ကဘီယူၤဟဲခးလီၤတၢ်ဖဲလၢၢ်ဒိၣ်စိကီၢ်ဆၣ်

ဖဲလါယနူၤအါရံၤ ၁၀ သီ, ၂၀၂၆ နံၣ်အနံၤ, မုၢ်ဃ့ၢ်လီၤ ၁ နၣ်ရံၣ် ဒီး ၂ နၣ်ရံၣ်အဘၢၣ်စၢၤ အဆၢကတီၢ်,  SAC [ပယီၤသုး] အက ဘီယူၤလၢ အအိၣ်လၢဘျံး (မြိတ်) ဝ့ၢ်, လၢၢ်မုၢ်လါကီၢ်ဆၣ်, ဘျံးဒဝဲၢ်ကီၢ်ရ့ၣ်န့ၣ်ဟဲခးလီၤတၢ်ဖဲ အအ---သဝီ, (တၢ်သ့ၣ်ညါ စ့ၢ်ကီးလၢ အဘ---) သဝီ, ကမိၤသွ့ကရူၢ်, လၢၢ်ဒိၣ်စိကီၢ်ဆၣ်, ဘျံးဒဝဲၢ်ကီၢ်ရ့ၣ်အပူၤန့ၣ်လီၤ. ကဘီယူၤအံၤ ဟဲယူၤဃီၤလၢ [အအ---သဝီ] မုၢ်ထီၣ်တပၤဒီး ခးလီၤတၢ်ဝံၤက့ၤယူၤကွံာ်ဝဲဆူ [သဝီ] မုၢ်နုာ်တကပၤန့ၣ်လီၤ.  ကဘီယူၤအကလုာ်န့ၢ်မ့ၢ်ဝဲ ကဘီယူၤဒုးသုးဒီး, အလွဲၢ်မ့ၢ်မူခိၣ်လွဲၢ် အလုးန့ၣ်လီၤ. ကဘီယူၤဟဲတ့ၢ်လီၤဝဲ ပီၣ် (၂၅၀) မ့ၣ်ပိၢ်ခံဖျၢၣ်ဒီး ခးလီၤစ့ၢ်ကီး [ကျိ] အီၣ်လံၤကၢၤ [လၢအအိၣ်လၢကဘီယူၤပူၤဒီး] [ ခးလီၤဝဲဒၣ်တကတီၢ်ဃီန့ၣ်လီၤ]. မ့ၣ်ပိၢ်တဖၣ်လီၤ တဲာ်ဝဲလၢ ကညီဒီကလုာ်စၢဖှိၣ်ကရၢ (KNU) ကီၢ်ဆၣ်ဝဲၤဒၢး ဖဲအအ---သဝီပူၤန့ၣ်လီၤ. [ပှၤသဝီဖိလၢ အဟဲအိၣ်ခိးတၢ်ဒ်သိး ကတီၣ်ထီၣ်ဂ့ၢ်ဝီလၢ အဘၣ်ဃးဒီးသဲစးတဖၣ် အိၣ်ဝဲဖဲ KNU ဝဲၤဒၢးကရၢၢ်ပူၤန့ၣ်လီၤ.] မ့ၣ်ပိၢ်ခံဖျၢၣ် လီၤတဲာ်ဝဲဒီး အဘၢၣ်စၢၤကအိၣ်ဒၣ်ထဲ လွံၢ်ချံ ဒီးယဲၢ်ချံ [၇ မံထၢၣ်တုၤ  ၉ မံထၢၣ်] န့ၣ်လီၤ. ကဘီယူၤဟဲခးလီၤတၢ်အံၤဘၣ်သံကွံာ် ဖိသၣ်ပိာ်မုၣ်တဂၤ ဒီး ဘၣ်ဒိ [ပှၤသဝီဖိ ၉ ဂၤ] ပိာ်မုၣ်နွံဂၤ, ပိာ်ခွါတဂၤ, ဒီး ဖိသၣ်ပိာ်မုၣ်ဖိတဂၤန့ၣ်လီၤ.

ဖိသၣ်ပိာ်မုၣ်ဖိလၢအသးသမူဟးထီၣ်ကွံာ်တဂၤအမံၤမ့ၢ်  နီၢ်အ--- န့ၣ်လီၤ. အဝဲဘၣ်ဒိဝဲနးနးကလဲာ် ဖဲအဖံဘၣ်ခိၣ်ဒီး လၢခံ အသးသမူဟးထီၣ်ကွံာ် ဝဲလၢ [ဟံၣ်တဖျၢၣ်ပူၤ] ဖဲ KNU ဝဲၤဒၢးကရၢၢ်ပူၤန့ၣ်လီၤ. အဝဲသးနံၣ်အိၣ် ၂ နံၣ်န့ၣ်လီၤ. [တၢ်သူၣ်ထီၣ်ဖဲဝဲၤဒၢးအကရၢၢ်ပူၤဒီး မ့ၣ်ပိၢ် လီၤတဲာ်ပိၢ်ထီၣ်အလီၢ် အဘၢၣ်စၢၤကအိၣ်ဝဲသၢချံ (၅ မံးထၢၣ်) န့ၣ်လီၤ. ကညီပိာ်မုၣ်ကရၢ (KWO) ဆီၣ်ထွဲမၤစၢၤဝဲဒၣ် နီၢ်အ--- ဒီးအမိၢ် ဒ်သိးအကလဲၤတီၣ်ထီၣ် တၢ်ဂ့ၢ်လၢအဘၣ်ဃးဒီးသဲစး တကပၤ ဖဲ KNU ဝဲၤဒၢးန့ၣ်လီၤ. မ့မ့ၢ်လၢတၢ်ဂ့ၢ်တခီ လၢ သဝီဖိအတၢ်ဘံၣ်တၢ်ဘၢအဂီၢ် တၢ်တပာ်ဖျါဝဲဘၣ်န့ၣ်လီၤ.]

ဖိသၣ်ပိာ်မုၣ်လၢအဘၣ်ဒိဖဲ အနၣ်သက့ၤထံးတဂၤ အမံၤမ့ၢ်ဝဲ ဘ--- န့ၣ်လီၤ. တၢ်ကဲထီၣ်သးအဆၢကတီၢ် အဝဲအိၣ်စ့ၢ်ကီး ဖဲ KNU ကီၢ်ဆၣ်ဝဲၤဒၢးအပူၤန့ၣ်လီၤ. အဝဲသးနံၣ်အိၣ် ၂ နံၣ်ဒီး အဝဲမ့ၢ်စ့ၢ်ကီး KWO အပှၤမၤသကိးတၢ် အဖိမုၣ်တဂၤ ဖဲလၢၢ်ဒိၣ်စိ ကီၢ်ဆၣ်အပူၤန့ၣ်လီၤ.

ပှၤအဂၤလၢအဘၣ်ဒိသ့ၣ်တဖၣ်လၢအမ့ၢ် ပိာ်မုၣ်နွံဂၤဒီး ပိာ်ခွါတဂၤန့ၣ် မ့ၢ်ပှၤထံဖိကီၢ်ဖိတဖၣ်လၢ အမၤတၢ်လၢ ထံကီၢ်တၢ်ပၢတၢ်ပြးသုးကီၣ်ကးကရၢ [ပယီၤသုး] အစုဒုၣ်တီၤဖီလာ်န့ၣ်လီၤ. အဝဲသ့ၣ်နုာ်လီၤပၣ်ဃုာ်ဝဲလၢ ၂၀၂၅ နံၣ် (ပယီၤသုး) မၤတၢ်ဃုထၢ [တၢ်ဟ့ၣ်တၢ်ဖးတၢတဘျီ ဖဲလါဒံၣ်စဲဘၢၣ် ၂၈ သီ, ၂၀၂၅ အနံၤ] ဖဲ အဘ--- ဝ့ၢ်, လၢၢ်ဒိၣ်စိကီၢ်ဆၣ် န့ၣ်လီၤ. အဝဲသ့ၣ်ဆီၣ်ထွဲဝဲ တၢ်ဃုထၢတၢ်ဖး [လၢအတလီၤတံၢ်လီၤဆဲးဘၣ်], ဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA) သုးရ့ၣ်နီၣ်ဂံၢ် ၁၀ ဖီၣ်ဃာ် အဝဲသ့ၣ်န့ၣ်လီၤ. [တၢ်ဒုးဃာ်အဝဲသ့ၣ်လၢ ဒၢးဆံးဖိတဖျၢၣ်အပူၤဖဲ KNU ကီၢ်ဆၣ်ရူကရၢၢ်ပူၤဒီး စးထီၣ်လၢလါဒံၣ်စဲဘၢၣ်လၢာ်တုၤလါယနူၤအါရံၤ ၂၀၂၆ နံၣ်န့ၣ်တၢ်တဒုးဟးထီၣ်အဝဲသ့ၣ်လၢသဝီပူၤဘၣ်န့ၣ် လီၤ.]

လၢတၢ်န့ၢ်အဃိ, ဖဲကဘီယူၤဟဲခးလီၤတၢ်အဆၢကတီၢ်, [မ့ၣ်ပိၢ်လီၤတဲာ်လီၢ်ဒီး တၢ်သူၣ်ထီၣ်အလီၢ် အယံၤကအိၣ်ဒၣ်ထဲ လွံၢ်ချံဒီး ယဲၢ်ချံ (၇ မံထၢၣ်ဒီး ၉ မံထၢၣ်) ဒီး] အဝဲသ့ၣ်ဘၣ်ဒိဝဲဒၣ်ကိးဂၤဒဲးန့ၣ်လီၤ. အဝဲသ့ၣ်ဒိးန့ၢ်ဘၣ်တၢ်ကူဆါယါဘျါဖဲ [ကညီ ဆူၣ်ချ့မၤစၢၤဝဲၤကျိၤ (KDHW) အပှၤကွၢ်ထွဲတၢ်တဖၣ်အအိၣ်] ဒီး [လီၢ်ကဝီၤ KNU ကီၢ်ဆၣ်ပှၤဘၣ်မူဘၣ်ဒါ] ခိၣ်နၢ် တဂၤ ပျၢ်ကွံာ်အဝဲသ့ၣ်န့ၣ်လီၤ. ဘၣ်မနုာ်အဃိလဲၣ်န့ၣ်, ပှၤ [လၢသဝီပူၤ] တဖၣ်တူၢ်ဘၣ်ဝဲလၢ တၢ်ဘံၣ်တၢ်ဘၢ တအိၣ်လၢ အဝဲသ့ၣ်အဂီၢ်နီတဂၤဘၣ် ခီဖျိကဘီယူၤဟဲခးလီၤတၢ်အဃိန့ၣ်လီၤ.

ပှၤ [ထံဖိကီၢ်ဖိ အတၢ်မၢဖိလၢတၢ်ဒုးဃာ်ဃိးဂၤ] လၢအဘၣ်ဒိသ့ၣ်တဖၣ်တၢ်ပာ်ဖျါဝဲ ဒ်အဖီလာ်အသိးန့ၣ်လီၤ -

• မၣ် ဆ--- (သးနံၣ် ၃၇ နံၣ်),
• မၣ် ဒ--- (သးနံၣ် ၅၀ နံၣ်),
• မၣ် ဃ--- (သးနံၣ် ၃၉ နံၣ်),
• မၣ်ခၠ--- (သးနံၣ် ၅၂ နံၣ်),
• မၣ်ဂ--- (သးနံၣ် ၄၅ နံၣ်),
• မၣ်ဟ--- (သးနံၣ် ၂၇ နံၣ်),
• မၣ်ဧ--- (သးနံၣ် ၄၆ နံၣ်), ဒီး
• ကိၤ သ--- (သးနံၣ် ၃၃ နံၣ်) တဖၣ်န့ၣ်လီၤ.

[ဘၣ်ဃးဒီးတၢ်ဂ့ၢ်တၢ်ကျိၤအလၢအပှဲၤ လၢအဘၣ်ဃးဒီးပှၤဘၣ်ဒိသ့ၣ်တဖၣ်အံၤန့ၢ် KHRG ပျီပူၤပှၤမၤတၢ်ဖိ တသ့ၣ်ညါဝဲဘၣ် န့ၣ်လီၤ.]

ခီဖျိလၢကဘီယူၤဟဲခးလီၤတၢ်အဃိ, ကသံၣ်ဒၢးတဖျၢၣ်လၢ KDHW ပၢဆှၢအီၤ [ဖဲအအ---သဝီပူၤ] ဒီး ပှၤသဝီဖိ အတၢ်သူၣ်အီၣ်ဖျးအီၣ်လီၢ်အကျဲသ့ၣ်တဖၣ် ဘၣ်ဟးဂီၤကွံာ်ဝဲဒၣ် [စ့ၢ်ကီး] န့ၣ်လီၤ. ဒ်န့ၢ်အသိးကဘီယူၤ ဟဲခးလီၤတၢ် အတၢ်ကဲထီၣ်သးအံၤအဃိတၢ်ပျံၤတၢ်ဖုးအိၣ်ဒိၣ်ထီၣ်လၢ [သဝီဖိတဖၣ်] အကျါ ဒီး တကးဒ်ဘၣ်ကၠိဖိဒီးသရၣ်မုၣ် သ့ၣ်တဖၣ်ဘၣ်ဃ့ၢ်အိၣ်ကွံာ်ဝဲလၢ တၢ်လီၢ်လၢအဘံၣ်အဘၢအဂၤတတီၤ ဒ်သိးကဆဲးမၤလိဘၣ်ဒ်တၢ်အဂီၢ်န့ၣ်လီၤ. ဘၣ်ဆၣ် သဝီတနီၤန့ၣ်, ကၠိဖိတဖၣ်ဘၣ်ဒိးစဲးဆိကွံာ်ဝဲဒၣ်န့ၣ်လီၤ. သဝီဖိတနီၤပျံၤတၢ်ဒိၣ်တလၢ တုၤအအိၣ်က့ၤလၢ [အအ---]သဝီပူၤ တဘူၣ်လၢၤဘၣ် ဒီးလဲၤအိၣ်က့ၤလၢ အတၢ်ဖံးအီၣ်မၤအီၣ်အလီၢ်လၢအအိၣ်ယံၤဝဲဒီးဒူသဝီန့ၣ်လီၤ.