တၢ်ကဲထီၣ်သးအကလုာ်

တၢ်ခးလီၤနါစိၤကျိဖးဒိၣ် [တၢ်သံတၢ်ပှၢ် ဒီး တၢ်ဘၣ်ဒိဘၣ်ထံး]

တၢ်ကဲထီၣ်သးမုၢ်နံၤမုၢ်သီ

လါနိၣ်ဝ့ဘၢၣ် ၂၁ သီ, ၂၀၂၄ နံၣ်

တၢ်ကဲထီၣ်သးတၢ်လီၢ်တၢ်ကျဲ (သဝီ, ကရူၢ်, ကီၢ်ဆၣ်, ကီၢ်ရ့ၣ်)

တၢ်သူၣ်အီၣ်ဖျးအီၣ်အလီၢ်တတီၤလၢအဘူးဒီး အ--- သဝီ [ဘၣ်တၢ်သ့ၣ်ညါအီၤစ့ၢ်ကီးလၢ ခ--- သဝီ], ကီၢ်သ့ဒၢ (ရေသိုးကြီး) ကရူၢ်, ထီတထူၣ်ကီၢ်ဆၣ်, တီအူကီၢ်ရ့ၣ်

ၦၤလၢအတူၢ်ဘၣ်တၢ်တဂၤအဂ့ၢ်အကျိၤ

မံၤ

စီၤ ဂ---

နီၢ် ဃ---

သးနံၣ်

အနံၣ် (၃၀) ဘျဲၣ်

(၅၅) နံၣ်

မုၣ်/ ခွါ

ခွါ

မုၣ်

ကလုာ်

ကညီ

ကညီ

ထီၣ်ပှၢ် / သဘျ့  

ထီၣ်ပှၢ်

ထီၣ်ပှၢ်

တၢ်ဖံးတၢ်မၤ

တၢ်သူၣ်တၢ်ဖျး

တၢ်သူၣ်တၢ်ဖျး

တၢ်ဘူၣ်တၢ်ဘါ

ခရံာ်ဖိ

ခရံာ်ဖိ

တၢ်ဟံးမူဒါ/ လီၢ်လၤ

သဝီဖိ

သဝီဖိ

အိၣ်ဆိးဒူသဝီ

င--- သဝီ, ဒ့လိာ်ကရူၢ်, ထီတထူၣ်ကီၢ်ဆၣ်, တီအူကီၢ်ရ့ၣ်

က--- သဝီ, ကီၢ်သ့ဒၢကရူၢ်, ဒီၣ်ဖါခိၣ်ကီၢ်ဆၣ်, တီအူကီၢ်ရ့ၣ်

ၦၤလၢအမၤအၢပယွဲတၢ်တဂၤအဂ့ၢ်အကျိၤ

မံၤ                    

လီၢ်လၤ

သုးကျိၤ/ သုးရ့ၣ် / သုးတြိၤ

အိၣ်သူၣ်လီၤသးလီၢ်ကျဲ /သုးကလၢၤ

အခိၣ်အမံၤဒီးလီၢ်လၤ

တသ့ၣ်ညါ

တသ့ၣ်ညါ

SAC [ထံကီၢ်တၢ်ပၢတၢ်ပြး ကီၣ်ကးကရၢ] သုးဖိတဖၣ် လၢ အအိၣ်လၢ [သုးဟူးဂဲၤဝဲၤ လီၢ်ခိၣ်သ့ၣ် (စကခ)] နီၣ်ဂံၢ် (၂၀) အတၢ်ပၢဆှၢရဲၣ်ကျဲၤဖီ လာ်

• ကီၢ်စိခိၣ် [သစ်စေးတောင်] သုးကလၢၤ [ကီၢ်သ့ဒၢကရူၢ်]
• ပၠီၤသိၤသုးကလၢၤ [ကျ့ၣ်လိာ် မုၢ်နုာ်ကရူၢ်, ဒီၣ်ဖါခိၣ်ကီၢ်ဆၣ်]
• ဘီကလံၣ်သုးကလၢၤ [ဘီကလံၣ် ဝ့ၢ်, ထီတထူၣ်ကီၢ်ဆၣ်]

  ခမရ [ခီၣ်ချ့သုးရ့ၣ်] သုးခိၣ် စ့ၤယၤလ့ [ ခမရ နီၣ်ဂံၢ် လၢတၢ်တသ့ၣ် ညါ, အိၣ်ဆီလီၤသးဖဲ ဘီကလံၣ် သုးကလၢၤ]

၁. ၡဲပၠးၦၤနဟံးန့ၢ်တၢ်ကဲထီၣ်သးတခါအံၤ တဆီဘၣ်တဆီတက့ၢ်.

တၢ်ကဲထီၣ်သးအနံၤဝံၤလီၢ်ခံ, လီၢ်ကဝီၤ [ကညီဒီကလုာ်စၢဖှိၣ်ကရၢ (KNU)] ပှၤဘၣ်မူဘၣ်ဒါတဖၣ် တဲဘၣ်ယၤ [ကညီဂ့ၢ်ဝီ ခွဲးယာ်ကရူၢ် (KHRG) ပျီပူၤပှၤမၤတၢ်ဖိ] ဘၣ်ဃးဒီးတၢ်ကဲထီၣ်သးအဂ့ၢ်န့ၣ်လီၤ. တၢ်န့ၣ်ဝံၤအလီၢ်ခံ, ယဆဲးကျိးဒီး စီၤစ---, လၢအမ့ၢ်သဝီသးပှၢ်တဂၤလၢအအိၣ်လၢ က--- သဝီ, ဒီး ယမၤတၢ်ထံၣ်လိာ်သံကွၢ်ဒီး အီၤဘၣ်ဃးတၢ်ကဲထီၣ်သးအဂ့ၢ်အံၤန့ၣ် လီၤ. တကးဒံးဘၣ်, ယမၤစ့ၢ်ကီးတၢ်ထံၣ်လိာ်သံကွၢ်ဒီးသဝီဖိလၢအမံၤမ့ၢ် စီၤဆ---, လၢအထံၣ်ထွဲတၢ်ကဲထီၣ်သးတဂၤန့ၣ် လီၤ.

၂. ကွဲးနီၣ်ၦၤလၢဟ့ၣ်တၢ်ဂ့ၢ်အံၤတဂၤစုာ်စုာ်သ့ၣ်ညါ တၢ်ဂ့ၢ်အံၤအမ့ၢ်အတီလၢကျဲဒ်လဲၣ်.

တၢ်ကဲထီၣ်သးအံၤဘၣ်တၢ်မၤလီၤတံၢ်အီၤလၢ စီၤစ--- သဝီသးပှၢ်လၢအအိၣ်ဖဲ က--- သဝီ, ဒီး လီၢ်ကဝီၤသဝီဖိတဂၤ လၢအမ့ၢ်, စီၤဆ---, ပှၤလၢအထံၣ်ထွဲတၢ်ကဲထီၣ်သးအံၤန့ၣ်လီၤ. [စီၤစ--- မ့ၢ်ပှၤတဂၤလၢကရၢကရိ ဒီး ရဲၣ်ကျဲၤ တၢ်လဲၤတၢ်က့ၤလၢ ပှၤတူၢ်ဘၣ်တၢ်သ့ၣ်တဖၣ်အံၤအဂီၢ်လၢကလဲၤဆူတၢ်ဆါဟံၣ် လၢတီအူဝ့ၢ်ပူၤအဂီၢ်န့ၣ်လီၤ.   စီၤဆ--- မ့ၢ်ပှၤလၢအထံၣ်ထွဲတၢ်တ ဂၤမ့ၢ်လၢဖဲတၢ်ကဲထီၣ်သးအဆၢကတီၢ်န့ၣ်, ဘၣ်လၢအဝဲဖံးမၤ တၢ်ဖဲသဲးကျီးပူၤအဃိန့ၣ်လီၤ].

ပာ်ဖျါတၢ်ကဲထီၣ်သးအဂ့ၢ်အကျိၤလၢလၢပှဲၤပှဲၤတက့ၢ်.

ဖဲလါနိၣ်ဝ့ဘၢၣ် ၂၁ သီ, ၂၀၂၄ နံၣ်, ဖဲ ၁၁ နၣ်ရံၣ် အဆၢကတီၢ်,  SAC [ထံကီၢ်တၢ်ပၢတၢ်ပြးကီၣ်ကးကရၢ] သုးဖိတဖၣ်လၢအအိၣ်လၢ သ့ၣ်စ့တီၤသုးကလၢၤ, ပၠီၤသိၤသုးကလၢၤ ဒီး ဘီကလံၣ်သုးကလၢၤ, လၢအအိၣ်လၢ စကခ [သုးဟူးဂဲၤဝဲၤလီၢ်ခိၣ်သ့ၣ်] နီၣ်ဂံၢ် (၂၀), တၢ်ပၢဖီလာ်တဖၣ် ခးဝဲကျိဖးဒိၣ် (၁၂၀) မမ ဒီး (၆၀) မမ တဆံဖျၢၣ်ဃၣ်ဃၣ်လၢ ကီၢ်သ့ဒၢကရူၢ်, ထီတထူၣ်ကီၢ်ဆၣ်, ဒီး ကျ့ၣ်လိာ်မုၢ်နုာ်ကရူၢ်,  ဒီၣ်ဖါခိၣ်ကီၢ်ဆၣ်, ဖဲတီအူကီၢ်ရ့ၣ် အပူၤန့ၣ်လီၤ. [KHRG  မၤနီၣ်မၤဃါန့ၢ်ဒၣ်ထဲကျိဖးဒိၣ်ချံတဖျၢၣ်ဧိၤ လၢအလီၤတဲာ်ဒီး ပိၢ်ထီၣ်ဖဲ သဲးကျီးပူၤလၢအဘူးဒီး က--- သဝီန့ၣ်လီၤ, ဘၣ်ဆၣ်, ကျိဖးဒိၣ်ချံလၢအဂၤခွံဖျၢၣ်န့ၣ်, အလီၤတဲာ်တၢ်လီၢ်ဒီး အဘၣ်ဒိမနုၤလဲၣ်န့ၣ် တၢ်မၤလီၤတံၢ်အီၤ တန့ၢ်ဘၣ်န့ၣ်လီၤ.]

ဘီကလံၣ်သုးကလၢၤန့ၣ်အိၣ်သူၣ်လီၤအသးဖဲ ဘီကလံၣ်ဝ့ၢ်, ထီတထူၣ်ကီၢ်ဆၣ် အပူၤန့ၣ်လီၤ. သ့ၣ်စ့တီၤသုးက လၢၤန့ၣ် အိၣ်သူၣ်လီၤသးလၢ သ့ၣ်စ့တီၤသဝီ, ကီၢ်သ့ဒၢကရူၢ် အပူၤ ဒီး မ့မ့ၢ် ပၠီၤသိၤသုးကလၢၤန့ၣ် အိၣ်သူၣ်လီၤအသး ဖဲ ပၠီၤသိၤသဝီ, ကျ့ၣ်လိာ်မုၢ်နုာ်ကရူၢ် န့ၣ်လီၤ. လီၢ်ကဝီၤသဝီဖိတဖၣ် တသ့ၣ်ညါဝဲဒၣ်လၢ ဘၣ်မနုၤအဃိ  SAC သုးတဖၣ်န့ၣ် ဘၣ်ခးလီၤ တၢ်လၢ ဟီၣ်ကဝီၤအပူၤလဲၣ်န့ၣ်ဘၣ်လီၤ. [လီၢ်ကဝီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) အပှၤသုးဖိတဖၣ် ဟူးဂဲၤဝဲဖဲ ယ့ၤသိကၠံကရူၢ်န့ၣ်လီၤ. ဖဲပယီၤသုးခးလီၤကျိဖးဒိၣ်အဆၢကတီၢ် အဝဲသ့ၣ်အိၣ်ဖဲ ဟီၣ်ကဝီၤအပူၤန့ၣ် လီၤ].

ကျိဖးဒိၣ်အကျါတဖျၢၣ်လီၤတဲာ်ပိၢ်ဖးထီၣ်ဖဲသဲးကျီးတဘ့ၣ်အပူၤ, လၢအမ့ၢ်သဝီဖိတဂၤလၢ အမံၤမ့ၢ် နီၢ်ဃ---, သးနံၣ် (၅၅) နံၣ်တဂၤအသဲးကျီးပူၤလၢအအိၣ်သူၣ်လီၤအသးဖဲ က--- သဝီ, [ကီၢ်သ့ဒၢကရူၢ်] ဒီး ရှ---သဝီ, [ကျ့ၣ်လိာ်မုၢ်နုာ်ကရူၢ်] အဘၢၣ်စၢၤန့ၣ်လီၤ. ဖဲလၢတၢ်ခးလီၤကျိဖးဒိၣ်အဆၢကတီၢ်ဘၣ်လၢ သဝီဖိ (၆) ဂၤ, ဃုာ်ဒီးနီၢ်ဃ---, မၤတၢ်ဖဲ သဲးကျီးန့ၣ်အပူၤ အဆၢကတီၢ်န့ၣ်လီၤ. သဝီဖိအဂၤတဖၣ်န့ၣ်မ့ၢ် ဝဲ စီၤည--- သးနံၣ် (၅၈) နံၣ်, နီၢ်တ--- သးနံၣ် (၂၃) နံၣ်, စီၤဂ--- သးနံၣ် (၃၀) ဘျဲၣ်, စီၤဆ--- သးနံၣ် (၄၄) နံၣ်, ဒီး စီၤထ--- သးနံၣ် (၅၅) နံၣ်  သ့ၣ်တဖၣ်န့ၣ်လီၤ.  နီၢ်ဃ--- ဒီး စီၤည--- မ့ၢ်ပှၤဒီမိၢ်ဝၤန့ၣ်လီၤ.  နီၢ်တ--- န့ၣ်မ့ၢ်အဝဲသ့ၣ်အဖိမုၣ်န့ၣ်လီၤ. စီၤဂ---, စီၤဆ---, ဒီး စီၤထ---, မ့ၢ်ပှၤမၤတၢ်ဖိလၢအဟဲဒိးလဲ အသးလၢ စီၤည--- ဒီး နီၢ်ဃ--- အအိၣ်န့ၣ်လီၤ. ကျိဖးဒိၣ်အက့အခီသ့ၣ်တဖၣ်ဘၣ်ဝဲ စီၤဂ--- အခီၣ်, အစု ဒီး အကိာ်ဘိသ့ၣ် တဖၣ်န့ၣ်လီၤ. လၢတၢ်န့ၣ်အဃိအဝဲဒၣ် သံကွာ်ဝဲ တကတီၢ်ဃီန့ၣ်လီၤ. မ့မ့ၢ် နီၢ်ဃ--- တခီ ဘၣ်ဒိဝဲအဘိးပာ်, ဒီး အဟၢဖၢ န့ၣ်လီၤ. သဝီဖိလၢအအိၣ်လီၤလွံၢ်ဂၤန့ၣ် တဘၣ်ဒိဘၣ်ထံးဝဲနီတဂၤဘၣ်န့ၣ်လီၤ.  ကျိဖးဒိၣ်အက့အခီတဖၣ်ဖျိး ဘၣ်ဟးဂီၤဝဲ သဲးထူၣ်အါအါဂီၢ်ဂီၢ်န့ၣ်လီၤ.

စီၤဆ---, [လၢအမ့ၢ်ပှၤမၤတၢ်ဖိတဂၤ] ပှၤလၢအထံၣ်ထွဲတၢ်ကဲထီၣ်သးတဂၤ ပာ်ဖျါထီၣ်ဝဲအတၢ်တူၢ်ဘၣ်ဒီး တၢ်လၢအသ ဂၢၢ်ဘၣ်ဝဲတဖၣ်ဒ်အံၤ “အဆိန့ၣ်, ပနၢ်ဟူဝဲကျိဖးဒိၣ်လီၤတဲာ်သီၣ်, ဘၣ်ဆၣ် တၢ်န့ၣ် [ကျိဖးဒိၣ်လၢ အဝဲသ့ၣ်နၢ်ဟူ တၢတၢတဖျၢၣ်] လီၤတဲာ်ပိာ်ဖးထီၣ်ဝဲလၢကျဲဃၢၤတတီၤလၢအစီၤစုာ်ဒီးသဲးကျီးလီၤ. ပပျံၤတၢ်လီၤ. ပကြာ်လီၤသကီးလၢ ဟီၣ်ခိၣ်လိၤ, ဘၣ်ဆၣ် အဝဲ [နီၢ်ဃ---] န့ၣ် ဆ့ၣ်နီၤဒံးဒၣ်လၢသဲးသၣ်ပူၣ်အဃၢၤလီၤ. [...] ဝံၤဘျီ [တစိာ်ဖိဝံၤအလီၢ်ခံ], ကျိဖးဒိၣ်ချံအသီတဖျၢၣ်လီၤတဲာ်ပိၢ်ထီၣ်ဝဲလၢသဲးကျီးပူၤ လၢပဖံးမၤတၢ်အလီၢ်လီၤ. ကျိဖးဒိၣ်ချံအက့အခီတဖၣ်ဖျိးဘၣ်အ [စီၤဂ---] ကိာ်ဘိ, အစု, ဒီး အခီၣ်သ့ၣ်တဖၣ် ဒီး သံကွံာ်ဝဲတကတီၢ်ဃီ န့ၣ်လီၤ. ဖဲလၢကျိဖးဒိၣ်လီၤတဲာ်အဆၢကတီၢ်န့ၣ် [...] တၢ်လီၢ်လၢ [အဘံၣ်အဘၢ] လၢကအိၣ် သဒၢသးလၢ [ကျိဖးဒိၣ်အဂီၢ်] လၢသဲးကျီးပူၤအံၤတအိၣ်နီတလိၣ်ဘၣ်.   [...] ဖဲန့ၣ်အခါယပျံၤတၢ်ဒိၣ်မးလီၤ, ဘၣ်မနုၤအဃိလဲၣ်န့ၣ်, လၢယတၢ်အိၣ်မူအပူၤယတသဂၢၢ်ဘၣ်ဒီး တၢ်ကဲထီၣ်သးဒ်အံၤ နီတဘျီဒံးဘၣ်”

ဖဲလၢတၢ်ကဲထီၣ်သးဝံၤအလီၢ်ခံ, စီၤည--- ကိးန့ၢ် သဝီဖိတဖၣ်လၢ က--- သဝီ လၢတၢ်မၤစၢၤအဂီၢ်န့ၣ်လီၤ. တၢ်န့ၣ်ဝံၤအလီၢ်ခံ, လီၢ်ကဝီၤသဝီဖိသ့ၣ်တဖၣ်ကိးန့ၢ်သိလ့ၣ်တခိၣ် လၢအဘၣ်တၢ်ပၢဆှၢအီၤလၢလီၢ်ကဝီၤမုာ်သးမၤကလီကရူၢ် တဖုလၢအအိၣ်ဟဲ န့ၣ်လၢ တီအူဝ့ၢ် [ဒီဖါခိၣ်ကီၢ် ဆၣ်] လၢတၢ်လဲၤတၢ်က့ၤအဂီၢ်, ဒ်သိး ကလဲၤဆှၢပှၤဆါတဖၣ်အံၤဆူ တၢ်ဆါဟံၣ်အဂီၢ်န့ၣ်လီၤ. နီၢ်ဃ--- န့ၣ်ဘၣ်တၢ်ဆှၢအီၤလၢတီ အူတၢ်ဆါဟံၣ်လၢအိၣ်ဖဲတီအူဝ့ၢ်ပူၤ [လၢအဘၣ်တၢ်ပၢဆှၢအီၤလၢSAC], ဒီး ဒိးကူစါယါဘျါအသးဖဲန့ၣ်လီၤ. [အဝဲဒၣ်ဘၣ်ဟ့ၣ်ဝဲအတၢ်လၢာ်ဘူၣ်လၢာ်စ့ၤသ့ၣ်တ ဖၣ်လၢအနီၢ်ကစၢ်ဒၣ်ဝဲန့ၣ်လီၤ].

မ့မ့ၢ် စီၤဂ--- အစိၣ်န့ၣ်ဘၣ်တၢ်က့ၤစိာ်က့ၤအီၤဆူ အဟံၣ်ဖိဃီဖိတဖၣ်အအိၣ်ဖဲ တီအူဝ့ၢ် န့ၣ်လီၤ. [ဖဲတချုးလၢတၢ် ကဲထီၣ်သးဒံးဘၣ်အခါ,] အဝဲသ့ၣ် [စီၤဂ--- ဒီးအဟံၣ်ဖိဃီဖိ] ဘၣ်လဲၤဃ့ၢ်မှံဆူ အ--- [တၢ်ဘူၣ်တၢ်ဘါလီၢ်], လၢအိၣ်ဖဲ ကဝီၤဒ့ဟ--- ဖဲတီၢ်အူဝ့ၢ်, ဒ်သိးကဃုထံၣ်န့ၢ်တၢ်အိၣ်ကဒုအလီၢ်အဂီၢ်န့ၣ်လီၤ. အဝဲသ့ၣ်အိၣ်ဆိးက့ၤလၢအ ကစၢ်သဝီ [င---သဝီ] တဘူၣ်လၢၤဘၣ် ခီဖျိလၢ စုကဝဲၤတၢ်ဘၣ်ဂံာ်ဂူာ်တဖၣ် အဃိန့ၣ်လီၤ. စီၤဂ--- အဟံၣ် ဖိဃီဖိတဖၣ်ခူၣ်လီၤက့ၤအစိၣ် ဖဲတၢ်သွၣ်ခိၣ်လၢအအိၣ်ဖဲတီအူဝ့ၢ်ပူၤန့ၣ်လီၤ. စီၤည---, လၢအမ့ၢ် စီၤဂ---, တၢ်မၤအခိၣ် တဂၤန့ၣ်, ရဲၣ်ကျဲၤ [ဒီးထုးထီၣ်စ့လၢ] တၢ်ခူၣ်လီၤဘါဘၢအဂီၢ်အံၤန့ၣ်လီၤ. စီၤဂ---  အမါလၢအမ့ၢ် နီၢ်ဒ--- သးနံၣ် (၃၅) နံၣ် တဂၤအံၤဘၣ်အိၣ်လီၤတဲာ်က့ၤဒီးအဖိ သၢဂၤန့ၣ်လီၤ.

မ့ၢ်လၢ SAC ခးလီၤကျိဖးဒိၣ်ဒီး ဘၣ်သံကွံာ် စီၤဂ--- အံၤအဃိ အဟံၣ်ဖိဃီဖိတဖၣ်ဘၣ်သဂၢၢ်ဝဲဒီး   တၢ်လုၢ်အီၣ်နီၢ်ခိသး သမူအတၢ်ဂ့ၢ်ကီတဖၣ်အါထီၣ်ဝဲန့ၣ် လီၤ. စီၤဂ--- အဖိသၢဂၤန့ၣ်မ့ၢ် အဖိမုၣ်သးနံၣ် (၁၁) နံၣ်တဂၤ, အနံၣ် (၁၀) တဂၤ ဒီး ဖိခွါဖိသးနံၣ် (၆)နံၣ်တဂၤန့ၣ်လီၤ. အဖိမုၣ် လၢသးနံၣ်အိၣ် (၁၁) နံၣ်တဂၤန့ၣ်, ဖဲအလိၣ်ကွဲအဆၢကတီၢ်လဲၤသးတလံာ် တပျာ်ဒီး အစု ကၢ်ကွံာ်အဃိ ဘၣ်လဲၤကူစါယါဘျါအသးန့ၣ်လီၤ. အဖိခွါလၢအသးနံၣ်အိၣ် (၆) နံၣ်တဂၤစ့ၢ်ကီး ဘၣ်လဲၤဒိးကူ စါအသးကိးလါဒဲး ခီဖျိအတၢ်အိၣ်ဆူၣ်အိၣ်ချ့အတၢ်ဂ့ၢ်ကီ လၢ [တၢ်တသ့ၣ်ညါဘၣ်] အဃိ န့ၣ်လီၤ. အဝဲဘၣ်လဲၤဆီတလဲ အသွံၣ်တလါတဘျီကိးလါဒဲးန့ၣ်လီၤ. စီၤဂ--- အဟံၣ်ဖိဃီဖိသ့ၣ်တဖၣ် [ဖဲလၢ စီၤဂ---သံကွံာ်အလီၢ်ခံ] အဝဲသ့ၣ်တဒိးန့ၢ်ဘၣ် တၢ်ဆီၣ်ထွဲမၤစၢၤနီတမံၤဘၣ်. လီၢ်ကဝီၤပှၤဘၣ်မူ ဘၣ်ဒါတဖၣ် ဒီး သဝီဖိသ့ၣ်တဖၣ်ဃ့ထီၣ်ဝဲ KHRG  လၢကဃုန့ၢ်တၢ်ဆီၣ်ထွဲ မၤစၢၤလၢတၢ်တိစၢၤမၤစၢၤပှၤဂ့ၢ်ဝီတၢ်လိၣ်ဘၣ်အတၢ်ကရၢကရိ ဒီးပှၤဟ့ၣ်မၤစၢၤတၢ်သ့ၣ်တဖၣ် အအိၣ် လၢဟံၣ်ဖိဃီဖိသ့ၣ် တဖၣ်အံၤအဂီၢ်န့ၣ်လီၤ.

မ့ၢ်ၦၤလၢအတူၢ်ဘၣ်တၢ်တဖၣ် ဟ့ၣ်ၦၤတၢ်ခွဲးတၢ်ယာ်လၢပကသူတၢ်ဂ့ၢ်တၢ်ကျိၤတခါအံၤဧါ, ဟ့ၣ်ၦၤတၢ်ခွဲးတၢ်ယာ်လၢ ပကသူ တၢ်ဂ့ၢ်အံၤလၢကျဲဒ်လဲၣ်.

စီၤစ---, သဝီသးပှၢ် ဒီး စီၤဆ---, သဝီဖိလၢအထံၣ်ထွဲတၢ်ကဲထီၣ်သးတဂၤ အဝဲသ့ၣ်ဟ့ၣ် ကညီဂ့ၢ်ဝီခွဲးယာ်ကရူၢ် (KHRG) အခွဲးလၢကသူဝဲတၢ်ဂ့ၢ်တၢ်ကျိၤသ့ၣ်တဖၣ်အံၤန့ၣ်လီၤ. အဝဲသ့ၣ်အဲၣ်ဒိးဝဲလၢ KHRG ကရၤလီၤဝဲတၢ်ဂ့ၢ်တၢ်ကျိၤ သ့ၣ်တဖၣ်အံၤ ဒီး   တၢ်ဂ့ၢ်ကီသ့ၣ်တဖၣ်လၢ ပှၤတူၢ်ဘၣ်တၢ်အဟံၣ်ဖိဃီဖိ တဖၣ်ဘၣ်သဂၢၢ်ဝဲန့ၣ်လီၤ.