SAC ခးလီၤကျိဖးဒိၣ်အဃိတၢ်သံတၢ်ပှၢ်ဒီးတၢ်ဘၣ်ဒိဘၣ်ထံးအိၣ်ထီၣ်

• လါအ့ဖြ့ၣ် ၁၄ သီ, ၂၀၂၅ - SAC ခးလီၤကျိဖးဒိၣ်ဆူနိၣ်ဖးဒိၣ်ကရူၢ်ပူၤ

ဖဲလါအ့ဖြ့ၣ် ၁၄ သီ, ၂၀၂၅ နံၣ်, ကဘၣ်ဖဲဟါခီ ၄ နၣ်ရံၣ်ဆၢကတီၢ်, SAC ပယီၤသုးခးလီၤဝဲကျိဖးဒိၣ်တဖၣ်ဆူ ကက--- သဝီ, နိၣ်ဖးဒိၣ်ကရူၢ်, တန့ဆါကီၢ်ဆၣ်, ဖၣ်အၣ်ကီၢ်ရ့ၣ်ပူၤ ဒီး ဘၣ်ဒိၣ်ဝဲ စီၤက--- အခီၣ်ဒ့ကိာ်န့ၣ်လီၤ. စီၤက--- စံးဝဲ “ ဖဲမဂီၤန့ၣ်, တၢ်ခးလိာ်သးကဲထီၣ်ဝဲလၢယသဝီပူၤန့ၣ်လီၤ. ဖဲဟါလီၤခီ, ကျိသ့ၣ်တဖၣ်သီၣ်ပတုာ်ဝံၤအလီၢ်ခံအဆၢကတီၢ် ယမိဖီထီၣ်ဝဲမ့ၤ... ဝံၤဒီးအဝဲလဲၤဒုးအီၣ်ကျီၢ်ဆၣ်န့ၣ်လီၤ.” [ဖဲလၢအမိၢ်လဲၤဒုးအီၣ်ကျီၢ်ဆၣ်ဆၢကတီၢ်န့ၣ်] စီၤက--- လဲၤထီၣ်တၢ်ဟးလီၢ်ဝံၤ ဖဲအဝဲ ဟဲက့ၤအဆၢကတီၢ် ကျိဖးဒိၣ်ချံလီၤတဲာ်ဝဲလၢတၢ်ဟးလီၢ်အလီၢ်ခံတဖျၢၣ် ဒီးကျိဖးဒိၣ်က့ဘၣ်ဝဲဒၣ်အခီၣ်ဒ့ကိာ်န့ၣ်လီၤ. ဖဲအဝဲ ဘၣ်ဒိဝံၤဆၢကတီၢ်အဝဲလီၤဃံၤဝဲတဘျီဃီန့ၣ်လီၤ.

စီၤက--- ကူစါယါဘျါအသးဖဲ ကင--- သဝီ, နိၣ်ဖးဒိၣ်ကရူၢ်ပူၤန့ၣ်လီၤ. အဝဲကူစါယါဘျါအသးလၢ ကညီဆူၣ်ချ့မၤစၢၤဝဲၤကျိၤ (KDHW) ကသံၣ်သရၣ်တဂၤအအိၣ် ဒီးအဝဲကူစါယါဘျါစ့ၢ်ကီးအသးလၢ မိၢ်လုၢ်ပၢ်လၢသ့ၣ်ဂံၢ်ဝၣ်စဲသရၣ်အအိၣ်န့ၣ်လီၤ. စီၤက--- ဒီးအဟံၣ်ဖိဃီဖိ ဒိးသဝီဖိတဖၣ်လဲၤဃ့ၢ်အိၣ်ဝဲလၢ ကင--- သဝီန့ၣ်လီၤ. ကျိဖးဒိၣ်ချံတဖျၢၣ်အံၤမ့ၢ်ဝဲ (၁၂၀ မမ) အချံ, ဒီး သဝီဖိတဖၣ်နာ်ဝဲလၢ ပယီၤသုး ခီၣ်ချ့သုးရ့ၣ် (ခမရ) နီၣ်ဂံၢ် - ၅၄၅, အိၣ်ဖဲ ကြုၢ်တု တၢ်လီၢ်သ့ၣ်တဖၣ်ခးလီၤဝဲန့ၣ်လီၤ.

• လါအ့ဖြ့ၣ် ၁၅ သီ, ၂၀၂၅ နံၣ် - SAC ပယီၤသုးခးလီၤကျိဖးဒိၣ်ဆူ နိၣ်ဖးဒိၣ်ကရူၢ်ပူၤ.

ဖဲလါအ့ဖြ့ၣ် ၁၅ သီ, ၂၀၂၅ နံၣ်, ကဘၣ်ဖဲ ဂီၤခီ ၇ နၣ်ရံၣ် ၈ နၣ်ရံၣ်ဆၢကတီၢ်, ပယီၤသုးခးလီၤ (၁၂၀ မမ) ဆူ ကခ--- သဝီ, နိၣ်ဖးဒိၣ်ကရူၢ်ပူၤ ဒီး ဘၣ်သံဝဲဟံၣ်ဖိဃီဖိ (၉) ဂၤ လၢအအိၣ်ဖဲကခ--- သဝီန့ၣ်လီၤ. ဟံၣ်ဖိဃီဖိတဖၣ်အံၤမ့ၢ်ဝဲ ကီၤလၤက လုာ်ဒူၣ်တဒူၣ်န့ၣ်လီၤ.

ကခ--- သဝီသးပှၢ် အူခ--- စံးဝဲ, ဖဲဂီၤခီဆၢကတီၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) သုးဖိတဖၣ်နုာ်လီၤဆူသ ဝီပူၤ ဒီးတဲဘၣ်သဝီဖိတဖၣ်လၢကသုးအသးလၢတၢ်လီၢ်လၢအဂၤတတီၤ... ကျိဖးဒိၣ်တဖၣ်လီၤတဲာ်ဘူး ဒီးသဝီတဘျုးဖျၢၣ်ညါ ဘၣ်ဆၣ်တဘၣ်ပှၤနီတဂၤဘၣ်. ဘၣ်ဆၣ်သနာ်က့, ဖဲဂီၤခီ ၇ နၣ်ရံၣ်ဆၢကတီၢ်, ဟံၣ်ဖိဃီဖိတဒူၣ် [၉ ဂၤ] ကတဲာ်က တီၤထီၣ်သးလၢကဃ့ၢ်ထီၣ်ကွံာ်လၢသဝီပူၤန့ၣ်လီၤ. ဖဲလၢအဝဲသ့ၣ်အိၣ်ဖှိၣ်လၢသိလ့ၣ်တခိၣ်အပူၤဆၢကတီၢ်, ကျိဖးဒိၣ် (၁၂၀ မမ) အချံတဖျၢၣ်လီၤတဲာ်လၢသိလ့ၣ်ပူၤဒီး ဘၣ်သံဝဲပှၤ (၇) ဂၤတဘျီဃီန့ၣ်လီၤ.

ပှၤလၢအသံဝဲတဘျီဃီတဖၣ်မ့ၢ်ဝဲ - ဂ--- (၂၇ နံၣ်), ဃ--- (၃၅ နံၣ်), င--- (၃၂ နံၣ်), စ--- (၂၂ နံၣ်), ဆ--- (၉ နံၣ်), ၡ--- (၇ နံၣ်), ဒီး ည---အဖိမုၣ် (၁၀ လါ). မ့ၢ်လၢ မီၤ တ--- ( ၂၈ နံၣ်) ဒီး ထ--- (၂၇ နံၣ်) တသံၣ်ဒံးဘၣ်အဃိ ပှၤလဲၤ ဆှၢအဝဲသ့ၣ်ဆူ ဖၣ်အၣ်တၢ်ဆါဟံၣ်န့ၣ်လီၤ. ဘၣ်ဆၣ်သနာ်က့ အဝဲသ့ၣ်သံဝဲဒၣ်လၢကျဲန့ၣ်လီၤ. ပှၤခူၣ်လီၤအဝဲသ့ၣ်ဖဲ ကစ--- သဝီ, ဘူးဒီးဖၣ် အၣ်ဝ့ၢ်န့ၣ်လီၤ.

သဝီဖိတဖၣ်ဆိကမိၣ်ဝဲလၢကျိဖးဒိၣ်ချံတဖျၢၣ်အံၤ SAC ပယီးသုးအိၣ်လၢ ကြုၢ်တုတၢ်လီၢ်တဖၣ်ခးလီၤဝဲန့ၣ်လီၤ. ဘၣ်ဆၣ်သ နာ်က့သဝီဖိတဖၣ်တသ့ၣ်ညါလီၤတံၢ်ဝဲလၢ မ့ၢ် ခီၣ်ချ့သုးရ့ၣ် (ခမရ) နီၣ်ဂံၢ် - ၅၄၅ ခးလီၤအီၤဧါ မ့တမ့ၢ် ခီၣ်ချ့သုးရ့ၣ် (ခမရ) နီၣ်ဂံၢ်- ၅၄၆ ခးလီၤအီၤဧါန့ၣ်လီၤ. မ့ၢ်လၢပယီၤသုးရ့ၣ်ခံရ့ၣ်အံၤအိၣ်ဝဲလၢတၢ်လီၢ်ဖဲန့ၣ်တပူၤဃီအဃိန့ၣ်လီၤ. သဝီဖိအိၣ်လၢ ကခ--- သဝီသ့ၣ်တဖၣ်ဘၣ်ဃ့ၢ်ထီၣ်ဝဲလၢအသဝီပူၤန့ၣ်လီၤ.

• လါအ့ဖြ့ၣ် ၁၆ သီ, ၂၀၂၅ နံၣ် - SAC ပယီၤသုးခးလီၤကျိဖးဒိၣ်ဆူ ကြုၢ်တုခံကရူၢ်ပူၤ

ဖဲလါအ့ဖြ့ၣ် ၁၆ သီ, ၂၀၂၅ နံၣ်, ဟါခီ ၄ နၣ်ရံၣ်ဆၢကတီၢ်, SAC ပယီၤသုးခးလီၤကျိဖးဒိၣ်ဆူ ကဂ--- သဝီ, ကြုၢ်တုခံကရူၢ်, တန့ဆါကီၢ်ဆၣ်, ဖၣ်အၣ်ကီၢ်ရ့ၣ်ပူၤ ဒီးဘၣ်ဝဲ စီၤဒ--- ဒီး စီၤန--- ဖဲအဝဲသ့ၣ်ဒိးဝဲသိလ့ၣ်ယီၢ် ဒ်သိးဒီးကလဲၤပှ့ၤတၢ်န့ၣ်လီၤ. သဝီဖိတဖၣ်စံးဝဲလၢ ကျိဖးဒိၣ်ချံန့ၣ်မ့ၢ်ဝဲ (၁၂၀ မမ) အချံန့ၣ်လီၤ. အဝဲသ့ၣ်တသ့ၣ်ညါလီၢ်တံၢ်ဝဲလၢသုးရ့ၣ်ဖဲလဲၣ်တဘ့ၣ်ခး လီၤဝဲကျိဖးဒိၣ်အံၤဘၣ်. အဝဲသ့ၣ်နာ်ဝဲလၢကျိဖးဒိၣ်အံၤဘၣ်တၢ်ခး ထီၣ်အီၤလၢကြုၢ်တုတၢ်လီၢ်န့ၣ်လီၤ. စီၤဒ--- သံဝဲဒၣ်တဘျီ ဃီ ဖဲတၢ်ကဲထီၣ်သးလီၢ်န့ၣ်လီၤ. စီၤန--- န့ၣ်ပှၤလဲၤဆှၢအီၤလၢတၢ်ဆါဟံၣ်သနာ်က့အဝဲသံဝဲဒၣ်လၢကျဲန့ၣ်လီၤ. တနာ်ဃီပှၤခူၣ် လီၤကွံာ်အဝဲသ့ၣ်ခံဂၤအံၤ ဖဲကဆ--- တၢ်သွၣ်ခိၣ်, ကြုၢ်တုခံကရူၢ်, တန့ဆါကီၢ်ဆၣ်ပူၤန့ၣ်လီၤ.

• လါအ့ဖြ့ၣ် ၁၇ သီ, ၂၀၂၅ နံၣ် - SAC ပယီၤသုးခးလီၤကျိဖးဒိၣ်ဆူ နိၣ်တပွဲကရူၢ်ပူၤ

ဖဲလါအ့ဖြ့ၣ် ၁၇ သီ, ၂၀၂၅ နံၣ်, ဟါခီ ၃ နၣ်ရံၣ်ဆၢကတီၢ်, ပယီၤသုးခးလီၤဝဲကျိဖးဒိၣ်တဖၣ်ဆူ ကင--- သဝီ, နိၣ်တပွဲကရူၢ်, တန့ဆါကီၢ်ဆၣ်ပူၤန့ၣ်လီၤ. ကျိဖးဒိၣ်ချံတဖျၢၣ်လီၤတဲာ်ဝဲလၢ စီၤပ--- အကရၢၢ်ပူၤ ဖဲအဝဲတ့ထီၣ်ဝဲထံကမျၢဆၢကတီၢ်န့ၣ်လီၤ. သဝီဖိတဖၣ်တသ့ၣ်ညါလီၢ်တံၢ်ဝဲလၢပယီၤသုးရ့ၣ်ဖဲလဲၣ်တဘ့ၣ်လဲၣ်ခးလီၤကျိဖးဒိၣ်အံၤဘၣ်. ဘၣ်ဆၣ် လီၢ်ကဝီၤခိသနၢ်တဖၣ် ဆိကမိၣ်တယာ်ဝဲလၢပယီၤသုးပၢဆှၢဝဲၤလီၢ်ခိၣ်သ့ၣ် (စကခ) နီၣ်ဂံၢ် -၁၂ အိၣ်ဖဲလဲၤဝၣ် သုးကလၢၤ, ဘူးဒီးကီးတရံးဝ့ၢ်, သုးဖိ တဖၣ်ခးလီၤဝဲ မ့တမ့ၢ် ပယီၤသုးအိၣ်လၢကၠဲၣ်အတိၤခိၣ်ထိးသ့ၣ်တဖၣ်ခးလီၤဝဲန့ၣ်လီၤ.

ကျိဖးဒိၣ်ချံအံၤလီၤတဲာ်ဝဲဖဲ စီၤပ---, မီၤ ဖ--- ဒီး စီၤဘ--- သ့ၣ်တဖၣ်ကျဲဝဲဘံလၣ်မၠဲၣ်လၢကတ့ထီၣ်ဝဲထံကမျၢန့ၣ်လီၤ. ကျိဖး ဒိၣ်က့တဖၣ်ဘၣ်ဝဲထံကမျၢအထူၣ်တဖၣ် ဒီးသ့ၣ်ထူၣ်လၢအအိၣ်ဘူးသ့ၣ်တဖၣ်န့ၣ်လီၤ. စီၤပ--- ဘၣ်ဒိဝဲတဆံးတက့ၢ်လၢလၢၢ် က့ဖျိးဘၣ်အီၤန့ၣ်လီၤ. လီၢ်ကဝီၤခိၣ်နၢ်တဂၤစံးဝဲလၢ ကျိဖးဒိၣ်ချံတကလုာ်အံၤအခံကဘၣ်ပိၢ်ဖးထီၣ်လၢတၢ်ဖးဖီဒီးလီၤတဲာ်ပိၢ် ဖးထီၣ်ဝဲ ဒီးကျိဖးဒိၣ်ချံတဖျၢၣ်အံၤတမ့ၢ် (၁၂၀ မမ) အချံဘၣ်န့ၣ်လီၤ. ဖဲ KNLA တၢ်ဒုးကဲထီၣ်ဘူး ဒီးကြုၢ်တု ဒီးကီးတရံးဝ့ၢ် ဆၢကတီၢ်, ပယီၤသုးတဖၣ်ခးလီၤဝဲကျိဖးဒိၣ်တဖၣ်ဆူဒူသဝီပူၤ ဒီးတခးလီၤဝဲကျိဖးဒိၣ်ဆူအဒုၣ်အဒါ အိၣ်ဘၣ်န့ၣ်လီၤ.