English
ကညီကျိာ်
မြန်မာတၢ်ဂီၤတၢ်ကစီၣ်တဘ့ၣ်အံၤပာ်ဖျါဝဲတၢ်ဂီၤတၢ်အုၣ်သးလၢပယီၤသုးဒီးသုးဖီၣ်စုကဝဲၤကရူၢ်လၢအမၤသကိးဃုၣ်တၢ်, ပၣ်ဃုာ်ဒီး သုးခီးကီၢ်ဆၢ (BGF) ဒီးပၠူၤစီထံခးလီၤဝဲကျိဖးဒိၣ်စးထီၣ်လၢလါယနူၤအါရံၤတုၤလါနိၣ်ဝ့ဘၢၣ် ၂၀၂၅ နံၣ်ဒီးဒုးအိၣ်ထီၣ် ဝဲတၢ်ဘၣ်ဒိဘၣ်ထံးလၢဒူသဝီကမျၢၢ်သ့ၣ်တဖၣ်န့ၣ်လီၤ. ဆၢကတီၢ်ဖဲအံၤ, ကညီပှၤဂ့ၢ်ဝီခွဲးယာ်ကရူၢ် (KHRG) မၤနီၣ်မၤဃါ ဝဲတၢ်အုၣ်သးသ့ၣ်တဖၣ်အါမးဘၣ်ဃးတၢ်မၤဘၣ်ဒိပှၤဟီၣ်ခိၣ်ဖိခွဲးယာ်သုးဖိသ့ၣ်တဖၣ်မၤဝဲ, အါတက့ၢ်ပယီၤသုးလၢအအိၣ် လၢကီၢ်ပယီၤသုးမီၤစိရိၤတၢ်ပၢအဖီလာ်သ့ၣ်တဖၣ်ရၤလီၤအသးဒီးခးလီၤတၢ်လၢကမျၢၢ်အိၣ်ဆိးဟီၣ်ကဝီၤအလီၢ်န့ၣ်လီၤ. စးထီၣ် လၢ ၂၀၂၁ သုးဟံးန့ၢ်ဆူၣ်တၢ်စိတၢ်ကမီၤဝံၤအလီၢ်ခံဒီးတုၤဃီလၢ ၂၀၂၅ အံၤန့ၣ် SAC ခးလီၤနါစိၤကျိဖးဒိၣ်အါထီၣ်ဒီးဘၣ် သံဒီးဘၣ်ဒိဝဲသဝီဖိသ့ၣ်တဖၣ်, ဘၣ်ဟးဂီၤဟံၣ်ဃီ, စံာ်ဧိၤပှဲၤဧိၤ, တၢ်စုလီၢ်ခီၣ်ခိၣ်ဒီးပှၤတဝၢတၢ်သူၣ်ထီၣ်သ့ၣ်တဖၣ်, ဒုးအိၣ် ထီၣ်ဝဲတၢ်ပျံၤတၢ်ဖုးလၢကျိဖးဒိၣ် (UXO) လၢအတပိၢ်ဖးထီၣ်ဘၣ်တဖၣ်, မၤတံာ်တာ်သဝီဖိသ့ၣ်တဖၣ်လၢကလဲၤထီၣ်က့ၤ လီၤဘၣ်လၢတၢ်သဘျ့အပူၤလၢတၢ်လုၢ်အီၣ်နီၢ်ခိသးသမူအဂီၢ်ဒီးဒုးအိၣ်ထီၣ်ဝဲတၢ်ဃ့ၢ်မှံးဟးဖျိးအါအါဂီၢ်ဂီၢ်န့ၣ်လီၤ. သဝီဖိသ့ၣ် တဖၣ်မ့ၢ်အိၣ်ဒီးတၢ်တၤတၢ်ထဲလဲၣ်ဘၣ်ဆၣ်အဝဲသ့ၣ်ဃုဝဲကျဲဖံးမၤဘၣ်တၢ်လၢတၢ်လုၢ်အီၣ်နီၢ်ခိသးသမူအဂီၢ်, ပၣ်ဃုာ်ဒီးတၢ်ဆှၢ ဝဲပှၤသဝီဖိလၢအဘၣ်ဒိသ့ၣ်တဖၣ်လၢကဒိးန့ၢ်ဘၣ်တၢ်ကူစါယါဘျါသးဒီးကသုးကွံာ်အသးလၢတၢ်လီၢ်လၢအပူၤဖျဲးန့ၣ်လီၤ.
တၢ်ဂီၤတၢ်ကစီၣ်- ပယီၤသုး, BGF ဒီးသုးဖီၣ်စုကဝဲၤကရူၢ်လၢအပာ်ဖှိၣ်မၤသကိးတၢ်သ့ၣ်တဖၣ်ခးလီၤကျိဖးဒိၣ်ဆူဒူ သဝီပူၤဖဲကီၢ်ပယီၤမုၢ်ထီၣ်ကလံၤထံၤအဃိဘၣ်ဒိဟးဂီၤဟံၣ်ဃီ, ပှၤတဝၢတၢ်သူၣ်ထီၣ်, စံာ်ဧိၤပှဲၤဧိၤဒီးတၢ်စုလီၢ်ခီၣ်ခိၣ် သ့ၣ်တဖၣ် (လါယနူၤအါရံၤ တုၤ လါနိၣ်ဝ့ဘၢၣ် ၂၀၂၅ နံၣ်)
ဖဲ ၂၀၂၅ နံၣ်အပူၤ, ဒ်ပယီၤသုးမီၤစိရိၤသ့ၣ်တဖၣ်ခးလီၤဒံးတၢ်လၢကမျၢၢ်ထံဖိကီၢ်ဖိဟီၣ်ကဝီၤပူၤကွ့ၢ်ကွ့ၢ်အဃိ, သဝီဖိသ့ၣ် တဖၣ်ဘၣ်ကွၢ်ဆၢၣ်မဲာ်အါထီၣ်ဒံးသးသမူတၢ်လီၤမၢ်ဒီးတၢ်ဘၣ်ဒိဘၣ်ထံး, စံာ်လီၢ်ပှဲၤလီၢ်ဒီးဟံၣ်ဃီသ့ၣ်တဖၣ်ဘၣ်ဒိဟးဂီၤကွံာ် ဝဲဒၣ်န့လီၤ. ဖဲလါယနူၤအါရံၤဒီးလါနိၣ်ဝ့ဘၢၣ် ၂၀၂၅ နံၣ်အဘၢၣ်စၢၤ, ကညီဂ့ၢ်ဝီခွဲးယာ်ကရူၢ် (KHRG) မၤနီၢ်မၤဃါဝဲတၢ်ဂီၤတၢ် အုၣ်သးန့ၢ်ဝဲ (၁,၃၀၈) ဘ့ၣ်လၢအပာ်ဖျါထီၣ်ဝဲတၢ်ဘၣ်ဒိဘၣ်ထံးလၢထံကီၢ်တၢ်ပၢတၢ်ပြးကီၣ်ကးကရၢ (SAC) ခးလီၤဘၣ်ဝဲ လၢကျိဖးဒိၣ်, ပၣ်ဃုာ်ဒီးသဝီဖိတၢ်ဘၣ်ဒိဘၣ်ထံး, ဟံၣ်ဃီဘၣ်ဒိဟးဂီၤ, ပှၤတဝၢတၢ်သူၣ်ထီၣ်ဒီးစံာ်လီၢ်ပှဲၤလီၢ်သ့ၣ်တဖၣ်န့ၣ် လီၤ. လၢတၢ်ခးလီၤတၢ်ဒံးအံၤအဃိဒုးအိၣ်ထီၣ်ဝဲသဝီဖိတၢ်တူၢ်ဘၣ်ခီၣ်ဘၣ်ဒီးမၤဘၣ်ဒိအဝဲသ့ၣ်အတၢ်အိၣ်မူအိၣ်ဂဲၤလၢဆၢက တီၢ်ခါဆူမဲာ်ညါန့ၣ်လီၤ.
လၢတၢ်ကဲထီၣ်သးတနီၤအကျါ, ပယီၤသုးခးလီၤနါစိၤတၢ်ဆူဒူသဝီပူၤဖဲ ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) ဒီးကမျၢၢ် တၢ်ဒီသဒၢသုး (PDF) သုးတဖၣ်ပာ်ဖှိၣ်သးဒီးထီၣ်ခးအဝဲသ့ၣ်ဝံၤအလီၢ်ခံဒီးအဂၤတခါ, တၢ်ဒုးတၢ်ယၤမ့ၢ်တအိၣ်ဒၣ်လဲာ်န့ၣ်, ပယီၤသုးသ့ၣ်တဖၣ်ခးလီၤဝဲကျိဖးဒိၣ်ဆူဒူသဝီအပူၤန့ၣ်လီၤ. တၢ်ခးလီၤတၢ်အံၤဒုးအိၣ်ထီၣ်ဝဲကမျၢၢ်တၢ်ဘၣ်ဒိဘၣ်ထံးပၣ်ဃုာ် ဒီးဖိသၣ်ဒီးတၢ်မၤဘၣ်ဒိဟးဂီၤအဝဲသ့ၣ်တၢ်လုၢ်အီၣ်နီၣ်ခိသးသမူတၢ်စုလီၢ်ခီၣ်ခိၣ်လၢအရ့ဒိၣ်သ့ၣ်တဖၣ်ဒ်အမ့ၢ်, ဟံၣ်ဃီ, ဘုဖီ, ဟံၣ်တၢ်ပီးတၢ်လီ, တၢ်ပာ်ကီၤတၢ်သ့ၣ်တဖၣ်, တၢ်ဘုၣ်ဒၢ, စံာ်လီၢ်ပှဲၤလီၢ်, တၢ်ဖံးအီၣ်မၤအီၣ်အလီၢ်, တၢ်သူၣ်အီၣ်ဖျးအီၣ်အပီး အလီ, စဲးဖီကဟၣ်ဒီးတၢ်မၤအီၣ်မုၢ်ကျိၤဝဲၤကွၢ်အလီၢ်သ့ၣ်တဖၣ်န့ၣ်လီၤ. လၢတၢ်ခးလီၤတၢ်ဒံးအံၤအဃိ, သဝီဖိသ့ၣ်တဖၣ်ဘၣ် အိၣ်န့ၢ်ဆူၣ်ဒံးလၢတၢ်လီၤဘၣ်ယိၣ်အလီၢ်ဒီးတၢ်လီၢ်လၢအတပူၤဖျဲးဘၣ်ဖဲအဝဲသ့ၣ်မ့ၢ်အိၣ်လၢဟံၣ်မ့ၢ်ဂ့ၤ, ကၠိပူၤမ့ၢ်ဂ့ၤ, တၢ်ဘါ ယွၤသရိာ်အပူၤမ့ၢ်ဂ့ၤ, သီခါဖၠၣ်မ့ၢ်ဂ့ၤ, မၤတၢ်လၢစံာ်ပျီပူၤမ့ၢ်ဂ့ၤဒီးဟးထီၣ်က့ၤလီၤမ့ၢ်ဂ့ၤန့ၣ်အဝဲသ့ၣ်ဘၣ်အိၣ်ဒံးဒၣ်လၢတၢ်လီၤ ဘၣ်ယိၣ်ဒီးတၢ်ပျံၤတၢ်ဖုးအလီၢ်န့ၣ်လီၤ. သဝီဖိသ့ၣ်တဖၣ်သူဝဲအနီၢ်ကစၢ်အဂံၢ်တၢ်ဘါဒီးတၢ်သ့တၢ်ဘၣ်ဒီးဃ့ၢ်အိၣ်ခူသူၣ်လၢပှၢ် ပူၤဒီးတ့ထီၣ်န့ၢ်ဝဲတၢ်အိၣ်ကဒုအလီၢ်လၢတၢ်လီၢ်လၢအဝဲသ့ၣ်ဃ့ၢ်အိၣ်ကဒုအလီၢ်န့ၣ်လီၤ.
တၢ်ဂီၤတၢ်ကစီၣ်တဘ့ၣ်အံၤပၣ်ဃုာ်ဒီးတၢ်ဂီၤ (၆၄) ဘ့ၣ်လၢတၢ်ဃုထၢထီၣ်လၢကီၢ်ရ့ၣ် (၇) ဘ့ၣ်လၢအဘၣ်တၢ်နီၤဖးလီၤအီၤ လၢကညီကီၢ်စဲၣ်ဒ်အမ့ၢ်, ဒူသထူၣ် (သထုံ), တီအူ (တောင်ငူ) ချၢၣ်လွံၢ်ထူၣ် (ညောင်လေးပင်), ဘျံးဒဝဲၢ်, မုၢ်တြီၢ် (ဖာပွန်), ဒူပျာ်ယာ်ဒီးဖၣ်အၣ်ကီၢ်ရ့ၣ်န့ၣ်လီၤ. တၢ်ဂီၤသ့ၣ်တဖၣ်အံၤဘၣ်တၢ်ဒိန့ၢ်အီၤလၢလီၢ်ကဝီၤသဝီဖိဒီးသဝီဖိလၢအဘၣ်တၢ်မၤလိအီၤ လၢ KHRG ဒံးသိးကမၤနီၣ်မၤဃါတၢ်အိၣ်သးဘၣ်ဃးတၢ်မၤဘၣ်ဒိပှၤဂ့ၢ်ဝီခွဲးယာ်လၢလီၢ်ကဝီၤပူၤန့ၣ်လီၤ. ပှၤတူၢ်ဘၣ်တၢ်အမံၤ, တၢ်ဂီၤဒီးတၢ်လီၢ်တၢ်ကျဲသ့ၣ်တဖၣ်ဘၣ်တၢ်ပာ်သဒၢအီၤလၢတၢ်ဘံၣ်တၢ်ဘၢအတၢ်လီၤဘၣ်ယိၣ်အဂီၢ်န့ၣ်လီၤ.
တၢ်ဂီၤတဖၣ်အံၤဘၣ်တၢ်ဒိန့ၢ်အီၤဖဲလါယနူၤအါရံၤ ၂ဝ၂၅ နံၣ် ဖဲ ဘဘ--- သဝီဃၢၤ, ဒနူၣ်ကရူၢ်, သထူၣ်ကီၢ်ဆၣ်, ဒူသထူၣ်ကီၢ်ရ့ၣ်အပူၤန့ၣ်လီၤ. တၢ် ဂီၤတဖၣ်အံၤအပာ်ဖျါထီၣ်ဝဲဖဲလါယနူၤအါရံၤ ၁၃ သီ, ၂ဝ၂၅ နံၣ်အနံၤ, ဖဲဖးဖီမုၢ် ၁၂း၀၀ နၣ်ရံၣ်အဆၢကတီၢ် SAC ခီၣ်ချ့သုးရ့ၣ် (ခမရ) နီၣ်ဂံၢ် (၉) လၢအအိၣ်ဆီလီၤအသးဖဲဝ့ပသဝီလၢအဘူးဒီးကၠဲၣ်ကီၤဝ့ၢ်, သထူၣ်ကီၢ် ဆၣ်အသုးဖိတဖၣ်ခးလီၤကျိဖးဒိၣ်ဝံၤအလီၢ်ခံတၢ်အိၣ်ဖျါတဖၣ်န့ၣ်လီၤ. သဝီဖိတဖၣ်နၢ်ဟူဝဲတၢ်ခးထီၣ်ဝဲကျိဖးဒိၣ် (၃) ဖျၢၣ်န့ၣ်လီၤ. လၢတၢ်န့ၢ် အဃိ, ကျိဖးဒိၣ် (၁၂၀) မမ ခံဖျၢၣ်လီၤတဲာ်ပိၢ်ဖးထီၣ်ဝဲလၢတၢ်သူၣ်တၢ်ဖျး အလီၢ်တတီၤဖဲဘဘ--- သဝီပူၤန့ၣ်ဒီးမ့မ့ၢ်ကျိဖးဒိၣ်ချံအဂၤတဖျၢၣ်န့ၣ်လီၤ တပိၢ်ထီၣ်ဝဲဘၣ်ဒီးလီၤတဲာ်ဝဲတၢ်လီၢ်ဖဲလဲၣ်န့ၣ်တၢ်တသ့ၣ်ညါဘၣ်န့ၣ်လီၤ. ကျိဖးဒိၣ်ချံလၢအပိၢ်ထီၣ်ခံဖျၢၣ်န့ၣ်လီၤဘၣ်ဝဲဘဘ--- သဝီဖိခံဂၤလၢအ သၣ်နံၣ်အိၣ် (၆၆) နံၣ်ဒ်သိးသိးခံဂၤအရီပၢၢ်ကျိးပူၤဒီးဘၣ်ဟးဂီၤဝဲရီပၢၢ် ထူၣ်အါအါဂီၢ်ဂီၢ်န့ၣ်လီၤ. (တၢ်ဂီၤ- KHRG)
တၢ်ဂီၤတဖၣ်အံၤဘၣ်တၢ်ဒိန့ၢ်အီၤဖဲလါအ့ဖြ့ၣ်၂ဝ၂၅ နံၣ်ဖဲအအ---ကသံၣ် ဒၢးဖဲကၠီၣ်ဖၠၣ်ကရူၢ်, ကၠဲၣ်ထိၤကီၢ်ဆၣ်, ဒူသထူၣ်ကီၢ်ရ့ၣ်အပူၤဒီးပာ်ဖျါထီၣ် ဝဲသဝီဖိကိၤအ--- တဂၤဟဲကူစါယါဘျါအသးန့ၣ်လီၤ. ဖဲလါအ့ဖြ့ၣ် ၂၄ သီ, ၂၀၂၅ နံၣ်အနံၤ, ဟါခီ ၂း၀၀ အဆၢကတီၢ်, ပယီၤသုးစုကဝဲၤဒိၣ် (အမတ) နီၣ်ဂံၢ် (၃၁၀) ခးထီၣ်ဝဲ (၁၂၀) မမ ကျိဖးဒိၣ်ချံ (၂) ဖျၢၣ်ဒီးလီၤ ဘၣ်ဝဲလၢ အဘ --- သဝီ, ခယွဲကရူၢ်, ကၠဲၣ်ထိၤကီၢ်ဆၣ်, ဒူသထူၣ်ကီၢ် ရ့ၣ်အပူၤန့ၣ်လီၤ. ကျိဖးဒိၣ်ချံလီၤတဲာ်လၢသဝီပူၤဒီးဘၣ်ဒိဝဲသဝီဖိကိၤ အ--- ဖဲအအီလုၢ်ထံအဆၢကတီၢ်န့ၣ်လီၤ. ကျိဖးဒိၣ်လီၤတဲၤဒီးဘၣ်ဒိဝဲအ ခီၣ်လၣ်လၢအစ့ၣ်တကပၤနးနးကလဲာ်ဒီးဒူသဝီခိၣ်နၢ်ဖဲအဘ--- သဝီတ ဖၣ်ဆှၢအီၤလၢကသံၣ်ဒၢးတဖျၢၣ်လၢဘၣ်တၢ်ဒုးအိၣ်ထီၣ်အီၤလၢ (NUG) ဖဲ ကၠဲၣ်ထိၤကီၢ်ဆၣ်အပူၤန့ၣ်လီၤ. ဖဲလါနိၣ်ဝ့ဘၢၣ် ၂၀၂၅ နံၣ်န့ၣ်, အဝဲအ တၢ်ပူၤလီၢ်တကိညၣ်လီၤဒ်ဘၣ်န့ၣ်လီၤ. ဖဲလၢတၢ်ခးလီၤနါစိၤကျိဖးဒိၣ်အ ဆၢကတီၢ်ဟံၣ်ဟးဂီၤအိၣ်ဝဲဒၣ်အါဖျၢၣ်စ့ၢ်ကီးန့ၣ်လီၤ. (တၢ်ဂီၤ- KHRG)
တၢ်ဂီၤတဖၣ်အံၤဘၣ်တၢ်ဒိန့ၢ်အီၤဖဲလါမးရှး ၂ဝ၂၅ နံၣ်ဖဲ အခ---သဝီ, ငပၠီတီ (ငှက်ပျောတော) ကရူၢ်, ကၠဲၣ်ထိၤကီၢ်ဆၣ်, ဒူသထူၣ်ကီၢ်ရ့ၣ်အပူၤဒီးအရ--- သဝီ, အးလူကရူၢ်, ကၠဲၣ်ထိၤကီၢ်ဆၣ်, ဒူသထူၣ်ကီၢ်ရ့ၣ်အပူၤန့ၣ်လီၤ. တၢ်ဂီၤလၢစုစ့ၣ်တဘ့ၣ်အံၤမ့ၢ် အခ--- သဝီဖိအဟံၣ်ဒီးတၢ်ဂီၤလၢစုထွဲတဘ့ၣ်အံၤမ့ၢ် အရ--- သဝီဖိအဟံၣ်လၢအဘၣ်ဟးဂီၤကွံာ်ဝဲခီဖျိလၢ SAC စုကဝဲၤဒိၣ် (အမတ) နီၣ်ဂံၢ် (၆၀၂) ခးလီၤကျိဖးဒိၣ် ဖဲလါမးရှး ၂၀၂၅ နံၣ်အပူၤန့ၣ်လီၤ. တၢ်ဘၣ်ဒိဘၣ်ထံးပှၤတအိၣ်ဝဲဘၣ်န့ၣ်လီၤ. (တၢ်ဂီၤ- KHRG)
တၢ်ဂီၤတဖၣ်အံၤဘၣ်တၢ်ဒိးန့ၢ်ဘၣ်အီၤဖဲလါမးရှး ၂၁ သီ, ၂ဝ၂၅ နံၣ်အနံၤလၢသဝီဖိတဂၤအအိၣ်ဒီး တၢ်ဒိန့ၢ်တၢ်ဂီၤအံၤဖဲ အဘ--- သဝီ သီခါဖၠၣ်, ခယွဲ (ခရွဲ)ကရူၢ်, ကၠဲၣ်ထိၤကီၢ်ဆၣ်, ဒူသထူၣ်ကီၢ်ရ့ၣ်အပူၤန့ၣ်လီၤ. တၢ်ဂီၤလၢစုစ့ၣ်တဘ့ၣ်အံၤပာ်ဖျါထီၣ်ဝဲဒၣ်ဖဲလါမးရှး ၂၁ သီ, ၂၀၂၅ နံၣ်အနံၤ, ဂီၤခီ ၈း၀၀ အဆၢကတီၢ်, ပၠူၤစီထံအသုးဖိတဖၣ်ခးလီၤဝဲကျိဖးဒိၣ် (၈၁ မမ) တဖျၢၣ်ဒီးလီၤတဲာ်လၢသီခါဖၠၣ်ပူၤဒီးဘၣ်သံကွံာ်ဝဲသီခါတပါန့ၣ်လီၤ. ပၠူၤစီထံသုးဖိ တဖၣ်အံၤဘၣ်တၢ်တီခိၣ်ရိၣ်မဲအီၤလၢအီၤကၠံလၢအအိၣ်လၢလဲၤပၣ်သဝီ, ဆီထံးကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤန့ၣ်လီၤ. လၢတၢ်ခးလီၤကျိဖးဒိၣ်န့ၢ် အဃိ, သီခါ (၂) ပါဘၣ်ဒိစ့ၢ်ကီးဝဲ, လၢန့ၣ်အမဲာ်ညါ ဖၠၣ်အတၢ်သူၣ်ထီၣ်စ့ၢ်ကီးဘၣ်ဟးဂီၤကွံာ်ဝဲဒ်တၢ်ဂီၤလၢအထွဲတဘ့ၣ် ဖျါဝဲအသိးန့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤဘၣ်တၢ်ဒိးန့ၢ်အီၤဖဲလါဖ့ၤဘြူၤအါရံၤ ၉ သီ, ၂ဝ၂၅ နံၣ်အနံၤဒီးတၢ်ဒိးန့ၢ်ဘၣ်အီၤလၢသဝီဖိတဂၤအအိၣ်ဖဲအထ--- သဝီ, သဲၤကျဲၤ တိၢ်ကရူၢ်, ဒီၣ်ဖါခိၣ်ကီၢ်ဆၣ်, တီအူကီၢ်ရ့ၣ်အပူၤန့ၣ်လီၤ. တၢ်ဂီၤအံၤပာ်ဖျါထီၣ်ဝဲကျိဖးဒိၣ်ချံလၢတပိၢ်ထီၣ်ဒံးဘၣ်တဖျၢၣ်လၢ SAC ခီၣ်ချ့သုးရ့ၣ် (ခမရ) နီၣ်ဂံၢ် (၆၀၃) လၢအိၣ်ဆီလီၤအသးဖဲ စွ့ၣ်နါကလ့ (ရွှေနန်းကလေး) သုးကလၢၤဖဲလ့ၣ်သိၤ (လိပ်သို) ဝ့ၢ်န့ၣ်ခးလီၤဝဲဒီးလီၤဘၣ်ဝဲလၢအ ထ--- သဝီပူၤဖဲ လါဖ့ၤဘြူၤအါရံၤ ၉ သီ, ၂၀၂၅ နံၣ်န့ၣ်လီၤ. ကျိဖးဒိၣ်လၢအတပိၢ်ထီၣ်ဒံးဘၣ်တဖျၢၣ်အံၤတၢ်တမၤဒံးဘၣ်အီၤနီတမံၤဘၣ်ဒီးအိၣ် တ့ၢ်ဒံးဖဲ တၢ်ကဲထီၣ်သးအလီၢ်န့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဖၣ်အံၤဘၣ်တၢ်ဒိန့ၢ်အီၤဖဲလါမးရှး ၂ဝ၂၅ နံၣ်, ဖဲအဖ--- သဝီ, ပရှီလိာ်ကရူၢ်, ဒီၣ်ဖါခိၣ်ကီၢ်ဆၣ်, တီအူကီၢ်ရ့ၣ်အပူၤန့ၣ်လီၤ. တၢ်ဂီၤတဖၣ်အံၤ ပာ်ဖျါထီၣ်ဝဲတၢ်ဘါယွၤသရိၣ်တဖျၢၣ်ဖဲအဖ--- သဝီအံၤဘၣ်ဟးဂီၤဝဲခီဖျိ SAC ပယီၤသုးဖိလၢအအိၣ်ဖဲစဲၣ်သိမဲၤ (၁၃ မံာ်လာ်) သုးကလၢၤလၢအဘူးဒီး သၤဒီၤကၠံဝ့ၢ်, ဖဲတီအူကီၢ်ရ့ၣ်တဖၣ်ခးလီၤနါစိၤဝဲကျိဖးဒိၣ်ဖဲလါမးရှး ၁၃ သီ, ၂၀၂၅ နံၣ်အနံၤန့ၣ်လီၤ. (တၢ်ဂီၤ- KHRG)
တၢ်ဂီၤတဖၣ်အံၤဘၣ်တၢ်ဒိန့ၢ်အီၤဖဲလါယူၤလံ ၂ဝ၂၅ နံၣ်, ဖဲ အတ--- သဝီ, စယဲၤကၠံတီၤခၠါ (ဇရပ်ကြီးတောင်ခြမ်း) ကရူၢ်, ထီတထူၣ်ကီၢ်ဆၣ်, တီအူကီၢ် ရ့ၣ်အပူၤန့ၣ်လီၤ. ဖဲလါယူၤ ၂၄ သီ, ၂၀၂၅ နံၣ်အနံၤ, ဟါခီ ၉း၀၀ အဆၢကတီၢ်တီၢ်, SAC ခီၣ်သုးရ့ၣ် (ခလရ) နီၣ်ဂံၢ် (၇၃) ခးလီၤဝဲကျိဖးဒိၣ်အါဖျၢၣ် လၢအတ--- သဝီအပူၤန့ၣ်လီၤ. တၢ်ဂီၤလၢအဖီခိၣ်ကတၢၢ်ခံဘ့ၣ်အံၤပာ်ဖျါထီၣ်ဝဲတၢ်ခးလီၤကျိဖးဒိၣ်ဝံၤအလီၢ်ခံကျိဖးဒိၣ်လီၤဘၣ်ဝဲ ကိၤန--- ဒီး မၣ်ဝ--- အ ဟံၣ်ဂီၤန့ၣ်လီၤ. တၢ်ခးလီၤကျိဖးဒိၣ်အဃိကိၤန--- ဒီး မဝ--- ခံဂၤလၢၤဘၣ်သံကွံာ်ဝဲဒီးအဟံၣ်စ့ၢ်ကီးဘၣ်ဟးဂူာ်ဟးဂီၤကွံာ်ဝဲန့ၣ်လီၤ. တၢ်ဂီၤလၢအဂၤကဒီး ခံဘ့ၣ်န့ၣ်ပာ်ဖျါထီၣ်ဝဲသဝီဖိအူက--- လၢအသးနံၣ်အိၣ် (၅၄) နံၣ်တဂၤဘၣ်ဒိဝဲခီဖျိကျိဖးဒိၣ်တဖျၢၣ်ပိၢ်ထီၣ်ဘၣ်အီၤန့ၣ်လီၤ. အဝဲဘၣ်ဒိဝဲဖဲအကံၣ် ဒုၣ်ဒီးအခီၣ်လ့ၢ်ခိၣ်တကးဒံးဘၣ်အဟံၣ်စ့ၢ်ကီးဘၣ်ဟးဂီၤကွံာ်ဝဲဒၣ်န့ၣ်လီၤ. တၢ်ဂီၤလၢတၢ်ဖီလာ်ကတၢၢ်ခံဘ့ၣ်အံၤန့ၣ်ဘၣ်တၢ်တၢ်ဒိးန့ၢ်ဘၣ်ဖဲလါယူၤလံ ၈ သီ, ၂၀၂၅ နံၣ်အနံၤဒီး တၢ်ဒိးန့ၢ်ဘၣ်လၢသဝီဖိတဂၤအအိၣ်န့ၣ်လီၤ. တၢ်ဂီၤအံၤပာ်ဖျါထီၣ်ဝဲ အူက--- အဟံၣ်လၢအဘၣ်ဟးဂီၤကွံာ်ဝဲအဂီၤန့ၣ်လီၤ. (တၢ်ဂီၤ- KHRG/ လီၢ်ကဝီၤသဝီဖိ)
တၢ်ဂီၤတဖၣ်အံၤဘၣ်တၢ်ဒိးန့ၢ်ဘၣ်အီၤဖဲလါစဲးပထ့ဘၢၣ် ၉ သီ ၂ဝ၂၅ နံၣ်အနံၤ, ဖဲ ဘဂ--- သဝီဃၢၤ, ပၢၤထံးဟီၣ်ကဝီၤ, ထီတထူၣ်ကီၢ်ဆၣ်, တီအူ ကီၢ်ရ့ၣ်အပူၤန့ၣ်လီၤ. ဖဲလါစဲးပထ့ဘၢၣ် ၅ သီ, ၂၀၂၅ နံၣ်အနံၤ, ဟါခီ ၅း၀၀ အဆၢကတီၢ်ကတီၢ်, SAC ခီၣ်သုးရ့ၣ် (ခလရ) နီၣ်ဂံၢ် (၇၃) လၢအအိၣ်ဆီ လီၤအသးဖဲစယဲၤကၠံတီၤခၠါကရူၢ်, ထီတထူၣ်ကီဆၣ်, အသုးဖိတဖၣ်ခးလီၤနါစိၤဝဲကျိဖးဒိၣ် (၃) ဖျၢၣ်ဆူ ဘဂ--- သဝီပူၤန့ၣ်လီၤ. တၢ်ဂီၤတဖၣ်အံၤပာ် ဖျါထီၣ်ဝဲသဝီဖိတဂၤအဘုထူၣ်တဖၣ်လၢအဘၣ်ဟးဂီၤကွံာ်ဝဲခီဖျိ ကျိဖးဒိၣ်လီၤဘၣ်အဃိန့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဖၣ်အံၤဘၣ်တၢ်ဒိန့ၢ်အီၤဖဲလါဖ့ၤဘြူၤအါရံၤ ၂ဝ၂၅ နံၣ်ဖဲအမ--- သဝီ, ညီၤပ့ၤသၤ (ညောင်ပင်သာ) ကရူၢ်, မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ် အပူၤန့ၣ်လီၤ. တၢ်ဂီၤတဖၣ်အံၤပာ်ဖျါထီၣ်ဝဲသဝီဖိအူက--- တဂၤအဟံၣ် ဒီးအသိလ့ၣ်ယီၢ်တခိၣ်လၢအဘၣ်ဟးဂီၤကွံာ်ဝဲခီဖျိ SAC ခီၣ်ချ့ သုးရ့ၣ် (ခမရ) နီၣ်ဂံၢ် (၇၂) ခးလီၤနါစိၤဝဲကျိဖးဒိၣ်ဖဲလါဖ့ၤဘြူၤအါရံၤ ၁၈ သီ, ၂၀၂၅ နံၣ်အနံၤန့ၣ်လီၤ. သုးကလၢၤ (ခမရ) အံၤအိၣ်ဆီလီၤအသးလၢ စယဲၣ်ကၠံဝ့ၢ်ပူၤန့ၣ်လီၤ. (တၢ်ဂီၤ- KHRG)
တၢ်ဂီၤတဖၣ်အံၤဘၣ်တၢ်ဒိးန့ၢ်ဘၣ်အီၤဖဲလါယနူၤအါရံၤ ၂၈ သီ, ၂ဝ၂၅ နံၣ်အနံၤ, ဖဲအဒ--- သဝီ, ဆီထံးကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤန့ၣ် လီၤ. တၢ်ဂီၤသၢဘ့ၣ်အံၤပာ်ဖျါထီၣ် ဝဲ သဝီဖိ မီၤဘ--- သးနံၣ်အိၣ် (၁၂) နံၣ်ဒီး မၣ်ဆ--- သးနံၣ်အိၣ် (၁၆) နံၣ်ခံဂၤအံၤ, ဘၣ်ဒိဝဲဒီးကျိဖးဒိၣ် (၁၂၀ မမ) ခီဖျိ SAC ခီၣ်ချ့သုးရ့ၣ် (ခမရ) နီၣ်ဂံၢ် (၂၀) လၢအိၣ်ဆီလီၤအသးဖဲ ချၢၣ်လွံၢ်ထူၣ်ဝ့ၢ်န့ၣ် ခးလီၤကျိဖးဒိၣ်ဖဲလါယနူၤအါရံၤ ၂၄ သီ, ၂၀၂၅ နံၣ်အ နံၤ, ဂီၤခီ ၉း၀၀ အဆၢကတီၢ်လီၤဘၣ်ဝဲလၢသဝီပူၤဒီးဘၣ်ဖဲသဝီဖိတဖၣ် အိၣ်လၢအဟံၣ်အဆၢကတီၢ်န့ၣ်လီၤ. ဖဲလၢသဝီဖိခံဂၤဘၣ်ဒိဝံၤအလီၢ်ခံလီၢ် ကဝီၤပှၤဘၣ်မူဘၣ်ဒါဒီးသဝီသးပှၢ်ကျဲးစၢးဆှၢအဝဲသ့ၣ်ဆူတၢ်ဆါဟံတ ဖျၢၣ်လၢအအိၣ်လၢချၢၣ်လွံၢ်ထူၣ်ဝ့ၢ်ပူၤဒံးသိးကကူဆါယါဘျါက့ၤအသး အဂီၢ်န့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤတဘ့ၣ်အံၤ ဘၣ်တၢ်ဒိန့ၢ်အီၤဖဲလါမးရှး ၂ဝ၂၅ နံၣ် ဖဲ အဟ--- သဝီ, ဘယါလဟၤကရူၢ်, မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤန့ၣ်လီၤ. ဖဲလါ မးရှး ၂၇ သီ, ၂၀၂၅ နံၣ်အနံၤ, ဟါခီ ၄း၃၀ အဆၢကတီၢ်, ပယီၤသုး လၢအအိၣ်ဆီလီၤအသးဖဲကညူးကွ့ (ကညွှတ်ကွင်း) ဝ့ၢ်, ချၢၣ်လွံၢ်ထူၣ် ကီၢ်ရ့ၣ်, အသုးဖိတဖၣ်ခးလီၤဝဲကျိဖးဒိၣ် (၁၂၀ မမ) (၂) ဖျၢၣ်န့ၣ်လီၤ. လၢတၢ်န့ၢ်အဃိကျိဖးဒိၣ်ချံတဖျၢၣ်လီၤတဲာ်ဝဲလၢ အဟ--- သဝီပူၤဒီးဘၣ် ဒိဝဲသဝီဖိတဂၤလၢအသးနံၣ်အိၣ် (၂၉) နံၣ်လၢ အမ့ၢ် မီၤခ--- န့ၣ်လီၤ. အဝဲဘၣ်ဒိဝဲဖဲအစုစ့ၣ်ဒီးကျိဖးဒိၣ်အက့ဖျိသဂၢၢ်နုာ်တုၤဆူအဂုာ်ဃံကပိာ် ကပၤဒီးဘၣ်ဒိတုၤလၢအသးအဃိသံကွံာ်ဝဲဒၣ်န့ၣ်လီၤ. တၢ်ဂီၤအံၤပာ်ဖျါ ထီၣ်ဝဲ သဝီဖိမီၤခ--- တဂၤအစိၣ်န့ၣ်လီၤ. (တၢ်ဂီၤ- KHRG)
တၢ်ဂီၤတဖၣ်အံၤဘၣ်တၢ်ဒိန့ၢ်အီၤဖဲလါယူၤလံ ၂ဝ၂၅ နံၣ်, ဖဲ ဘဟ--- သဝီ, မံတဲၣ်တီ (မီးတိုင်တော)ကရူၢ်, မူကီၢ်ဆၣ်, ချၢၣ်လွံၢ်ထူၣ်ကီၢ်ရ့ၣ်အပူၤန့ၣ်လီၤ. တၢ်ဂီၤတဖၣ်အံၤအပာ်ဖျါထီၣ်ဝဲထံဒၢဖးဒိၣ်တဖၣ်လၢအဘၣ်ဟးဂီၤကွံာ်ဝဲခီဖျိ SAC ခီၣ်ချ့သုးရ့ၣ် (ခမရ) နီၣ်ဂံၢ် (၅၉၀) အသုးဖိတဖၣ်ခးလီၤနါစိၤဝဲ ကျိဖးဒိၣ် (၆၀ မမ) တဖၣ်ဖဲလါယူၤ ၂၈ သီ, ၂၀၂၅ နံၣ်အနံၤ, ဂီၤခီ ၁၀း၀၀ အဆၢကတီၢ်န့ၣ်လီၤ. သုးကလၢၤ (ခမရ) ဝဲအံၤအိၣ်ဆီလီၤအသးဖဲယ့ၤအိ စ့ၤသုးကလၢၤ, မံတဲၣ်တီကရူၢ်, မူကီၢ်ဆၣ်အပူၤန့ၣ်လီၤ. ခီဖျိလၢတၢ်ခးလီၤကျိဖးဒိၣ်အံၤအဃိ, သဝီဖိတဖၣ်ဘၣ်လဲၤဃ့ၢ်အိၣ်ကွံာ်လၢပှၢ်လၢၢ်ကျါဒီးတၢ်လီၢ် လၢအဂၤတဖၣ်န့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤဘၣ်တၢ်ဒိန့ၢ်အီၤဖဲလါအီကူး ၂၀၂၅ နံၣ်ဖဲဘအ---သဝီ ကၠဲးခၠီကရူၢ်, တနီသရံၣ်ကီၢ်ဆၣ်, ဘျံးဒဝဲၢ်ကီၢ်ရ့ၣ်န့ၣ်လီၤ. တၢ်ဂီၤအံၤပာ် ဖျါထီၣ်ဝဲကျိဖးဒိၣ် (၄၀ မမ) အချံလၢအတပိၢ်ဖးထီၣ်ဘၣ်တဖျၢၣ်အိၣ် ထီတ့ၢ်ဒီးတၢ်နာ်ဝဲလၢဘၣ်တၢ်ခးလီၤတ့ၢ်အီၤဖဲ ၂၀၂၂ နံၣ်ဖဲဘအ---သဝီ, ဒီးဘၣ်တၢ်ထံၣ်န့ၢ်က့ၤအီၤဖဲလါအီကူး ၁၂ သီ, ၂၀၂၅ နံၣ်အနံၤန့ၣ်လီၤ. တၢ်တဒုးသ့ၣ်ညါဝဲ KHRG လၢမ့ၢ်ကျိဖးဒိၣ်ချံလၢအတပိၢ်ဖးထီၣ်ဘၣ် တဖျၢၣ်အံၤဘၣ်တၢ်မၤဟးဂီၤကွံာ်အီၤဂ့ၤဂ့ၤလံဧါဘၣ်န့ၣ်လီၤ. (တၢ်ဂီၤ- KHRG)
တၢ်ဂီၤ (၄) ဘ့ၣ်အံၤဘၣ်တၢ်ဒိန့ၢ်အီၤဖဲလါယနူၤအါရံၤ ၂၀၂၅ နံၣ်ဖဲတၢ်ဃ့ၢ်အိၣ်ကဒုအလီၤဖဲဝီၢ်မုၢ်ကရူၢ်, ဒွဲၣ်လိကီၢ်ဆၣ်, မုၢ်တြီၢ်ကီၢ်ရ့ၣ်န့ၣ်လီၤ. တၢ်ဂီၤသ့ၣ်တဖၣ်အံၤပာ်ဖျါထီၣ်ဝဲသဝီဖိလၢအအိၣ်ဟဲလၢဘဧ---သဝီ, ဝီၢ်မုၢ်ကရူၢ်, ဒွဲၣ်လိကီၢ်ဆၣ်, မုၢ်တြီၢ်ကီၢ်ရ့ၣ်သ့ၣ်တဖၣ်ဃ့ၢ်အိၣ်ကမှံဝဲဖဲပှၢ်ပူၤစး ထီၣ်ဖဲလါယနူၤအါရံၤ ၇ သီ, ၂၀၂၅ နံၣ်အနံၤဖဲကညီဒီကလုာ်စၢဖှိၣ်ကရၢ (KNU) ဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNU) ဟ့ၣ်ပလီၢ်အဝဲသ့ၣ်လၢ ပယီၤသုးကခးလီၤဝဲကျိဖးဒိၣ်န့ၣ်လီၤ. SAC သုးလၢအအိၣ်ဖဲမဲပြ့းခံသုးကလၢၤသ့ၣ်တဖၣ်ခးလီၤကျိဖးဒိၣ်ဖဲတၢ်လီၢ်လၢအဘူးဒီးဘဧ---သဝီ, ဒီး SAC သုးကလံၤခးလီၤစ့ၢ်ကီးတၢ်ဒီးကဘီယူၤဖဲတၢ်လီၢ်ဖဲန့ၣ်န့ၣ်လီၤ. တုၤလၢလါဒံၣ်စ့ဘၢၣ် ၂၀၂၅ နံၣ်ဒၣ်လဲၣ်သဝီဖိသ့ၣ်တဖၣ်ဘၣ်ဃ့ၢ်အိၣ်ကမှံဒံးဝဲန့ၣ်လီ. (တၢ်ဂီၤ- KHRG)
တၢ်ဂီၤ (၄) ဘ့ၣ်အံၤဘၣ်တၢ်ဒိန့ၢ်အီၤဖဲလါယနူၤအါရံၤ ၂၀၂၅ နံၣ်ဖဲ အန---သဝီ, ကတၢတံးကရူၢ်, ဒွဲၣ်လိကီၢ်ဆၣ်, မုၢ်တြီၢ်ကီၢ်ရ့ၣ်န့ၣ်လီၤ. တၢ်ဂီၤ လၢတၢ်ဖီခိၣ်စုစ့ၣ်တဘ့ၣ်ပာ်ဖျါထီၣ်ဝဲဟံၣ်တဖျၢၣ်လၢအဘၣ်ဒိဟးဂီၤလၢ SAC သုးဖိလၢအအိၣ်ဖဲကတၢတံးသုးကလၢၤသ့ၣ်တဖၣ်ခးလီၤဝဲကျိဖးဒိၣ် (၆၀ မမ) တဖျၢၣ်ဆူသဝီပူၤဖဲလါယနူၤအါရံၤ ၂၁ သီ, ၂၀၂၅ နံၣ်အနံၤအဆၢကတီၢ်န့ၣ်လီၤ. ဘၣ်ဆၣ်တၢ်ဒုးတၢ်ယၤတအိၣ်ဘၣ်န့ၣ်လီၤ. တၢ်ဂီၤလၢတၢ် ဖီခိၣ်စုထွဲတဘ့ၣ်ဒီးတၢ်ဂီၤလၢလၢတၢ်ဖီလာ်သ့ၣ်တဖၣ်ဘၣ်တၢ်ဒိန့ၢ်အီၤဖဲလါယနူၤအါရံၤ ၂၀၂၅ နံၣ်ဖဲအန---သဝီဖဲတၢ်ခးလီၤဝဲကျိဖးဒိၣ်အဂၤတဖျၢၣ်ဖဲ လါယနူၤအါရံၤ ၂၃ သီ, ၂၀၂၅ နံၣ်အနံၤဝံၤအလီၢ်ခံန့ၣ်လီၤ. တၢ်နာ်ဝဲလၢကျိဖးဒိၣ်အံၤဘၣ်တၢ်ခးလီၤအီၤလၢသုးခီးကီၢ်ဆၢ (BGF) (နီၣ်ဂံၢ်- ၁၀၁၃) ခီဖျိ BGF သုးဖိသ့ၣ်တဖၣ်အိၣ်သူၣ်လီၤစ့ၢ်ကီးအသးဖဲကတၢတံးသုးကလၢၤန့ၣ်လီၤ. တၢ်ဂီၤသ့ၣ်တဖၣ်အံၤပာ်ဖျါထီၣ်ဝဲဟံၣ်တဖျၢၣ်လၢအဘၣ်ဟးဂီၤဝဲခဲလၢာ်, ကျိဖးဒိၣ်ချံအကုလၢအအိၣ်တ့ၢ်တဖျၢၣ်ဒီးဖိသၣ်ပိာ်ခွါလၢအဘၣ်ဒိလၢတၢ်ခးလီၤကျိဖးဒိၣ်အဃိန့ၣ်လီၤ. ဖိသၣ်ပိာ်ခွါအံၤဒိးန့ၢ်ဘၣ်ဝဲတၢ်ကူစါယါဘျါသးဖဲ သဝီပူၤဒီးဘၣ်တၢ်ကူစါအီၤလၢ KNLA သုးကသံၣ်သရၣ်တဂၤဒီးခဲအံၤဘျါက့ၤဝဲလံန့ၣ်လီၤ. (တၢ်ဂီၤ- KHRG)
တၢ်ဂီၤ (၂) ဘ့ၣ်အံၤဘၣ်တၢ်ဒိန့ၢ်အီၤဖဲလါဖ့ၤဘြူၤအါရံၤ ၂၀၂၅ နံၣ်ဖဲ အခ--- သဝီ, ကတၢတံးကရူၢ်, ဒွဲၣ်လိကီၢ်ဆၣ်, မုၢ်တြီၢ်ကီၢ်ရ့ၣ်န့ၣ်လီၤ. တၢ်ဂီၤသ့ၣ်တဖၣ်အံၤပာ်ဖျါထီၣ်ဝဲ အခ--- သီခါဖၠၣ်ခိၣ်ဒုးဒီးပဲတြီဖိလၢအဘၣ်ဟးဂီၤဝဲဖဲသုးဖိလၢအအိၣ်သူၣ်လီၤအသးဖဲ BGF (နီၣ်ဂံၢ်-၁၀၁၃) ဖဲကတၢတံးသုးကလၢၤသ့ၣ်တဖၣ်ခးလီၤဝဲကျိဖးဒိၣ် (၁၂၀ မမ) တဖျၢၣ်ဒီးလီၤတဲာ်ဖဲသီခါဖၠၣ်ကရၢၢ်ပူၤဖဲလါဖ့ၤဘြူၤအါရံၤ ၁ သီ, ၂၀၂၅ နံၣ်အနံၤ, မုၢ်နၤခီ ၁၂း၀၀ အဆၢကတီၢ်န့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤဘၣ်တၢ်ဒိးန့ၢ်အီၤလၢအရှ---သဝီသးပှၢ်အအိၣ်, လ့ဖိထၣ် ကရူၢ်, ဒွဲၣ်လိကီၢ်ဆၣ်, မုၢ်တြီၢ်ကီၢ်ရ့ၣ်ဖဲလါဖ့ၤဘြူၤအါရံၤ ၂၈ သီ, ၂၀၂၅ နံၣ်အနံၤန့ၣ်လီၤ. တၢ်ဂီၤအံၤပာ်ဖျါထီၣ်ဝဲကျိဖးဒိၣ်လၢအအိၣ်ထီတ့ၢ်တ ဖျၢၣ်ဘၣ်တၢ်ခးလီၤအီၤလၢ SAC စုကဝဲၤဒိၣ်သုးလၢအအိၣ်သူၣ်လီၤအ သးဖဲကတၢတံးသုးကလၢၤဖဲလါဖ့ၤဘြူၤအါရံၤ ၂၇ သီ, ၂၀၂၅ နံၣ်အနံၤ, ဟါခီ ၄း၀၀ အဆၢကတီၢ်န့ၣ်လီၤ. ကျိဖးဒိၣ်အံၤဘၣ်ဖျိဝဲသဝီဖိတဂၤအ ဟံၣ်ထူၣ်ဖဲအရှ---သဝီန့ၣ်လီၤ. ကျိဖးဒိၣ်ချံအံၤဘၣ်တၢ်ထုးထီၣ်ကွံာ်အီၤ လၢလီၢ်ကဝီၤခိၣ်နၢ်န့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤ (၂) ဘ့ၣ်အံၤဘၣ်တၢ်ဒိန့ၢ်အီၤဖဲလါမးရှး ၂၀၂၅ နံၣ်, ဖဲဘဒ--ပျီပူၤလၢအအိၣ်သူၣ်လီၤအသးဘူးဒီးဘဃ---သဝီ, မးထီကရူၢ်, ဒွဲၣ်လိကီၢ်ဆၣ်, မုၢ်တြီၢ်ကီၢ်ရ့ၣ်န့ၣ်လီၤ. ဖဲလါဖ့ၤဘြူၤအါရံၤ ၂၈ သီ, ၂၀၂၅ နံၣ်အနံၤ, ဟါခီ ၈း၃၀ အဆၢကတီၢ်, SAC ခမရ (နီၣ်ဂံၢ်-၃၄၁) ဒီး (နီၣ်ဂံၢ်-၃၄၀) အိၣ်သူၣ်လီၤအသးဖဲဖၣ်ပူၣ်ဝ့ၢ်အံၤခးလီၤဝဲကျိဖးဒိၣ် (၈၁ မမ) (၅) ဖျၢၣ်ဆူဘဃ---သဝီပူၤန့ၣ်လီၤ. ကျိဖးဒိၣ်အကျါတဖျၢၣ်လီၤတဲာ်ပိၢ်ဖးထီၣ်ဖဲသဝီဖိစီၤ တ---တဂၤအညါသူးကျီးပူၤဒီးဘၣ်ဟးဂီၤဝဲတနီၤဒီးညါသူးလၢအလိဃ့ပာ်ဝဲလၢဒဲပူၤန့ၣ်လီၤ. တၢ်ဂီၤလၢစုစ့ၣ်တဘ့ၣ်ဘၣ်ဃးဒီးညါသူးကျီးလၢအဘၣ်ဒိဒီး တၢ်ဂီၤလၢစုထွဲတဘ့ၣ်ပာ်ဖျါထီၣ်ဝဲကျိဖးဒိၣ်အခံမဲၢ်ကုလၢအပိၢ်ဖးထီၣ်ဝံၤဒီးဘၣ်တၢ်ထံၣ်န့ၢ်အီၤလၢကျီးပူၤန့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤဘၣ်တၢ်ဒိန့ၢ်အီၤဖဲလါမးရှး ၂၀၂၅ နံၣ်ဘူးဒီးအည---သဝီ, လ့ဖိထၣ်ကရူၢ်, ဒွဲၣ်လိကီၢ်ဆၣ်, မုၢ်တြီၢ်ကီၢ်ရ့ၣ်န့ၣ်လီၤ. ဖဲလါမးရှး ၁ သီ, ၂၀၂၅ နံၣ်အနံၤ, ဂီၤခီ ၉း၃၅ အဆၢကတီၢ်, SAC သုးလၢအအိၣ် သူၣ်လီၤအသးဖဲကတၢတံးသုးကလၢၤလၢအအိၣ်သူၣ်လီၤအသးဖဲကတၢ တံးကရူၢ်သ့ၣ်တဖၣ်ခးလီၤကျိဖးဒိၣ်ဆူအယ---သဝီ, ဘုသိၣ်ကီၢ်ဆၣ်, မုၢ်တြီၢ်ကီၢ်ရ့ၣ်န့ၣ်လီၤ. ကျိဖးဒိၣ်အကျါတဖျၢၣ်တပိၢ်ဖးထီၣ်ဘၣ်န့ၣ်လီၤ. သဝီဖိလၢအအိၣ်ဖဲအယ---သဝီပူၤတဂၤထံၣ်န့ၢ်ဝဲကျိဖးဒိၣ်ချံလၢအတပိၢ် ဖးဘၣ်တဖျၢၣ်အံၤဒီးက့ၤစိာ်ဝဲဆူအသဝီန့ၣ်လီၤ. သဝီဖိအဂၤသ့ၣ်တဖၣ် ဟ့ၣ်ပလီၢ်အီၤလၢတၢ်အံၤမ့ၢ်တၢ်လၢအလီၤဘၣ်ယိၣ်လၢကပာ်အီၤဖဲအံၤ, လၢတၢ်န့ၢ်အဃိလၢခံကျိဖးဒိၣ်အံၤဘၣ်တၢ်လဲၤပာ်က့ၤအီၤလၢသဝီချၢသ့ၣ် ကဒုဖီလာ်န့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤဘၣ်တၢ်ဒိးန့ၢ်အီၤလၢလီၢ်ကဝီၤခိၣ်နၢ်အအိၣ်ဖဲလါယူၤလံ ၁၁ သီ, ၂၀၂၅ နံၣ်အနံၤန့ၣ်လီၤ. တၢ်ဂီၤအံၤပာ်ဖျါထီၣ်ဝဲဖိ သၣ်ပိာ်ခွါလၢအမံၤမ့ၢ်စီၤဒ---လၢအသးနံၣ်အိၣ်ဝဲ (၁၇) နံၣ်ဒီးအိၣ်ဟဲ လၢအဃ---သဝီ, မဲၤကျီကရူၢ်, ဘုသိၣ်ကီၢ်ဆၣ်, မုၢ်တြီၢ်ကီၢ်ရ့ၣ် တဂၤဒိးန့ၢ်ဘၣ်ဝဲတၢ်ကူစါယါဘျါသးဖဲအဟံၣ်ဖဲအဝဲဘၣ်ဒိဝဲလၢ SAC သုးလၢအအိၣ်ဖဲဖၣ်ပူၣ်သုးကလၢၤဒီးခးလီၤဝဲကျိဖးဒိၣ်ဖဲလါ ယူၤလံ ၁၀ သီ, ၂၀၂၅ နံၣ်အနံၤဝံၤအလီၢ်ခံန့ၣ်လီၤ. ကျိဖးဒိၣ် တဖျၢၣ်လီၤတဲာ်ဖဲအဒ---သဝီ ဒီးအဂ---သဝီအဘၢၣ်စၢၤ, မဲၤကျီကရူၢ် ဖဲစီၤဒ---ဒီးအသကိးတဂၤဟးဝဲအဆၢကတီၢ်န့ၣ်လီၤ. ဖဲအဝဲဘၣ် ဒိဝံၤတဘျီဃီအသကိးတဂၤကိးပသူဝဲဒံးသိးပှၤကမၤစၢၤအီၤအဂီၢ် န့ၣ်လီၤ. ကညီဒီကလုာ်ပၢၤကီၢ်သုး (KNPF) လၢအအိၣ်ဘူးဖဲတၢ် သမံသမိးအလီၢ်တတီၤတဲဘၣ်ဆူၣ်ချ့ပှၤမၤတၢ်ဖိလၢအအိၣ်ဟဲလၢ ကညီဆူချ့မၤစၢၤဝဲၤကျိၤ (KDHW) လၢကကူစါအီၤန့ၣ်လီၤ. (တၢ်ဂီၤ- လီၢ်ကဝီၤခိၣ်နၢ်)
တၢ်ဂီၤသ့ၣ်တဖၣ်အံၤဘၣ်တၢ်ဒိန့ၢ်အီၤဖဲလါဖ့ၤဘြူၤအါရံၤ ၂၀၂၅ နံၣ်ဖဲ အဧ--- သဝီ, မီမးယွၣ်သ့းကရူၢ်, ကြုၢ်တုကီၢ်ဆၣ်, ဒူပျာ်ယာ်ကီၢ်ရ့ၣ်န့ၣ်လီၤ. ဖဲလါယနူၤအါရံၤ ၁၃ သီ, ၂၀၂၅ နံၣ်အနံၤ, ဟါခီ ၈း၀၀ အဆၢကတီၢ်, SAC (ခလရ) (နီၣ်ဂံၢ်-၉၇) လၢအအိၣ်ဖဲဒုးယၤဂ့ၢ်ဝီ (MOC) (နီၣ်ဂံၢ်-၁၂) အတၢ်ပၢဖီလာ်ဒီးအိၣ်သူၣ်လီၤအသးဘူးဒီးအ့ရှၢၢ်ကျဲမုၢ်ဖဲကီးတရံးကီၢ်ဆၣ်သ့ၣ်တဖၣ်ခးလီၤဝဲကျိဖးဒိၣ်တဖျၢၣ်ဒီးလီၤတဲဖဲအဧ---သဝီဒီးဘၣ်အူအီၣ်ဝဲဒူသ ဝီဖိအတၢ်လုၢ်အီၣ်နီၢ်ခိသးသမူအတၢ်ပီးတၢ်လီသ့ၣ်တဖၣ်န့ၣ်လီၤ. တၢ်ဂီၤသ့ၣ်တဖၣ်အံၤပာ်ဖျါထီၣ်ဝဲတၢ်ပာ်ကီၤဘုသးအလီၢ်, ပာ်ဃုာ်ဒီးပီၤဖးထီၣ်လၢတၢ် ဆှၢထံ, ထးဝါဒီးတၢ်ဖိတၢ်လံၤလၢအဂုာ်အဂၤသ့ၣ်တဖၣ်ဘၣ်ဒိဟးဂီၤကွံာ်ဝဲလၢတၢ်ခးလီၤကျိဖးဒိၣ်အဃိန့ၣ်လီၤ. (တၢ်ဂီၤ- KHRG)
တၢ်ဂီၤလၢစုစ့ၣ်တဘ့ၣ်ဘၣ်တၢ်ဒိန့ၢ်အီၤဖဲလါအ့ဖြ့ၣ် ၂၀၂၅ နံၣ်ဖဲဘဒ---သဝီ, လိာ်ရှါကရူၢ်, ဝီၢ်ရ့ၣ်ကီၢ်ဆၣ်, ဒူပျာ်ယာ်ကီၢ်ရ့ၣ်န့ၣ်လီၤ. တၢ်ဂီၤအံၤပာ်ဖျါထီၣ် ဝဲဘဒ---သဝီဖိအထံပူၤတဖျၢၣ်အကပၤဘၣ်ဒိဝဲလၢ SAC ခးလီၤကျိဖးဒိၣ်ဖဲလါအ့ဖြ့ၣ် ၁၄ သီ, ၂၀၂၅ နံၣ်အနံၤန့ၣ်လီၤ. တၢ်ဂီၤလၢစုထွဲတဘ့ၣ်ဘၣ်တၢ်ဒိး န့ၢ်အီၤလၢ ဘဒ---သဝီဖိတဂၤအအိၣ်ဒီးပာ်ဖျါထီၣ်ဝဲသဝီဖိလၢအဂၤတဂၤအသဲးကျီးလၢအဘၣ်ဒိစ့ၢ်ကီးလၢ SAC ခးလီၤကျိဖးဒိၣ်အဃိန့ၣ်လီၤ. (တၢ်ဂီၤ- KHRG/ လီၢ်ကဝီၤသဝီဖိ)
တၢ်ဂီၤသ့ၣ်တဖၣ်အံၤဘၣ်တၢ်ဒိန့ၢ်အီၤဖဲလါအ့ဖြ့ၣ် ၂၀၂၅ နံၣ်ဖဲအစ---သဝီ, နိၣ်ဖိကရူၢ်, ကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ်န့ၣ်လီၤ. ဖဲလါအ့ဖြ့ၣ် ၁၅ သီ, ၂၀၂၅ နံၣ်အနံၤ, မုၢ်ထူၣ်အဆၢကတီၢ်, SAC အီၤစ့ၤယးသုးကျိၤလၢအအိၣ်ဆီလီၤအသးဖဲအ့ရှၢၢ်ကျဲမုၢ်သ့ၣ်တဖၣ်ခးလီၤကျိဖးဒိၣ် (၈၁ မမ) (၂) ဖျၢၣ်ဆူအစ---သဝီပူၤန့ၣ်လီၤ. တၢ်ဂီၤသ့ၣ်တဖၣ်အံၤပာ်ဖျါထီၣ်ဝဲစဲးထဲၣ်တၢ်, သိလ့ၣ်တခိၣ်ဒီးသဝီဖိအဟံၣ်လၢအဘၣ်ဒိလၢတၢ်ကဲထီၣ်သးအံၤအဃိန့ၣ် လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤဘၣ်တၢ်ဒိန့ၢ်အီၤဖဲလါယူၤလံ ၂၀၂၅ နံၣ်ဖဲအဆ---သဝီ, မၠီးကၠၤအ့ကရူၢ်, ကြုၢ်တုကီၢ်ဆၣ်, ဒူပျာ်ယာ်ကီၢ်ရ့ၣ်န့ၣ်လီၤ. ဖဲလါယူၤလံ ၉ သီ, ၂၀၂၅ နံၣ်အနံၤ, ဟါလီၤခီ ၅း၀၀ အဆၢကတီၢ်, SAC ခီၣ်ချ့ သုးရ့ၣ် (ခမရ) (နီၣ်ဂံၢ်-၅၄၅), အိၣ်သူၣ်လီၤအသးဖဲကြုၢ်တုကီၢ် ဆၣ်ခးလီၤဝဲကျိဖးဒိၣ်တဖျၢၣ်ဖဲအဆ---သဝီဒီးဘၣ်ဒိဝဲဖိသၣ် (၄) ဂၤန့ၣ် လီၤ. လီၤလီၤဆီဆီတၢ်ဂီၤတဘ့ၣ်အံၤပာ်ဖျါထီၣ်ဝဲဖိသၣ်ခံဂၤအကျါလၢအ သးနံၣ်အိၣ်ဝဲ (၁၀) နံၣ်တဂၤဒီး (၁၀) လါတဂၤဘၣ်ဒိဝဲလၢ SAC ခးလီၤကျိဖးဒိၣ်အဃိန့ၣ်လီၤ. အဝဲသ့ၣ်ဘၣ်ဒိဝဲဖဲအမဲာ်သၣ်, အခိၣ်ဒီးအ ပျိၢ်ဃံန့ၣ်လီၤ. ဖိသၣ်သ့ၣ်တဖၣ်အံၤဒိးန့ၢ်ဘၣ်တၢ်ကူစါယါဘျါဒီးဘျါက့ၤ ဝဲလံန့ၣ်လီၤ. (တၢ်ဂီၤ- KHRG)
တၢ်ဂီၤသ့ၣ်တဖၣ်အံၤဘၣ်တၢ်ဒိန့ၢ်အီၤဖဲလါအီကူး ၂၀၂၅ နံၣ်ဖဲဘသ---သဝီ, နိၣ်ဖိကရူၢ်, ကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ်န့ၣ်လီၤ. တၢ်ဂီၤသ့ၣ် တဖၣ်အံၤပာ်ဖျါထီၣ်ဝဲသဝီဖိလၢအဃ့ၢ်ထီၣ်ကွံာ်လၢအဟံၣ်အဃီဒီးဃ့ၢ် အိၣ်ကဒုလၢသဝီချၢခီဖျိပယီၤသုးသ့ၣ်တဖၣ်ခးလီၤဒံးကျိဖးဒိၣ်လၢဘသ---သဝီပူၤဖဲလါအီကူး ၁၄ သီ, ၂၀၂၅ နံၣ်အနံၤန့ၣ်လီၤ. (တၢ်ဂီၤ- KHRG)
တၢ်ဂီၤသ့ၣ်တဖၣ်အံၤဘၣ်တၢ်ဒိးန့ၢ်အီၤလၢသဝီဖိတဂၤအအိၣ်ဖဲလါမးရှး ၄ သီ, ၂၀၂၅ နံၣ်အနံၤဖဲဘဆ---သဝီ, ယီၣ်ကုာ်ကရူၢ်, တန့ဆါကီၢ်ဆၣ်, ဖၣ်အၣ်ကီၢ်ရ့ၣ်န့ၣ်လီၤ. သဝီဖိအံၤဒိဝဲတၢ်ဂီၤအံၤဖဲလါဖ့ၤဘြူၤအါရံၤ ၂၈ သီ, ၂၀၂၅ နံၣ်အနံၤဂီၤခီဖဲအူစ---အရီဘၢၣ်ကျီးလၢအဘူးဒီးဘဆ---သဝီန့ၣ်လီၤ. ဖဲလါဖ့ၤဘြူၤအါရံၤ ၂၇ သီ, ၂၀၂၅ နံၣ်အနံၤ, SAC သုးကလံၤလၢအအိၣ်ဆီလီၤအသးဖဲလဲၤဝးစုကဝဲၤဒိၣ် (နီၣ်ဂံၢ်-၉၇) သ့တဖၣ်ခးလီၤဝဲကျိဖးဒိၣ် (၁၂၀ မမ) ပၣ်ဃုာ်ဒီးကျိခးမ့ၣ်အူလၢအဘၣ်အူအီၣ်ဝဲအူစ---အရီဘၢၣ်ကျီးန့ၣ်လီၤ. တၢ်ဂီၤအံၤပာ်ဖျါထီၣ်ဝဲရီဘၢၣ်ကျီးလၢအဘၣ်ဟးဂီၤကွံာ်န့ၣ်လီၤ. (တၢ်ဂီၤ- လီၢ်ကဝီၤသဝီဖိ)
တၢ်ဂီၤသ့ၣ်တဖၣ်အံၤဘၣ်တၢ်ဒိန့ၢ်အီၤဖဲလါစဲးပထ့ဘၢၣ် ၂၀၂၅ နံၣ်ဖဲဘက---သဝီ, ထံဝၣ်ဘျီကရူၢ်, တန့ဆါကီၢ်ဆၣ်, ဖၣ်အၣ်ကီၢ်ရ့ၣ်န့ၣ်လီၤ. တၢ်ဂီၤ သ့ၣ်တဖၣ်အံၤပာ်ဖျါထီၣ်ဝဲသဝီဖိလၢအအိၣ်ဖဲဘသ---သဝီ, ဒီးအစ---သဝီ, နိၣ်ဖိကရူၢ်, ကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ်လၢအဃ့ၢ်အိၣ်ကမှံ သ့ၣ်တဖၣ်အိၣ်ဆိးဒီးမံအလီၢ်ခီဖျိပယီၤသုးခးလီၤဒံးကျိဖးဒိၣ်ဖဲလါစဲးပထ့ဘၢၣ် ၂ သီ, ၂၀၂၅ နံၣ်အနံၤဆူဘသ---သဝီဒီးအစ---သဝီန့ၣ်လီၤ. သဝီဖိတနီၤ အဟံၣ်အဃီဘၣ်ဒိဟးဂီၤခီဖျိတၢ်ခးလီၤကျိဖးဒိၣ်အံၤအဃိန့ၣ်လီၤ. (တၢ်ဂီၤ- KHRG)
တၢ်ဂီၤတဘ့ၣ်အံၤဘၣ်တၢ်ဒိန့ၢ်အီၤဖဲလါစဲးပထ့ဘၢၣ် ၂၀၂၅ နံၣ်ဖဲဘက--သဝီ, ထံဝၣ်ဘျီကရူၢ်, တန့ဆါကီၢ်ဆၣ်, ဖၣ်အၣ်ကီၢ်ရ့ၣ်န့ၣ်လီၤ. တၢ်ဂီၤ အံၤပာ်ဖျါထီၣ်ဝဲသဝီဖိလၢအအိၣ်ဖဲဘသ---သဝီဒီးအစ---သဝီ, နိၣ်ဖိက ရူၢ်, ကီးတရံးကီၢ်ဆၣ်, ဒူပျာ်ယာ်ကီၢ်ရ့ၣ်လၢအဃ့ၢ်အိၣ်ကဒုသ့ၣ်တဖၣ် ထ့န့ၢ်ဝဲကုတကီၣ်တြၤလၢကဝံအီထံဒီးပာ်ကီၤအီထံအဂီၢ်ခီဖျိပယီၤသုး သ့ၣ်တဖၣ်ခးလီၤဒံးတၢ်ဖဲလါစဲးပထ့ဘၢၣ် ၂ သီ, ၂၀၂၅ နံၣ်အနံၤဖဲဘသ---သဝီဒီးအစ---သဝီန့ၣ်လီၤ. (တၢ်ဂီၤ- KHRG)
တၢ်ဂီၤသ့ၣ်တဖၣ်အံၤဘၣ်တၢ်ဒိးန့ၢ်အီၤလၢ KNU လီၢ်ကဝီၤပှၤဘၣ်မူဘၣ်ဒါအအိၣ်ဖဲတန့ဆါကီၢ်ဆၣ်, ဖၣ်အၣ်ကီၢ်ရ့ၣ်ဖဲလါမးရှး ၂၀၂၅ နံၣ်န့ၣ်လီၤ. ဖဲလါ မးရှး ၂၇ သီ, ၂၀၂၅ နံၣ်အနံၤ, ဂီၤခီ ၈း၀၃ အဆၢကတီၢ်, (MOC) (နီၣ်ဂံၢ်-၁၂), အိၣ်သူၣ်လီၤအသးဖဲလဲၣ်ဝးသုးဖီစုကဝဲၤဒိၣ်ခးလီၤဝဲကျိဖးဒိၣ် (၁၂၀ မမ) တဖျၢၣ်ဆူအဝ---သဝီ, ယီၣ်ကုာ်ကရူၢ်, တန့ဆါကီၢ်ဆၣ်ဒီးဒုးအိၣ်ထီၣ်ဝဲသဝီဖိသ့ၣ်တဖၣ်တၢ်ဘၣ်ဒိဘၣ်ထံးဒီးတၢ်ဟးဂူာ်ဟးဂီၤန့ၣ်လီၤ. တၢ်ဂီၤအဆိက တၢၢ်ခံဘ့ၣ်ပာ်ဖျါထီၣ်ဝဲလီၢ်ကဝီၤသဝီဖိတဂၤလၢအမံၤမ့ၢ်အူလ---တဂၤအဟံၣ်အူအီၣ်ကွံာ်ဝဲန့ၣ်လီၤ. တၢ်ဂီၤသၢဘ့ၣ်တဘ့ၣ်ပာ်ဖျါထီၣ်ဝဲထီးတဒုလၢအဘၣ် သံကွံဝဲလၢတၢ်ခးလီၤကျိဖးဒိၣ်အဃိန့ၣ်လီၤ. တၢ်ဂီၤလၢစုထွဲတဘ့ၣ်ပာ်ဖျါထီၣ်ဝဲဒီၤမ---လၢအမ့ၢ်အူလ---အမံၤပှၢ်တဂၤဒိးန့ၢ်ဘၣ်ဝဲတၢ်ကူစါယါဘျါသးဖဲ တၢ်ဟ့ၣ်ကသံၣ်ဒၢးတဖျၢၣ်လၢအအိၣ်ဖဲအပ---သဝီ, နိၣ်က့ၣ်ကရူၢ်, တန့ဆါကီၢ်ဆၣ် ဖဲအဝဲဘၣ်ဒိဝဲလၢတၢ်ခးလီၤကျိဖးဒိၣ်လၢအလီၤတဲာ်ဖဲအဝ---သဝီဖဲ အဟံၣ်ဝံၤအလီၢ်ခံန့ၣ်လီၤ. (တၢ်ဂီၤ- KNU လီၢ်ကဝီၤခိၣ်နၢ်)
Print: