၣ်ဃ့ဆူၣ်ဝဲသ့ၣ်ဒီးဝၣ်သ့ၣ်တဖၣ်လၢသဝီဖိလၢအအိၣ်လၢကက---သဝီ သ့ၣ်တဖၣ်န့ၣ်လီၤ. သဝီဖိလၢအအိၣ်လၢကက---သဝီသ့ၣ်တဖၣ်ကျီန့ၢ်ဝဲသ့ၣ်ဒီးဝၣ်သ့ၣ်တဖၣ်လၢသုးဖိသ့ၣ်တဖၣ်အဂီၢ်ဘၣ် ဆၣ်သနာ်က့အဝဲသ့ၣ်တလဲၤဆှၢန့ၢ်ဝဲသုးဖိသ့ၣ်တဖၣ်ဘၣ်ခီဖျိသ့ၣ်ဒီးဝၣ်လၢအဝဲသ့ၣ်ကျီန့ၢ်ဝဲသ့ၣ်တဖၣ်တန့ၢ်ထဲသိးဒီးသုးဖိ သ့ၣ်တဖၣ်အတၢ်ဃ့အဝဲသ့ၣ်အသိးဘၣ်န့ၣ်လီၤ.

ဒ်န့ၢ်အသိးဖဲလါအီးကထိဘၢၣ် ၂၀ သီ, ၂၀၂၄ နံၣ်အနံၤန့ၣ်, SAC သုးဖိသ့ၣ်တဖၣ်ဃ့ဝဲသ့ၣ်အါန့ၢ် ၃၀၀ ဒီး ဝၣ် ၁၀၀ ဆူသ ဝီဖိလၢအအိၣ်ဖဲကက---သဝီသ့ၣ်တဖၣ်န့ၣ်လီၤ. အဝဲသ့ၣ်မၤပျံၤမၤဖုးစ့ၢ်ကီးသဝီဖိသ့ၣ်တဖၣ်န့ၣ်လီၤ. [ဒ်တၢ်ပာ်ဖျါအသိး, သုးဖိ သ့ၣ်တဖၣ်န့ၣ်စံးဝဲလၢ ‘ပမ့ၢ်ပှၤပိာ်ခွါ’, ဖျါဝဲဒ်သိးအဝဲသ့ၣ်အိၣ်ဒီးကျိဒီးမၤသံသဝီဖိသ့ကိးဆၢကတီၢ်ဒဲးန့ၣ်လီၤ.] (ခမရ) (နီၣ်ဂံၢ်-၄၀၉) အံၤဘၣ်တၢ်တီခိၣ်ရိၤမဲအီၤလၢသုးရ့ၣ်ခိၣ်ထဲၣ်လ့ (ထက်လင်း) ဒီးသုးရ့ၣ်ခိၣ်မၠိမ့ဟ့ (မျိုးမင်းဟိန်း) န့ၣ်လီၤ. သဝီဖိသ့ၣ်တဖၣ်ဆှၢန့ၢ်ဝဲသ့ၣ်အဘိ ၁၀၀ လၢအကစီၤထီၣ်ထီဝဲ ၈ ပ့ၣ် [၂.၄ မံးထၢၣ်] ဒီး ဝၣ်အဘိ ၃၀၀ လၢအကစီၤ ထီၣ်ထီဝဲ ၁၂ ပ့ၣ် [၃.၇ မံးထၢၣ်] ဖဲလါအီးကထိဘၢၣ်အပူၤန့ၣ်လီၤ. ဝၣ်တဘိန့ၣ် SAC ဟ့ၣ်ဝဲ ၅၀၀ ကၠး ဒီးမ့မ့ၢ်သ့ၣ်တခီ တဟ့ၣ်ဝဲအပှ့ၤနီတမံၤဘၣ်. သ့ၣ်ဒီးဝၣ်သ့ၣ်တဖၣ်အံၤဘၣ်တၢ်သူအီလၢတၢ်ကက့ၤဘှီဂ့ၤထီၣ်က့ၤသုးကလၢၤအတီၤသ့ၣ်တဖၣ် လၢအလီၢ်လံၤဒီးဟးဂီၤဝဲလံသ့ၣ်တဖၣ်န့ၣ်လီၤ.

လါဒံၣ်စဲဘၢၣ် ၂၀၂၀၄ နံၣ်, သဝီဖိလၢအအိၣ်ဖဲဒွဲၣ်လိကီၢ်ဆၣ်, မုၢ်တြီၢ်ကီၢ်ရ့ၣ်ပူၤသ့ၣ်တဖၣ်ဘၣ်ဃ့ၢ်မှံဟးဖျိးဝဲဆူ ဘံလ့ကီၢ်ဆၣ်, ဒူသထူၣ်ကီၢ်ရ့ၣ်အပူၤန့ၣ်လီၤ.

ဖဲလါနိၣ်ဝ့ဘၢၣ် ၂၀၂၄ နံၣ် (KNLA) ဒီး (SAC) သုးဖိသ့ၣ်တဖၣ်အဘၢၣ်စၢၤတၢ်ဒုးကဲထီၣ်ဖဲထံကစီၤမဲသုးကလၢၤဒီးကစၢၢ် သၢဖျၢၣ်သုးကလၢၤလၢအအိၣ်ဖဲဒွဲၣ်လိကီၢ်ဆၣ်, မုၢ်တြီၢ်(ဖၣ်ပူၣ်) ကီၢ်ရ့ၣ်အပူၤဝံၤအလီၢ်ခံ, KNU လီၢ်ကဝီၤခိၣ်နၢ်သ့ၣ်တဖၣ် ဟ့ၣ်ပလီၢ်ဝဲသဝီဖိလၢအအိၣ်ဖဲကခ---သဝီ, ကတၢတံးကရူၢ်, ဒွဲၣ်လိကီၢ်ဆၣ်အပူၤသ့ၣ်တဖၣ်ဒီးသဝီဖိအဂၤလၢအအိၣ်ဘူး ဖဲန့ၣ်သ့ၣ်တဖၣ်လၢကဃ့ၢ်အိၣ်ကဒုအသးလၢတၢ်ပူၤဖျဲးအလီၢ်ချီဖျိအဝဲသ့ၣ်နာ်ဝဲလၢတၢ်ဒုးကကဲထီၣ်စ့ၢ်ကီးဝဲလၢကတၢတံးသုး ကလၢၤန့ၣ်လီၤ. ဖဲသဝီဖိသ့ၣ်တဖၣ်နၢ်ဟူဝဲတၢ်ဟ့ၣ်ပလီၢ်ဝံၤတဘျီဃီန့ၣ်အဝဲသ့ၣ်သုးထီၣ်ကွံာ်အသးဆူသဝီချၢခီဖျိအဝဲသ့ၣ် အိၣ်ဝဲတဘူၣ်လၢၤဘၣ်န့ၣ်လီၤ.

ဖဲလါဒံၣ်စဲဘၢၣ်ထီၣ် ၁ သီ, ၂၀၂၄ နံၣ်အနံၤန့ၣ်, သဝီဖိသ့ၣ်တဖၣ်စးထီၣ်ဟးထီၣ်ကွံာ်ဝဲလၢအဝဲသ့ၣ်သဝီပူၤန့ၣ်လီၤ. ခဲလၢာ် ခဲဆ့ဟံၣ်ခိၣ် (၁၄၆) ဖျၢၣ်, ပှၤနီၣ်ဂံၢ် (၇၂၈) ဂၤ (မုၣ် (၃၉၀) ဂၤ ဒီး ခွါ (၃၃၈) ဂၤ) လၢအအိၣ်ဖဲ ကဂ---သဝီ, ကဃ---သဝီ, ကင---သဝီ, ကစ---သဝီ, ကတၢတံးကရူၢ်, ဒွဲၣ်လိကီၢ်ဆၣ်သ့ၣ်တဖၣ်သုးလီၢ်သုးကျဲဒီးလဲၤအိၣ်ဆိးဝဲလၢဘံလ့ကီၢ်ဆၣ် အပူၤန့ၣ်လီၤ. ဖဲသဝီဖိတဖၣ်သုးကွံာ်အသးအခါအဝဲသ့ၣ်စိာ်ဃုာ်ဝဲတၢ်အီၣ်တၢ်အီတန့ၢ်နီတမံၤဘၣ်. လၢတၢ်န့ၣ်အဃိအဝဲသ့ၣ် ဘၣ်ကွၢ်ဆၢၣ်မဲာ်ဝဲတၢ်ကီတၢ်ခဲဘၣ်ဃးတၢ်အီၣ်တၢ်အီတလၢတလီၢ်ဘၣ်န့ၣ်လီၤ.

လါဒံၣ်စဲဘၢၣ် ၂၀၂၄ နံၣ်, SAC ကဘီယူၤဒီးဒြိခးလီၤဝဲဒၣ်တၢ်ဆူ ဘံလ့ကီၢ်ဆၣ် ဖဲကညီနံၣ်ထီၣ်သီအနံၤ

ဖဲလါဒံၣ်စဲဘၢၣ် ၃၀ သီ, ၂၀၂၄ နံၣ်အနံၤန့ၣ်, ဒြိတဘ့ၣ်ဒီးကဘီယူၤဒုးသုးတဘ့ၣ်လၢအပၣ်ဃုာ်အီၣ်လံၢ်ကၢၢ်ကျိစဲးလးတဖၣ် [ပှၤသဝီဖိသ့ၣ်တဖၣ်နာ်ဝဲလၢ SAC အတၢ်] ဟဲခးလီၤဝဲတၢ်ဖဲဘံလ့ကီၢ်ဆၣ်အပူၤန့ၣ်လီၤ. ပှၤသဝီဖိသ့ၣ်တဖၣ်တဲဝဲလၢ ဒြိတဘ့ၣ်အံၤဟဲကွၢ်ဟုၣ်ကွၢ်စူၣ်တၢ်နွံဘျီဃီးဘျီတချုးဒံးလၢဟဲတ့ၢ်လီၤဝဲမ့ၣ်ပိၢ်သ့ၣ်တဖၣ်ဒံးဘၣ်န့ၣ်လီၤ. ဖဲဂီၤခီ ၁၁:၅၅ အ ဆၢကတီၢ်န့ၣ်, ဒြိတဘ့ၣ်အံၤတ့ၢ်လီၤဝဲမ့ၢ်ပိၢ် ၃ ဖျၢၣ် ဒီး မ့ၢ်ပိၢ်ခဲလၢာ်န့ၣ်လီၤတဲာ်ဝဲလၢကဆ---အဟီၣ်ကဝီၤအပူၤလၢအ အိၣ်ဖဲကရှ---သဝီချၢ, ကၠါတီၤစ့ၣ်ကရူၢ်ဒီး ကည---သဝီ (ဘၣ်တၢ်ကိးစ့ၢ်ကီးအီၤလၢ ကတ--သဝီ), ယိၤကျါကရူၢ်, ဘံလ့ ကီၢ်ဆၣ်အဘၢၣ်စၢၤန့ၣ်လီၤ.

ဖဲဟါခီ ၁၂:၀၅ အဆၢကတီၢ်, SAC အကဘီယူၤဒုးသုးတ့ၢ်လီၤကဒီးဝဲမ့ၣ်ပိၢ်(၃)ဖျၢၣ်န့ၣ်လီၤ. မ့ၢ်ပိၢ်အကျါတဖျၢၣ်န့ၣ် လီၤတဲာ်ဝဲဖဲ ကထ---သဝီချၢ, နိၣ်ဘၢၣ်ဘီကရူၢ်န့ၣ်လီၤ. မ့ၣ်ပိၢ်အဂၤခံဖျၢၣ်တခီလီၤတဲာ်ဖဲလဲၣ်န့ၣ်တၢ်တသ့ၣ်ညါဝဲဒၣ်ဘၣ်. ဖဲဟါခီ ၁၂:၃၀ အဆၢကတီၢ်, ကဘီယူၤဒုးသုးဟဲတ့ၢ်လီၤကဒီးဝဲမ့ၣ်ပိၢ် (၃)ဖျၢၣ်န့ၣ်လီၤ. မ့ၢ်ပိၢ်သ့ၣ်တဖၣ်လီၤတဲာ်ဝဲဒၣ်လၢကဒ---သဝီချၢ, နိၣ်ဘၢၣ်ဘီကရူၢ်န့ၣ်လီၤ. လၢန့ၣ်အမဲာ်ညါကဘီယူၤဒုးသုးတဘ့ၣ်အံၤခးလီၤစ့ၢ်ကီးဝဲကျိအီၣ်လံၢ်ကၢၢ်အါအါဂီၢ်ဂီၢ် လၢကထ---သဝီအချၢန့ၣ်လီၤ. ကဘီယူၤဟဲခးလီၤတၢ်ဒီးခးလီၤဝဲအီၤလံၤကိကျိစဲးလးလၢသဝီချၢတဖၣ်အံၤတဘၣ်ဒိဘၣ်ထံးဝဲ ပှၤနီတဂၤဘၣ်ဒီးဖဲန့ၣ်အဆၢကတီၢ်စ့ၢ်ကီးသဝီဖိသ့ၣ်တဖၣ်မၤလၤကပီၤဝဲကညီနံၣ်ထီၣ်သီအမူးသးဖှံဖဲသဝီအပူၤန့ၣ်လီၤ.

သဝီဖိခဲလၢာ်လၢအအိၣ်ဖဲနိၣ်ဘၢၣ်ဘီကရူၢ်အပူၤသ့ၣ်တဖၣ်ပျံၤတၢ်ဖုးတၢ်န့ၣ်လီၤ. ဖိသၣ်သ့ၣ်တဖၣ်လၢအအိၣ်ဖဲကထ---သဝီ သ့ၣ်တဖၣ်ကြၢးဂဲၤလိၣ်ကွဲဒံးသိးသိးဖဲဟါခီအဆၢကတီၢ်သနာ်က့သဝီဖိသ့ၣ်တဖၣ်ဘၣ်ဃ့ၢ်ဒီးဟးမံလၢတၢ်ချၢခီဖျိဘၣ်ပျံၤဘၣ် ဖုးဝဲလၢတၢ်ကဟဲခးအဝဲသ့ၣ်အဒူသဝီန့ၣ်လီၤ. ထဲဒၣ်လၢကဘီယူၤမ့ၢ်တဟဲလၢၤဘၣ်ဒီးသဝီဖိသ့ၣ်တဖၣ်ဟဲက့ၤကဒါက့ၤလၢအ ဝဲသ့ၣ်ဒူသဝီပူၤန့ၣ်လီၤ. သဝီဖိသ့ၣ်တဖၣ်ဟဲက့ၤဝဲလၢမုၢ်ဆါခါအဆၢကတီၢ်ဒီးမ့မ့ၢ်မုၢ်နၤခါအဆၢကတီၢ်တခီဟးမံဝဲလၢသဝီချၢ န့ၣ်လီၤ.

လါယနူၤအါရံၤ ၂၀၂၅ နံၣ်, SAC (ခမရ) (နီၣ်ဂံၢ်-၄၀၅) ဒီး (ခလရ) (နီၣ်ဂံၢ်-၂၇) ခးလီၤဝဲကျိဖးဒိၣ်လၢသဝီသ့ၣ်တဖၣ်အက ပၤခဲအံၤခဲအံၤန့ၣ်လီၤ.

[ဖဲလါယနူၤအါရံၤ ၂၀၂၅ နံၣ်ဒီတလါအတီၢ်ပူၤတၢ်ခးလိာ်သးကဲထီၣ်ဝဲလၢ (KNLA) သုးဖိသ့ၣ်တဖၣ် ဒီး (SAC) သုးဖိသ့ၣ် တ ဖၣ်အဘၢၣ်စၢၤဖဲမဲာ်ပြ့သုးကလၢၤ, မဲာ်ပြ့ကရူၢ်, ဘံလ့ကီၢ်ဆၣ်အပူၤန့ၣ်လီၤ. လၢတၢ်န့ၣ်အဃိ SAC ခီၣ်ချ့သုးရ့ၣ် (ခမရ) (နီၣ်ဂံၢ်-၄၀၅) လၢအအိၣ်ဆီလီၤအသးဖဲ မဲာ်ပြ့သုးကလၢၤဒီးခီၣ်သုးရ့ၣ် (ခလရ) (နီၣ်ဂံၢ်-၂၇) လၢအအိၣ်ဆီလီၤအသးဖဲ နးကၠံသဝီ, ရွှ့ၣ်လီအ့ကရူၢ်, ဘံလ့ကီၢ်ဆၣ်လၢအအိၣ်လၢ (အမတ) (နီၣ်ဂံၢ်-၈) တၢ်ပၢဆှၢအဖီလာ်သ့ၣ်တဖၣ်ခးလီၤဝဲကျိ ဖးဒိၣ်ဖဲလါယနူၤအါရံၤ ၁ သီ, ၃ သီ, ၁၂ သီ, ၁၇ သီ, ဒီး ၁၉ သီ, ၂၀၂၅ နံၣ်အနံၤသ့ၣ်တဖၣ်ဖဲတၢ်ဒုးတၢ်ယၤကဲထီၣ်ဝဲအဖၢ မုၢ်အလီၢ်အဃၢၤဝးဝးန့ၣ်လီၤ.]

ဖဲလါယနူၤအါရံၤ ၁ သီ, ၂၀၂၅ နံၣ်အနံၤ, ဂီၤခီ ၆:၀၀ အဆၢကတီၢ်, (SAC) ပယီၤသုးဖိ (ခမရ) (နီၣ်ဂံၢ်-၄၀၅), လၢအအိၣ်လၢ (အမတ) (နီၣ်ဂံၢ်-၈) တၢ်ပၢဆှၢအဖီလာ်လၢအိၣ်ဆီလီၤအသးဖဲမဲာ်ပြ့သုးကလၢၤသ့ၣ်တဖၣ်ခးလီၤဝဲကျိဖးဒိၣ် (၁၂၀) မမ လွံၢ်ဖျၢၣ်န့ၣ်လီၤ. ကျိဖးဒိၣ်ချံတဖျၢၣ်န့ၣ် လီၤတဲာ်ဝဲဖဲ ကန---သဝီအပူၤ, အၤစူးခၠီကရူၢ် အဃိဘၣ်သံဝဲပနၢ် (၂) ဒု ဒီးမဲာ်တဲးလဲး (၄) ဒုန့ၣ်လီၤ. မဲာ်တဲးလဲးအကျါ (၂) ဒု န့ၣ် မ့ၢ်ဝဲသဝီဖိစီၤက--- အမဲာ်တဲးလဲးဒီးပနၢ်အကျါ (၁) ဒုန့ၣ် မ့ၢ်ဝဲစီၤခ---အပနၢ် ဒီးပနၢ်အဂၤ (၁) ဒုန့ၣ်မ့ၢ်ဝဲစီၤဂ---အပနၢ်န့ၣ်လီၤ.  မ့မ့ၢ်မဲာ်တဲးလဲးအဂၤ (၂) ဒုတခီမ့ၢ်ဝဲစီၤဂ---အမဲာ်တဲးလဲးန့ၣ်လီၤ. ကျိဖး ဒိၣ်ချံအဂၤ (၃) ဖျၢၣ်တခီလီၤတဲာ်ဝဲဖဲစံာ်ပူၤလၢသဝီချၢန့ၣ်လီၤ. လၢတၢ်န့ၣ်အဃိဖဲလါယနူၤအါရံၤ ၂ သီ, ၂၀၂၅နံၣ်အနံၤန့ၣ်, သဝီဖိလၢအအိၣ်ဖဲကန---သဝီပူၤသ့ၣ်တဖၣ်ဟးထီၣ်ကွံာ်ဝဲလၢအဝဲသ့ၣ်သဝီချၢန့ၣ်လီၤ. [သဝီဖိတနီၤဃ့ၢ်ကွံာ်ဝဲဆူအဝဲသ့ၣ် ဘူးတံၢ်အအိၣ်လၢအအိၣ်လၢသဝီအဂၤဒီးတနီၤဃ့ၢ်ကွံာ်ဝဲလၢကစၢၢ်ခိၣ်ကလိကျါဒီးလၢထံခံန့ၣ်လီၤ.]

ဖဲလါယနူၤအါရံၤ ၃ သီ, ၂၀၂၅ နံၣ်အနံၤ, ဟါခီ ၈ : ၃၅ အဆၢကတီၢ်, (SAC) ခီၣ်သုးရ့ၣ် (ခလရ) (နီၣ်ဂံၢ်-၂၇) အပှၤသုးဖိ လၢအိၣ်ဖဲသုးကလၢၤလၢအအိၣ်ဆီလီၤအသးဖဲ နးကၠံသဝီ, ရွှ့ၣ်လီၤအ့ကရူၢ်, ဘံလ့ကီၢ်ဆၣ်လၢအအိၣ်လၢ (အမတ) (နီၣ်ဂံၢ်-၈) အတၢ်ပၢဆှၢအဖီလာ်သ့ၣ်တဖၣ်ခးလီၤဝဲကျိဖးဒိၣ် (၆၀) မမ (၂) ဖျၢၣ်ဆူကပ---ကဝီၤဒ့ကဖ---သဝီ, ရွှ့ၣ်လီၤအ့ကရူၢ်အဃိ ဘၣ်သံဝဲသဝီဖိ (၂) ဂၤ ဒီးဘၣ်ဒိဝဲသဝီဖိ (၃) ဂၤန့ၣ်လီၤ. ခီဖျိလၢတၢ်ခးလီၤကျိဖးဒိၣ်အဃိဟံၣ် (၁) ဖျၢၣ် ဘၣ်ဟးဂီၤလီၤပှီၢ် ကွံာ်ဝဲဒၣ်န့ၣ်လီၤ. ဟံၣ်ကစၢ် အူင--- စ့ၢ်ကီးကျိဖးဒိၣ်အက့ဘၣ်ဝဲအဟၢဖၢဒီးသံဝဲဒၣ်လၢဟံၣ်ပူၤန့ၣ်လီၤ. အဝဲအဖိဒိၣ်မုၣ်မၣ်ရှ---သးနံၣ် ၂၈ နံၣ် တဂၤစ့ၢ်ကီးကျိဖးဒိၣ်အက့ဘၣ်ဝဲအခိၣ်သၣ်ဃံဒီးသံကွံာ်ဝဲဒၣ်န့ၣ်လီၤ. ကျိဖးဒိၣ်အံၤ ဘၣ်စ့ၢ်ကီးဝဲဟံၣ်သ့ၣ် တဖၣ်လၢအအိၣ်ဘူးဒီးအူ င---အဟံၣ်န့ၣ်လီၤ. မၣ်ဆ--- (ပိာ်မုၣ်သးနံၣ် ၃၅နံၣ်) တဂၤဘၣ်ဒိဝဲအစုလၣ် အထွဲဒီးမၣ် ရှ--- (ပိာ်မုၣ်လိၣ်ဘိသးနံၣ်၁၉နံၣ်) တဂၤ ဘၣ်ဒိဝဲအခီၣ်ဒုၣ်သၣ်အစ့ၣ်န့ၣ်လီၤ. ပိာ်မုၣ်လၢအဘၣ်ဒိခံဂၤအံၤဒိးန့ၢ် ဘၣ်ဝဲတၢ်ကူစါယါ ဘျါဖဲအဝဲသ့ၣ်အဟံၣ်န့ၣ်လီၤ. ပိာ်မုၣ်သးပှၢ် (၅၀) နံၣ်တဂၤလၢအမံၤမ့ၢ် ဒီၤည--- တဂၤအံၤဘၣ်ဒိဝဲအခီၣ် ဒုၣ်သၣ်ခံကပၤလၢာ် န့ၣ်လီၤ. မၣ်ဆ---တဂၤအံၤဘၣ်ဒိနးမးအဃိဘၣ်လဲၤဒိးကူစါယါဘျါအသးဖဲကဖ---တၢ်ဆါဟံၣ်, ရွှ့ၣ်လီ အ့ကရူၢ်, လၢဘၣ်တၢ်တီခိၣ်ရိၢ်မဲအီၤလၢ SAC န့ၣ်လီၤ. SAC (ခလရ) (နီၣ်ဂံၢ်-၂၇) သုးကလၢၤအံၤဘၣ်တၢ်တီခိၣ်ရိၢ်မဲအီၤလၢ သုးခိၣ်အီၤဖိ ခၣ် (အောင်ဖုန်းခန့်) န့ၣ်လီၤ.

ဖဲလါယနူၤအါရံၤ ၃ သီ, ၂၀၂၅ နံၣ်အနံၤန့ၣ်, တၢ်ဒုးကဲထီၣ်ဝဲလၢ (SAC) သုးဖိ (ခမရ) (နီၣ်ဂံၢ်-၄၀၅) လၢအအိၣ်လၢ (အမတ) (နီၣ်ဂံၢ်-၈) တၢ်ပၢအဖီလာ်သ့ၣ်တဖၣ်ဒီး (KNLA) သုးဖိသ့ၣ်တဖၣ်အဘၢၣ်စၢၤဖဲ ခဂ---သဝီ, မဲးပြံးကရူၢ် [လၢအအိၣ်ဘူးဒီးမဲာ် ပြ့သုးကလၢၤ]န့ၣ်လီၤ. ဖဲတၢ်ဒုးကဲထီၣ်သးအဆၢကတီၢ်သဝီဖိလၢအအိၣ်ဘူးဒီးသုးကလၢၤသ့ၣ်တဖၣ်ဘၣ်ပျံၤဘၣ်ဖုးဝဲလၢ (SAC) သုးသ့ၣ်တဖၣ်ကတ့ၢ်လီၤမ့ၣ်ပိၢ်ဒီးဒြိဖဲအဝဲသ့ၣ်သဝီပူၤအဃိအဝဲသ့ၣ်အိၣ်လၢသဝီပူၤတဘူၣ်လၢၤဘၣ်န့ၣ်လီၤ. သဝီဖိ သ့ၣ်တဖၣ်လၢအအိၣ်ဘူးဒီးသုးကလၢၤအံၤဟးဃ့ၢ်ထီၣ်ကွံာ်ဝဲဒၣ်လၢကစၢၢ်ခိၣ်ကလိကျါလၢထံခံဒီးတၢ်လီၢ်လၢအဝဲသ့ၣ်အဘူးအတံၢ်အိၣ်အလီၢ်ခီဖျိအဝဲသ့ၣ်အိၣ်ဝဲလၢသဝီပူၤတဘူၣ်လၢၤဘၣ်န့ၣ်လီၤ. သဝီဖိလၢအိၣ်ဖဲကဘ---, ကမ---, ကယ---, ကရ---, ကလ---, ကဝ---, ခဂ-- ဒီး ကသ--- သဝီသ့ၣ်တဖၣ်လၢအအိၣ်လၢမဲာ်ပြ့ကရူၢ်, ဒီးကဟ---, ကအ---, ဒီး ကဧ--- သဝီသ့ၣ်တဖၣ်လၢအအိၣ်လၢအံစူးခံကရူၢ်သ့ၣ်တဖၣ်ဘၣ်ဃ့ၢ်မှံဟးဖျိးဝဲဒၣ်န့ၣ်လီၤ. သဝီဖိသ့ၣ်တဖၣ်အံၤဟးဃ့ၢ်ကွံာ်ဝဲလၢတၢ် လီၢ်လၢအဘူးအတံၢ်ဒီးအသမူသကိးအိၣ်တၢ်အလီၢ်သ့ၣ်တဖၣ်န့ၣ်လီၤ. သဝီဖိတနီၤလဲၤဃ့ၢ်ဝဲလၢက--- (ဘၣ်တၢ်သ့ၣ်ညါ စ့ၢ်ကီးအီၤလၢ ခခ---) သဝီ, ကီၢ်ဖူကရူၢ်, ဘုသိၣ်ကီၢ်ဆၣ်, မုၢ်တြီၢ်ကီၢ်ရ့ၣ်န့ၣ်လီၤ. သဝီဖိတနီၤန့ၣ်လဲၤဃ့ၢ်စ့ၢ်ကီးဝဲလၢ ဒွဲၣ်လိကီၢ်ဆၣ်, မုၢ်တြီၢ်ကီၢ်ရ့ၣ် ဒီးကြုၢ်တုကီၢ်ဆၣ်, ဒူပျာ်ယာ်ကီၢ်ရ့ၣ်အပူၤသ့ၣ်တဖၣ်န့ၣ်လီၤ.

လၢန့ၣ်အမဲာ်ညါခီဖျိတၢ်ခးလိာ်သးအဃိကၠိဖိလၢအအိၣ်ဖဲမဲာ်ပြ့ကရူၢ်ဒီးအစူခၠီကရူၢ်သ့ၣ်တဖၣ်တထီၣ်ဘၣ်ကၠိလၢၤဘၣ်ဒီးသဝီ ဖိသ့ၣ်တဖၣ်စ့ၢ်ကီးဖံးတၢ်မၤတၢ်တသ့လၢၤဘၣ်န့ၣ်လီၤ. လၢတၢ်န့ၣ်အဃိကဲထီၣ်ဝဲတၢ်ဂ့ၢ်ကီလၢတၢ်ဖံးအီၣ်မၤအီၣ်အဂီၢ်န့ၣ်လီၤ. ဖဲသဝီဖိသ့ၣ်တဖၣ်ဃ့ၢ်ကွံာ်အဆၢကတီၢ်အဝဲသ့ၣ်ပာ်တ့ၢ်ဝဲဒၣ်အဟံၣ်အဃီဒီးအတၢ်ပီးတၢ်လီသ့ၣ်တဖၣ်န့ၣ်လီၤ. သဝီဖိလၢအ အိၣ်လၢခဂ---သဝီသ့ၣ်တဖၣ်စးထီၣ်ဃ့ၢ်ကွံာ်ဝဲဒၣ်ဖဲလါဒံၣ်စဲဘၢၣ် ၃၀ သီ, ၂၀၂၄နံၣ် အနံၤန့ၣ်လီၤ.

ဖဲလါယနူၤအါရံၤ ၁၂ သီ, ၂၀၂၅ နံၣ်အနံၤ, ဟါခီ ၁၀:၀၆ အဆၢကတီၢ်, (ခမရ) (နီၣ်ဂံၢ်-၄၀၅) အိၣ်ဆီလီၤအသးဖဲမဲာ်ပြ့သဝီ အပူၤသ့ၣ်တဖၣ်ခးလီၤဝဲကျိဖးဒိၣ် (၁၂၀) မမ (၁) ဖျၢၣ်န့ၣ်လီၤ. ကျိဖးဒိၣ်ချံတဖျၢၣ်အံၤလီၤတဲာ်ဝဲဒၣ်လၢကန---သဝီပူၤ, အစူခၠီကရူၢ်အဃိဘၣ်ဒိဝဲသဝီဖိ (၁) ဂၤ ဒီးဘၣ်ဟးဂီၤဝဲဟံၣ် (၁) ဖျၢၣ်န့ၣ်လီၤ.

ဖဲလါယနူၤအါရံၤ ၁၇ သီ, ၂၀၂၅ နံၣ်အနံၤန့ၣ်တၢ်ဒုးကဲထီၣ်ဝဲလၢ SAC သုးဖိလၢအအိၣ်ဖဲမဲာ်ပြ့သုးကလၢၤဒီး KNLA အဘၢၣ် စၢၤအသီတဘျီဖဲဘဆ---သဝီချၢန့ၣ်လီၤ. ဖဲတၢ်ဒုးဝံၤအလီၢ်ခံန့ၣ် SAC ဟဲခးလီၤတၢ်ဒီးကဘီယူၤဖဲတၢ်လီၢ်လၢအဘူးဒီးတၢ်ဒုး တၢ်ယၤအလီၢ်န့ၣ်လီၤ. ဖဲဟါခီ ၃း၂၀ အဆၢကတီၢ်ကဘီယူၤဒုးသုးတဘ့ၣ်ဟဲတ့ၢ်လီၤဝဲမ့ၣ်ပိၢ်တဖျၢၣ်န့ၣ်လီၤ. ဖဲဟါခီ ၃း၂၄ အဆၢကတီၢ်ဟဲတ့ၢ်လီၤကဒီးဝဲမ့ၣ်ပိၢ် (၅) ဖျၢၣ်န့ၣ်လီၤ. အါန့ၢ်အန့ၣ်ကဘီယူၤဒုးသုးဟဲခးလီၤဝဲကျိအီၣ်လံၢ်ကၢၣ်(၂) ဘျီဖဲဟါ လီၤခီ ၃း၂၈ ဒီး ၃း၃၂ အဆၢကတီၢ်န့ၣ်လီၤ. ဝံၤအလီၢ်ခံဖဲဟါလီၤခီ ၃း၃၆ အဆၢကတီၢ်ကဘီယူၤကွံာ်လီၤဝဲမ့ၣ်ပိၢ်အသီတဖျၢၣ် န့ၣ်လီၤ. မ့ၣ်ပိၢ်ခဲလၢာ် (၇) ဖျၢၣ်န့ၣ်လီၤတဲာ်ဝဲဖဲဘဆ---သဝီချၢန့ၣ်လီၤ.

အါန့ၢ်အန့ၣ်ဖဲဟါလီၤခီ ၆း၅၆ အဆၢကတီၢ်, သုးဖိလၢအအိၣ်ဖဲမဲာ်ပြ့သုးကလၢၤသ့ၣ်တဖၣ်ခးလီၤဝဲကျိဖးဒိၣ် (၁၂၀ မမ) (၁) ဖျၢၣ်ဒီးကျိဖးဒိၣ်အံၤလီၤတဲာ်ဖဲ ဘဒ---သဝီချၢ, တၤအုးခံကရူၢ်, ဘံလ့ကီၢ်ဆၣ်န့ၣ်လီၤ. ဖဲဟါလီၤခီ ၇း၃၁ အဆၢကတီၢ်အဝဲသ့ၣ် ခးလီၤကဒီးကျိဖးဒိၣ် (၁၂၀ မမ) (၁) ဖျၢၣ်ဒီးကျိဖးဒိၣ်အံၤလီၤတဲာ်ဘူးဒီးသီခါဖၠၣ်မဲာ်ညါဖဲအမ---သဝီ, အဆူးခၠီကရူၢ်န့ၣ်လီၤ. ကျိဖးဒိၣ်အံၤဘၣ်ဟးဂီၤဝဲသီခါဖၠၣ်အတြဲၤ, ထံအီဒၢဖးဒိၣ်, တၢ်ဘါလီၢ်စီဆှံအပျဲၢ်စီၤခိၣ်ဒီးဘၣ်ဟးဂီၤစ့ၢ်ကီးဝဲစီၤသ---အဟံၣ် ခိၣ်ဒီးဟံၣ်ဒူၣ်ကပၤန့ၣ်လီၤ. ဖဲဟါခီ ၈း၀၀ အဆၢကတီၢ်န့ၣ်ကဘီယူၤဟဲတ့ၢ်လီၤဝဲမ့ၣ်ပိၢ်(၂) ဖျၢၣ်န့ၣ်လီၤ. မ့ၣ်ပိၢ်အံၤလီၤတဲာ်ဖဲ အစ---သဝီကျဲဖီခိၣ်, မဲပြံးကရူၢ်ဒီးဘၣ်ဒိဝဲအူ က---လၢအသးနံၣ်အိၣ်ဝဲ (၆၅) နံၣ်တဂၤအဟံၣ်န့ၣ်လီၤ.

ဖဲလါယနူၤအါရံၤ ၁၉ သီ, ၂၀၂၅ နံၣ်အနံၤန့ၣ်, SAC (ခမရ) (နီၣ်ဂံၢ်- ၄၀၅) လၢအအိၣ်ဆီလီၤအသးဖဲမဲာ်ပြ့သုးကလၢၤသ့ၣ် တဖၣ်ခးလီၤဝဲကျိဖးဒိၣ် (၁၂၀ မမ) (၁) ဖျၢၣ်ဖဲ ၉း၂၈ အဆၢကတီၢ်ဒီးကျိဖးဒိၣ် (၁၂၀ မမ) တဖျၢၣ်ဖဲ ၁၀း၁၁ အဆၢကတီဒီး အဂၤတဖျၢၣ်ဖဲ ၁၂း၂၂ အဆၢကတီၢ်န့ၣ်လီၤ. ကျိဖးဒိၣ်တဖျၢၣ်လီၤတဲာ်ဘူးဒီးစီၤလ---လၢအသးနံၣ်အိၣ် (၂၈) နံၣ်တဂၤ အစံာ်ပျီဒဲဒီးဘၣ်ဟးဂီၤဝဲကိၤ မ---လၢအသးနံၣ်အိၣ် (၂၈) နံၣ်တဂၤအဟံၣ်ခိၣ်ဒုးန့ၣ်လီၤ. ဖဲဟါလီၤခီ ၅း၀၀ အဆၢကတီၢ်, (ခမရ) (နီၣ်ဂံၢ်- ၄၀၅) လၢအအိၣ်သူၣ်လီၤအသးဖဲမဲာ်ပြ့သုးကလၢၤသ့ၣ်တဖၣ်ခးလီၤကဒီးဝဲကျိဖးဒိၣ် (၁၂၀ မမ) (၃) ဖျၢၣ်ဆူ ဘဃ---သဝီ, အဆူးခၠီကရူၢ်န့ၣ်လီၤ.

လါယနူၤအါရံၤ ၂၀၂၅ နံၣ်, SAC  ဒြိခးလီၤတၢ်ဖဲတဂ့ၤလီကရူၢ်ဒီးတၤအုးခံကရူၢ်

ဖဲလါယနူၤအါရံၤ ၁၆ သီ, ၂၀၂၅ နံၣ်အနံၤ, ဟါခီ ၄း၄၀ အဆၢကတီၢ် SAC (Kamikaze) ဒြိလၢအဘၣ်တၢ်သ့ၣ်ညါအီၤဒံးအ မ့ၢ်ဒြိတူၢ်သံသးဟဲလီၤတဲာ်မၤဟးဂီၤတၢ်ဖဲဘဧ---ကၠိဟီၣ်ကဝီၤပူၤဖဲ ဘဧ---သဝီ, တဂ့ၤလီကရူၢ်, ဘံလ့ကီၢ်ဆၣ်ဒီးဘၣ်ဟးဂီၤဝဲ ကၠိတၢ်သူၣ်ထီၣ်န့ၣ်လီၤ. ကၠိခိၣ်ဒုး, (မျက်နှာကြပ်), ပဲတြီမဲာ်ထံကလၤသ့ၣ်တဖၣ်ဟးဂီၤဝဲဒၣ်န့ၣ်လီၤ. သဝီဖိသ့ၣ်တဖၣ် နာ်ဝဲလၢဒြိအံၤမ့ၢ်ဒၣ် SAC အဒြိခီဖျိအဝဲသ့ၣ်နာ်ဝဲလၢကလုာ်ဒူၣ်ဖီၣ်စုကဝဲကရူၢ်အဂၤသ့ၣ်တဖၣ်န့ၣ်တအိၣ်ဒီးဒြိဝဲအံၤဘၣ်န့ၣ် လီၤ. ဖဲဟါလီၤခီ ၄း၄၂ အဆၢကတီၢ်ဒြိဟဲတ့ၢ်လီၤဝဲမ့ၣ်ပိၢ်တဖျၢၣ်ဘူးဒီးကၠိတၢ်သူၣ်ထီၣ်န့ၣ်လီၤ. ဖဲဒြိဟဲခးလီၤတၢ်အဆၢကတီၢ် န့ၣ်ဘၣ်ဝဲဖဲဟါလီၤခီ ၃း၀၀ ဖဲကၠိပျၢ်အဆၢကတီၢ်အဃိပှၤတဘၣ်ဒိဘၣ်ထံးနီတဂၤဘၣ်န့ၣ်လီၤ.

သဝီဖိလၢအအိၣ်ဖဲ ဘဧ---သဝီသ့ၣ်တဖၣ်အိၣ်က့ၤလၢသဝီပူၤတဘူၣ်လၢၤဘၣ်ခီဖျိဒြိခးလီၤတၢ်အဃိန့ၣ်လီၤ. လၢတၢ်န့ၣ်အဃိ သဝီဖိသ့ၣ်တဖၣ်ကဘၣ်ဃ့ၢ်အိၣ်ကဒုက့ၤဆူကစၢၢ်ခိၣ်ကလိကျါဒီးထံခံကွာ်စိးလၢတၢ်ဘံၣ်တၢ်ဘၢအဂီၢ်န့ၣ်လီၤ. ဖဲဒြိခးလီၤတၢ် ဝံၤအလီၢ်ခံကၠိဖိလၢအအိၣ်ဖဲအဧ---သဝီသ့ၣ်တဖၣ်တထီၣ်ဘၣ်ကၠိလၢၤဘၣ်ခီဖျိကၠိသရၣ်သ့ၣ်တဖၣ်ပျံၤတၢ်ဒီးသိၣ်လိတၢ်တ ဘူၣ်လၢၤဘၣ်အဃိန့ၣ်လီၤ. မိၢ်ပၢ်သ့ၣ်တဖၣ်စ့ၢ်ကီးအသးတဆူၣ်လၢကဆှၢအဖိအလံၤဆူကၠိဘၣ်န့ၣ်လီၤ. လၢတၢ်န့ၣ်အဃိ ဘဧ---ကၠိအံၤဘၣ်အိၣ်ပတုာ်ကွံာ်အသးန့ၣ်လီၤ. ဖဲလါဖ့ၤဘြူၤအါရံၤ ၂၀၂၁ နံၣ်, သုးဟံးန့ၢ်ဆူၣ်ထံကီၢ်တၢ်စိတၢ်ကမီၤဝံၤအလီၢ် ခံန့ၣ် ဘဧ---ကၠိအံၤဘၣ်တၢ်ဘျးစဲတီခိၣ်ရိၣ်မဲအီၤလၢကညီကူၣ်သ့ဆဲးလၤဝဲၤကျိၤ (KECD) ဒီးကၠိအံၤအိၣ်တုၤ (၈) တီၤန့ၣ်လီၤ. ကၠိအံၤအိၣ်ပတုာ်ဃာ်အသးလၢလါယနူၤအါရံၤဒီတလါအတီၢ်ပူၤန့ၣ်လီၤ.

ဖဲလါယနူၤအါရံၤ ၃၁ သီ, ၂၀၂၅ နံၣ်အနံၤန့ၣ်, SAC (Kamikaze) ဒြိတူၢ်သံသး (၆) ဘ့ၣ်ဟဲကွံာ်လီၤမၤဟးဂီၤတၢ်ဖဲ ဘဂ---တၢ်လီၢ်, ဘဟ---သဝီ, တၤအုးခံကရူၢ်, ဘံလ့ကီၢ်ဆၣ်န့ၣ်လီၤ. ဒြိတူၢ်သံသး (၃) ဘ့ၣ်ပိၢ်ဖးထီၣ်ဖဲသဝီပူၤန့ၣ်လီၤ. ဒြိအဂၤ (၃) ဘ့ၣ်လီၤတဲာ်ဖဲသဝီချၢစံာ်ပျီပူၤဒီးတပိၢ်ဖးထီၣ်ဘၣ်န့ၣ်လီၤ.

ဖဲဂီၤခီ ၆း၅၃ အဆၢကတီၢ်, SAC ဒြိတူၢ်သံသးတဘ့ၣ်လီၤတဲာ်ပိၢ်ဖးထီၣ်ဝဲဖဲသီခါဖၠၣ်တၢ်ပျီပူၤလၢအဘူးဒီးကၠိလၢအအိၣ်ဖဲဘဂ---တၢ်လီၢ်န့ၣ်လီၤ. လၢတၢ်န့ၣ်အဃိသဝီဖိသ့ၣ်တဖၣ်ဘၣ်ပျံၤဘၣ်ဖုးတၢ်န့ၣ်လီၤ. အါန့ၢ်အန့ၣ်ဖဲဂီၤခီ ၆း၅၈ အဆၢကတီၢ်ဒြိ (၂) ဘ့ၣ်ပိၢ်ဖးထီၣ်ဝဲဖဲ ဘဂ---တၢ်လီၢ်, ဘဟ---သဝီပူၤလၢယံၤဒီးသဝီဖိအဟံၣ်အဃိတဘၣ်ဒိဘၣ်ထံးသဝီဖိနီတဂၤဘၣ်န့ၣ်လီၤ. ဒ်လဲၣ်ဂ့ၤဂ့ၤသဝီဖိသ့ၣ်တဖၣ်ဘၣ်ကိၢ်ဘၣ်ဂီၤဒီးဘၣ်ပျံၤဘၣ်ဖုးတၢ်အသီတဘျီကဒီးန့ၣ်လီၤ. လၢတၢ်န့ၣ်အဃိသဝီဖိသ့ၣ်တ ဖၣ်ကဘၣ်လဲၤမံဝဲလၢသဝီချၢဖဲအဝဲသ့ၣ်အဒဲပူၤဖဲမုၢ်နၤခါအဆၢကတီၢ်ဒီးဟဲက့ၤဝဲလၢသဝီပူၤဖဲမုၢ်ဆါခီအဆၢကတီၢ်န့ၣ်လီၤ. ဒြိ (၂) ဘ့ၣ်လီၤတဲာ်ဖဲသဝီချၢဖဲသဝီဖိအစံာ်ပျီပူၤဒီးတပိၢ်ဖးထီၣ်ဘၣ်န့ၣ်လီၤ. ဖဲဟါလီၤခီ ၄း၀၀ အဆၢကတီၢ် ဒြိအသီတ ဘ့ၣ်ဟဲလီၤတဲာ်ဖဲသဝီချၢဖဲသဝီဖိအစံာ်ပျီပူၤဒီးတပိၢ်ဖးထီၣ်ဘၣ်န့ၣ်လီၤ. ဒ်တၢ်ပာ်ဖျါထီၣ်ဝဲအသိး, ခီဖျိ SAC ပညိၣ်ခးလီၤ ဝဲကၠိတၢ်သူၣ်ထီၣ်အဃိမိၢ်ပၢ်သ့ၣ်တဖၣ်ဆှၢက့ၤအဖိလၢကၠိတဘူၣ်လၢၤဘၣ်ခီဖျိအဝဲသ့ၣ်ဘၣ်ယိၣ်ဝဲလၢတၢ်ကခးလီၤတၢ်ခါဆူ မဲာ်ညါဒံးန့ၣ်လီၤ.

လါဖ့ၤဘြူၤအါရံၤ ၂၀၂၅ နံၣ်, SAC ခးလီၤအါထီၣ်တၢ်ဒီးကဘီယူၤဖဲအစူခၠီကရူၢ်, တဂ့ၤလီကရူၢ်းဒီးရွ့ၣ်လီၢ်အ့ကရူၢ်

ဖဲလါဖ့ၤဘြူၤအါရံၤ ၇ သီ, ၂၀၂၅ နံၣ်အနံၤ, ဖဲဂီၤခီ ၂း၀၀ နၢ်ရံၣ်ဒီး ၃း၃၀ အဆၢကတီၢ်, SAC တ့ၢ်လီၤအါထီၣ်ဝဲမ့ၣ်ပိၢ် (၆) ဖျၢၣ်ဆူအစူခၠီကရူၢ်ဒီးရွ့ၣ်လီအ့ကရူၢ်, ဘံလ့ကီၢ်ဆၣ်န့ၣ်လီၤ. လၢတၢ်ခးလီၤတၢ်အဃိမ့ၣ်ပိၢ် (၃) ဖျၢၣ်လီၤတဲာ်ဖဲ ဘဧ---သဝီ, ရွ့ၣ်လီအ့ကရူၢ်ဒီးဘၣ်ဟးဂီၤဝဲစီၤန---လၢအသးနံၣ်အိၣ် (၄၃) နံၣ်တဂၤအဟံၣ်ဒီးစီၤဝ---လၢအသးနံၣ်အိၣ် (၂၉) နံၣ်တဂၤအဟံၣ်န့ၣ်လီၤ. ဟံၣ်ခိၣ်ဒုး, တၢ်ဒူၣ်ကပၤ, ဒီးဟံၣ်တၢ်လၢ်ခိၣ်သ့ၣ်တဖၣ်ဘၣ်ဟးဂီၤဝဲန့ၣ်လီၤ. ပှၤတဘၣ်ဒိနီတ ဂၤဘၣ်ခီဖျိအဝဲသ့ၣ်တမံဝဲလၢဟံၣ်ပူၤဘၣ်စးထီၣ်လၢလါယနူၤအါရံၤ ၂၀၂၄ နံၣ်ခီဖျိလၢကဘီယူၤခးလီၤဝဲ ဒူသဝီသ့ၣ်တ ဖၣ်န့ၣ် လီၤ.

မ့ၣ်ပိၢ် (၇) ဖျၢၣ်န့ၣ်လီၤတဲာ်ဖဲအစူခၠီကရူၢ်ပူၤန့ၣ်လီၤ. ကျိဖးဒိၣ်တဖျၢၣ်လီၤတဲာ်ဖဲကၠိမဲာ်ညါဖဲ အမ---သဝီဒီးဘၣ်ဟးဂီၤဝဲကၠိ သရၣ်ဟံၣ်ဒွဲဒီးကၠိတၢ်သူၣ်ထီၣ်န့ၣ်လီၤ. မ့ၣ်ပိၢ် (၂) ဖျၢၣ်လီၤတဲာ်ဖဲ အမ---သဝီပူၤဘၣ်ဆၣ်သဝီဖိတအိၣ်ဖဲသဝီပူၤနီတဂၤ ဘၣ်န့ၣ်လီၤ. လၢတၢ်န့ၣ်အဃိတၢ်ဟးဂူာ်ဟးဂီၤဒီးတၢ်ဘၣ်ဒိဘၣ်ထံးတအိၣ်နီတမံၤဘၣ်န့ၣ်လိၤ. မ့ၣ်ပိၢ်လၢအိၣ်တ့ၢ် (၄) ဖျၢၣ်အံၤလီၤတဲာ်ဖဲအစူခၠီကရူၢ်ပူၤဖဲ အမ---သဝီချၢဘၣ်ဆၣ်တဒုးအိၣ်ထီၣ်တၢ်ဟးဂူာ်ဟးဂီၤဒီးတၢ်ဘၣ်ဒိဘၣ်ထံးနီတ မံၤ ဘၣ်န့ၣ်လီၤ.

ဖဲလါဖ့ၤဘြူၤအါရံၤ ၉ သီ, ၂၀၂၅ နံၣ်အနံၤ, ဖဲ ၁၂း၄၇ အဆၢကတီၢ်, SAC ကဘီယူၤဒုးသုးတဘ့ၣ်ဟဲတ့ၢ်လီၤဝဲမ့ၣ်ပိၢ် (၅၀၀) (၂) ဖျၢၣ်ဆူ ဘဧ---သဝီ, တဂ့ၤလီကရူၢ်, ဘံလ့ကီၢ်ဆၣ်န့ၣ်လီၤ. မ့ၣ်ပိၢ်အံၤလီၤတဲာ်ဖဲသီခါဖၠၣ်ကရၢၢ်ပူၤဒီးဘၣ်ဟးဂီၤဝဲသီခါဖၠၣ် (၃) ဖျၢၣ်, ဘၣ်ဟးဂီၤဝဲသဝီဖိဟံၣ်ဒီးဘၣ်ဟးဂီၤဝဲဟံၣ် (၄၃) ဖျၢၣ်ခိၣ်ဒုးဒီးတၢ်ဒူၣ်ကပၤန့ၣ်လီၤ. မ့ၣ်ပိၢ်အက့သ့ၣ်တဖၣ်ဘၣ်ဟး ဂီၤစ့ၢ်ကီးတၢ်သူၣ်ထီၣ် (၃) ဖျၢၣ်ဖဲသီခါဖၠၣ်ကရၢၢ်ပူၤန့ၣ်လီၤ. ဘၣ်ဒိစ့ကီးသီခါ(၂) ပါန့ၣ်လီၤ. သီခါအကျါတပါန့ၣ်ဘၣ် ဒိဝဲဖဲအစုညါခိၣ်ဒီးအဝဲတပါဘၣ်ဒိဝဲဖဲအဟၢဖၢန့ၣ်လီၤ. အဝဲသ့ၣ်ဒိးန့ၢ်ဘၣ်ဝဲတၢ်ကူစါယါဘျါဖဲသီခါဖၠၣ်န့ၣ်လီၤ. တၢ်ဖံးအီၣ်မၤ အီၣ်အလီၢ်အါတီၤဘၣ်ဟးဂီၤဝဲန့ၣ်လီၤ. ဘဧ---သဝီဖိသ့ၣ်တဖၣ်တဘၣ်ဒိဘၣ်ထံးနီတဂၤဘၣ်ခီဖျိလၢအဝဲသ့ၣ်ဃ့ၢ်ထီၣ် ဆိဝဲဖဲ SAC ခးလီၤတၢ်လၢသဝီပူၤဖဲ လါယနူၤအါရံၤ ၂၀၂၅ နံၣ်ဝံၤအလီၢ်ခံန့ၣ်လီၤ.