English
ကညီကျိာ်
မြန်မာ
Print:
ဖဲ၂ဝ၁၉ နံၣ် လါဒံၣ်စဲဘၢၣ် အသီ၁ဝ လၢအမ့ၢ်ဟီၣ်ခိၣ်ဒီဘ့ၣ် ၦၤဟီၣ်ခိၣ်ဖိခွဲးယာ်မုၢ်နံၤ ၦဲၤထီၣ်(ရ၁)ဝီတဝီအံၤ ပဝဲကညီဂ့ၢ်ဝီခွဲးယာ်ကရူၢ်(KHRG) အိၣ်ဒီးတၢ်သူၣ်မံသးမုာ်လၢ ပဟူးဂဲၤဖံးမၤဘၣ်ဒ်တၢ်လၢ တၢ်မၤဂ့ၤထီၣ် ၦၤဟီၣ်ခိၣ်ဖိအခွဲးအယာ် လၢကီၢ်ပယီၤမုၢ်ထီၣ်ကလံၤထံး အပူၤအံၤန့ၣ်လီၤ. ပပာ်ကဖၢစ့ၢ်ကီးပသးလၢ ၦၤအါဒံအါဂၤ ဒီးၦၤတဝၢတၢ်ကရၢကရိတဖၣ် လၢအဟူးဂဲၤဖံးမၤသကိးတၢ်ဒီးၦၤႇ ဖဲတၢ်လီၤဘၣ်ယိၣ် ဒိၣ်ဒိၣ်မုၢ်မုၢ်အဆၢကတီၢ်မ့ၢ်ဂ့ၤႇ ဖဲတၢ်ဆီၣ်ထွဲမၤစၢၤပီးလီတအိၣ်လၢၦဲၤဘၣ်အဆၢကတီၢ်ဒၣ်လဲာ်န့ၣ်လီၤ.
လၢမုၢ်မဆါတနံၤအံၤ တၢ်မၤအၢမၤသီၦၤဟီၣ်ခိၣ်ဖိခွဲးယာ်တဖၣ် ကဲထီၣ်ဒ်ဒၣ်အသးတပယူာ်ဃီ လၢပၦၤတဝၢ အပူၤ တကးဘၣ် တၢ်မၤအၢမၤသီလၢအကဲထီၣ်တ့ၢ်သး လၢအပူၤကွံာ်တဖၣ်စ့ၢ်ကီး မၤဘၣ်ဒိဒံးဒၣ် ၦၤတဝၢအ တၢ်အိၣ်မူအိၣ်ဂဲၤ တုၤကတီၢ်ခဲအံၤအဃိ မ့ၢ်တၢ်လီၤသးအုးလၢပဂီၢ်ဒိၣ်နီၢ်မးန့ၣ်လီၤ. ၦၤဟီၣ်ခိၣ်ဖိခွဲးယာ်တၢ်ဂ့ၢ်ကီ လၢအကဲထီၣ်အသးတဖၣ် အိၣ်ဝဲအါမံၤအါကလုာ်ဒ်အမ့ၢ်ႇ သုးတၢ်ဟူးတၢ်ဂဲၤဒီးတၢ်ဒုးတၢ်ယာ်ႇ တၢ်ဃ့ၢ်မှံဟးဖျိး လၢထံလီၢ်ကီၢ်ပူၤဒီး ဆူထံချၢကီၢ်ချၢႇ သွံၣ်ထံးမုၣ်ခွါတၢ်မၤပယွဲႇ ဒီးတၢ်ဟံးန့ၢ်ဆူၣ်ဟီၣ်ခိၣ်ကပံာ်တဖၣ်န့ၣ်လီၤ. လၢကီၢ်ပယီၤမုၢ်ထီၣ် ကလံၤထံးအပူၤအံၤ ဖိသၣ်တနီၤ ဒိၣ်ထီၣ်ဘၣ်ဝဲလၢ ဟံၣ်ဒူၣ်ဃီထၢလၢ တအိၣ်ဒီးဟီၣ်ခိၣ် ကပံာ် တၢ်ဖံးအီၣ်မၤအီၣ်လီၢ်ဘၣ်ႇ ဖိသၣ်တနီၤ အမိၢ်အပၢ်ဘၣ်တၢ်မၤအၢမၤပယွဲႇ တၢ်မၤသံမၤဝီဒီး တနီၤ ဒိၣ်ထီၣ်ဘၣ်လၢ တၢ်ဖှီၣ်တၢ်ယာ်အပူၤန့ၣ်လီၤ. လၢန့ၢ်အမဲာ်ညါ အဝဲသ့ၣ်တဒိးန့ၢ်ဘၣ် တၢ်ကူၣ်ဘၣ်ကူၣ်သ့ဒီး တၢ်အိၣ်ဆူၣ်အိၣ်ချ့ အတၢ်အံးထွဲကွၢ်ထွဲဂ့ၤဂ့ၤစ့ၢ်ကီးဘၣ်န့ၣ်လီၤ.
တနံၣ်အံၤဒ်ဟီၣ်ခိၣ်ဒီဘ့ၣ်ၦၤဟီၣ်ခိၣ်ဖိခွဲးယာ်မုၢ်နံၤအတၢ်ဂ့ၢ်မိၢ်ၦၢ်မ့ၢ်ဝဲ“ၦၤကိးဂၤခွဲးယာ်အဂီၢ် သးစၢ်ဆၢထၢၣ်မၤ နီၢ်နီၢ်”အသိး မ့ၢ်တၢ်ဂ့ၢ်မိၢ်ၦၢ်အဂ့ၤတခါလၢ ပကီၢ်ပယီၤအဂီၢ်န့ၣ်လီၤ. ကတီၢ်အံၤ ကီၢ်ပယီၤပဒိၣ် စးထီၣ်ဆီတလဲ အတၢ်ပၢတၢ်ဆှၢအရူၢ်အသဲးကယီကယီ လၢသုးမီၤစိရိၤအတၢ်ပၢဆူၣ်ပၢစိးသနူ ဆူဒံၣ်မိၣ်ကရ့ၣ်စံၣ်တၢ်ပၢတၢ် ဆှၢအကျဲသနူန့ၣ်လီၤ. တၢ်ဆီတလဲအံၤ ဟဲစိာ်ဃုာ်တၢ်ဘျၢလီၤကျိၣ်စ့လၢမုၢ်ကျိာ်ဝဲၤကွာ်ႇ တၢ်သူၣ်ထီၣ်ဘှီထီၣ်ႇ တၢ်ဆဲးကျိးဆဲးကျၢဒီး တၢ်မုာ်တၢ်ခုၣ်အတၢ်လဲၤကျဲလၢအဃၢဝဲအံၤ လၢကီၢ်ပယီၤသုးဒီးကလုာ်ဒူၣ်ဖီၣ်စုကဝဲၤက ရၢတဖၣ်အဘၢၣ်စၢၤစ့ၢ်ကီးန့ၣ်လီၤ. တၢ်ဆီတလဲတဖၣ်အံၤ ကဟဲစိာ်တၢ်ဘျုးတၢ်ဖှိၣ်လၢအရ့ဒိၣ်နီၢ်နီၢ်တဖၣ် ဆံးယံာ်လဲၣ်ဒီး တၢ်မၤဘၣ်ဒိၦၤဟီၣ်ခိၣ်ဖိခွဲးယာ်ကပိာ်ထွဲထီၣ်အသးဒ်လဲၣ်န့ၣ် တၢ်တသ့ၣ်ညါအီၤဘၣ်. အဃိအလီၢ် အိၣ်ဝဲသၦၢ်ၦၢ်လၢ ကီၢ်ပယီၤအပူၤစၢၤသွဲၣ်သီသးစၢ်တဖၣ် ကအိၣ်ကတီၤအသးလၢ တၢ်ဃုသ့ၣ်ညါမၤလိအါထီၣ် ၦၤဟီၣ်ခိၣ်ဖိခွဲးယာ်ပီညါဒီး မၤဆူၣ်ထီၣ်တၢ်သ့တၢ်ဘၣ်လၢ ကဆၢထၢၣ်ဂဲၤလိာ်တၢ်အဂီၢ်န့ၣ်လီၤ.
ကီၢ်ပယီၤအပူၤသးစၢ်တဖၣ် တၢ်မၤပျံၤမၤဖုးအိၣ်ဘၣ်ဆၣ် ပာ်ဖျါထီၣ်အတၢ်သးဆူၣ်ဒီး အတၢ်ဂံၢ်ဆူၣ်ဘါဆူၣ်လၢ ကမၤန့ၢ်အတၢ်ခွဲးတၢ်ယာ်ဒီး တၢ်တီတၢ်တြၢ်အဂီၢ်န့ၣ်လီၤ. တၢ်ဂ့ၢ်တနီၤဒ်အမ့ၢ် ကရ့ၣ်နံၣ်သးစၢ်တဖၣ် ပာ်ဖျါထီၣ်အတၢ်ဘၣ်သးထီဒါဝဲ တၢ်သူၣ်ထီၣ်သုးခိၣ်ကျၢၢ်အီၣ်ဆါအဂီၤစိးပျၤ လၢအတပၣ်ဃုာ်ဒီး လီၢ်ကဝီၤဖိတဖၣ်အတၢ် ဘၣ်သးမ့ၢ်ဂ့ၤႇ ကခၠ့ၣ်သးစၢ်တဖၣ် ပာ်ဖျါထီၣ်အတၢ်ဘၣ်သးလၢ တၢ်ဒုးအယံာ်အထၢဒီး တၢ်ဃ့ၢ်မှံဟးဖျိးလၢ အကဲထီၣ်သး တဖၣ်အဖီခိၣ်အံၤ ဒုးအိၣ်ထီၣ်တၢ်သးစဲ လၢထံလီၢ်ကီၢ်ပူၤတၢ်ကစီၣ်သန့တဖၣ်အဂီၢ်န့ၣ်လီၤ. တၢ်အဒိတဖၣ်အံၤ အမံၤဟူသၣ်ဖျါထီၣ် ခီဖျိကီၢ်ပယီၤပဒိၣ်ဂုာ်ကျဲးစၢးဟံးထီၣ်ဂ့ၢ်ဝီဒီး ဖီၣ်ဒုးဃးအဝဲသ့ၣ်လၢ ဃိာ်ပူၤ အဝဲသ့ၣ်ဟူးဂဲၤမၤတၢ်ပာ်ဖျါထီၣ်သး လၢတၢ်သဘျ့ပူၤအခါန့ၣ်လီၤ. တၢ်အံၤမ့ၢ်ကျဲကူၣ်တရံးအကျါတဘိ လၢတၢ်သူအီၤဒ်သိး ကဆီၣ်သနံးသးစၢ်လၢ အဂဲၤလိာ်တၢ်လၢ ၦၤဟီၣ်ခိၣ်ဖိခွဲးယာ်အဂီၢ် လၢအတအိၣ်ဒီး တၢ်စု ဆူၣ်ခီၣ်တကးဘၣ်တဖၣ်အံၤန့ၣ်လီၤ. ဖဲလါအီကူး ၂ဝ၁၉ နံၣ်န့ၣ် နီၢ်အိလးဒီးကညီသးစၢ်ခံဂၤ ဘၣ်တၢ်ဖီၣ်အီၤ လၢအဝဲသ့ၣ်ကရၢကရိရဲၣ်ကျဲၤဝဲ တၢ်မၤလၤကပီၤကညီမၤထူရၤမုၢ်နံၤ ဖဲဝ့ၢ်တကူၣ်ပူၤအဃိန့ၣ်လီၤ. တၢ်ဂ့ၢ်တဖၣ် အံၤပာ်ဖျါထီၣ်ဝဲတၢ်ကီတၢ်ခဲတဖၣ် ဖဲလၢတၢ်ဂဲၤလိာ်မၤန့ၢ်ၦၤဟီၣ်ခိၣ်ဖိခွဲးယာ် လၢကီၢ်ပယီၤအခါဒီး အါန့ၢ်အန့ၣ် ပာ်ဖျါထီၣ်စ့ၢ်ကီး တၢ်ဂုာ်ကျဲးစၢးဒ်သိးအံၤ အလီၢ်အိၣ်ဝဲလၢ တၢ်ကဘၣ်ဂုာ်ကျဲးစၢးမၤဒံးဝဲနီၢ်နီၢ်န့ၣ်လီၤ.
နီၢ်အိလးအတၢ်ကတိၤလၢအမ့ၢ်“ခါလၢကဟဲန့ၣ်အိၣ်လၢၦၤသးစၢ်တဖၣ်အစုပူၤလီၤ.အဃိအဝဲသ့ၣ်ကြၢးသ့ၣ်ညါ ၦၤဟီၣ်ခိၣ်ဖိခွဲးယာ်တဖၣ်န့ၣ်လီၤ.” လၢကီၢ်ပယီၤမုၢ်ထီၣ်ကလံၤထံးအပူၤအံၤ တၢ်မၤပယွဲၦၤဟီၣ်ခိၣ်ဖိခွဲးယာ်လၢ အကဲထီၣ်တ့ၢ်သးတဖၣ် တလီၤကယးဒံးဘၣ်အမဲာ်ညါ တၢ်မၤပယွဲအသီတဖၣ်ဟဲကဲထီၣ်သးအဃိသးစၢ်တဖၣ် ဂုာ်ကျဲးစၢးဒီသဒၢၦၤဟီၣ်ခိၣ်ဖိခွဲးယာ် ခီဖျိတၢ်ဃုထံၣ်န့ၢ်ကျဲအသီ လၢကပာ်ဖျါထီၣ် အနီၢ်ကစၢ်တဂၤ ဒီးၦၤတဖု အခွဲးယာ်အဂီၢ်ႇ ထံၣ်လိာ်တၢၣ်ပီၣ်သကိးဒီးထံကီၢ်ပဒိၣ် ၦၤတဝၢကမျၢၢ်တဖၣ်ႇ ဒီးဂဲၤလိာ် သကိးလၢတၢ်မၤလီၤ တံၢ်က့ၤ ၦၤလၢမၤပယွဲၦၤဟီၣ်ခိၣ်ဖိခွဲးယာ်တဖၣ် တၢ်ကဟံးထီၣ်ဂ့ၢ်ဝီတုၤလီၤတီၤလီၤ ဒ်တၢ်တီတၢ်တြၢ်အကျဲသနူ အသိးန့ၣ်လီၤ. တၢ်မၤပယွဲၦၤဂ့ၢ်ဝီခွဲးယာ်လၢ ပထံၣ်အီၤတဖၣ် မၤပျံၤမၤဖုးဘၣ် ပဝဲကညီဂ့ၢ်ဝီခွဲးယာ်ကရူၢ်ဒိၣ်မး ဘၣ်ဆၣ် ၦၤသးစၢ်လၢပၦၤတဝၢပူၤတဖၣ်အတၢ်ဂုာ်ကျဲးစၢးအဃိ ပသးဂံၢ်ဘါဆူၣ်ထီၣ်ဒီး ပတၢ်မုၢ်လၢ်လၢ ကီၢ်ပယီၤမုၢ်ထီၣ်ကလံၤထံး အတၢ်အိၣ်သးခါဆူညါ ကဂ့ၤထီၣ်အဂီၢ် တဟးဂီၤကွံာ်ဝဲဘၣ်န့ၣ်လီၤ.
