DKBA မၢဆူၣ်ဝဲသဝီဖိသ့ၣ်တဖၣ်လၢကဆှၢပှၤသုးဖိဒီးတၢ်ပီးတၢ်လီတဖၣ်

ဖဲလါဖ့ၤဘြူၤအါရံၤ ၂၀၂၁ နံၣ် သုးဟံးန့ၢ်ဆူၣ်ထံကီၢ်တၢ်စိတၢ်ကမီၤဝံၤအလီၢ်ခံ KNLA [ကညီဒီကလုာ်တၢ်ထူၣ်ဖျဲးသုးမုၢ်ဒိၣ်] ဒီး PDF [ကမျၢၢ်တၢ်ဒီသဒၢသုး] တဖၣ် မၤဟးဂီၤဝဲကွံာ်ဝဲဒၤလံၤတိၤလၢအအိၣ်ဖဲ ကၠၤအ့ဆ့ၣ်ကၠံဝ့ၢ် [လီၢ်ကဝီၤပူၤဘၣ်တၢ်သ့ၣ်ညါစ့ၢ် ကီးအီၤလၢဆ့ၣ်ကၠံဝ့ၢ်], နိၣ်တကီကီၢ်ဆၣ်, ဒူပျာ်ယာ်ကီၢ်ရ့ၣ် ဒီး အဆ--- သဝီ, [ကရူၢ်တအိၣ်], ကြုၢ်တုကီၢ်ဆၣ်, ဒူပျာ်ယာ်ကီၢ် ရ့ၣ် အဘၢၣ်စၢၤ ဒ်သိးကဒီၣ်တဲာ်ကွံာ်ဝဲ [ဝံစိာ်တီဆှၢ] အတၢ်ဘၣ်ထွဲလၢ ကီၢ်ပယီၤသုးဖိတဖၣ်အဘၢၣ်စၢၤန့ၣ်လီၤ. လၢတၢ်န့ၣ် အဃိ ကီၢ်ပယီၤသုးဖိတဖၣ်သူဝဲတိၤတဘိၣ်အံၤလၢ တၢ်လဲၤထီၣ်က့ၤလီၤအဂီၢ်တသ့လၢၤဘၣ်န့ၣ်လီၤ. တိၤတဘိအံၤ မ့ၢ်တ့ၢ်ဝဲ တိၤတဘိလၢအရ့ဒိၣ်ဒိၣ်နီၢ်မးလၢ ကီၢ်ပယီၤသုးဖိလၢအအိၣ်ဖဲခၠီနခွၣ်သုးကလၢၤတဖၣ်အဂီၢ် လၢကမၤဘၣ်ထွဲလိာ်အသးဒီးသုး ဖိလၢအအိၣ်ဖဲ ကၠၤအ့ဆ့ၣ်ကၠံဝ့ၢ်သုးကလၢၤတဖၣ်န့ၣ်လီၤ. ဒ်ကီၢ်ပယီၤသုးမီၤစိရိၤအတၢ်တိာ်ကျဲၤအိၣ်လၢ ကမၤဝဲတၢ်ဃုထၢဖဲ လါဒံၣ်စ့ဘၢၣ် ၂၀၂၅ နံၣ်ပူၤအသိး အဝဲသ့ၣ်ဂုာ်ကျဲးစၢၤသူဝဲကျဲအကလုာ်ကလုာ် ဒ်သိးကပၢဘၣ်က့ၤဝဲတိၤတဘိအံၤ [လၢအဝဲ သ့ၣ်ကဘှီဂ့ၤထီၣ်ဒီးသူဝဲတိၤအံၤအဂီၢ်] န့ၣ်လီၤ. ဖဲလါဒံၣ်စ့ဘၢၣ် ၂၀၂၅ နံၣ်အပူၤ ကီၢ်ပယီၤသုးမၤသကိးတၢ်ဒီး ဒံၣ်မိၣ်ခြဲၣ်ထ့ၣ် ကညီတၢ်ဘၣ်ဘျုးဘၣ်ဖှိၣ်သုးမုၢ်ဒိၣ် (DKBA) သုးခိၣ်နၣ်ကျဲၣ်ဒီး ဆှၢလီၤအါထီၣ်ဝဲအပှၤသုးဖိတဖၣ်အဃိ အဝဲသ့ၣ်န့ၢ်ပၢဘၣ် က့ၤဝဲဒၤလံၤတိၤဒီး ကျဲလၢအအိၣ်ဟဲလၢကၠၤအ့ဆ့ၣ်ကၠံဝ့ၢ်တဘိန့ၣ်လီၤ.

ဖဲလါဒံၣ်စ့ဘၢၣ် ၁၀ သီ, ၂၀၂၅ နံၣ်အနံၤ ကဘၣ်ဖဲဂီၤခီ ၈ နၣ်ရံၣ်အဆၢကတီၢ် DKBA သုးဖိလၢအအိၣ်လၢ သုးခိၣ်နၣ်ကျဲၣ်အ စုတီၤဖီလာ်တဖၣ် မၢဆူၣ်ဝဲသဝီဖိလၢအမံၤမ့ၢ် အ---, လၢအအိၣ်ဖဲ အအ--- သဝီ, ဒၤလံၤကရူၢ်, နိၣ်တကီကီၢ်ဆၣ်ပူၤတဂၤလၢ ကတီဝဲကီၢ်ပယီၤသုးအတၢ်အီၣ်တၢ်အီ [ဒီးအသိလ့ၣ်] ဖဲ အဆ--- သဝီ ဒီးလဲၤဆှၢဆူ ဒၤလံၤတိၤန့ၣ်လီၤ. [လၢတၢ်ဘံၣ်တၢ်ဘၢ အဂီၢ်ဘၣ်တၢ်ပာ်ပၢဃာ်ဝဲတၢ်ဂ့ၢ်တၢ်ကျိၤလီၤတံၢ်လီၤဆဲး.] DKBA မၢဆူၣ်ဝဲ အ--- လၢ ကတီဆှၢန့ၢ်ဝဲသုးတၢ်အီၣ်တၢ်အီခံဘျီန့ၣ် လီၤ. တၢတဘျီ [လၢအပူၤကွံာ်တၢ်တသ့ၣ်ညါလီၤတံၢ်မုၢ်နံၤမုၢ်သီ] အ--- ဘၣ်တီဆှၢန့ၢ်ဝဲဟုသး ၁၀၀ ထၢၣ် (တထၢၣ် အတယၢၢ်ဃၢဝဲ ၅၀ ကံလိ). အ--- ဘၣ်ယိၣ်ဝဲလၢ DKBA သုးဖိတဖၣ် ကမၢဆူၣ်အီၤလၢကတီဆှၢန့ၢ်ကဒီးသုးတၢ်အီၣ်တၢ်အီ အဃိ အဝဲပာ်ခူသူၣ်ဃာ်အသိလ့ၣ်န့ၣ်လီၤ. ဘၣ်ဆၣ်သနာ်က့ DKBA သုးဖိတဖၣ်မၢဆူၣ်ကဒီးအီၤလၢ ကတီဆှၢန့ၢ်ဝဲသုးတၢ် အီၣ်တၢ်အီ [ဖဲလါဒံၣ်စ့ဘၢၣ် ၁၀ သီအနံၤ] န့ၣ်လီၤ. အ--- စံးဝဲ, “ခံဘျီတဘျီန့ၣ် ပှၤလၢအမၢဆူၣ်ယၤလၢယကလဲၤန့ၣ်မ့ၢ်စ့ၢ်ကီး DKBA သုးဖိတဖၣ်လီၤ. ယတဲအီၤလၢယလဲၤတဘူၣ်ဘၣ်. အဝဲသ့ၣ်တဲလၢတဘၣ်နီမံၤဘၣ်ဒီး [အဝဲသ့ၣ်] ကဟံမူဒါလီၤ. ယတဲ အဝဲသ့ၣ်လၢ, ‘သုလဲၤစိာ်ယသိလ့ၣ်သ့ ဘၣ်ဆၣ်ယတလဲၤပိာ်သုခံဘၣ်.’ ဘၣ်ဆၣ် DKBA သုးဖိတဂၤတဲဝဲ, ‘ယတလဲၤစိာ် [သိ လ့ၣ်] ဘၣ်. နကဘၣ်နီလၢနကစၢ်လီၤ. ယနီသိလ့ၣ်တသ့ဘၣ်.’”

အ--- လဲၤနီဆှၢဝဲ DKBA သုးဖိတဖၣ်ဆူ အဆ--- သဝီန့ၣ်လီၤ. ဖဲအလဲၤတုၤဖဲသဝီအံၤအဆၢကတီၢ် လၢကဘၣ်တီဆှၢဝဲသုး တၢ်အီၣ်တၢ်အီအလီၢ် ဘၣ်တၢ်မၢဆူၣ်အီၤလၢတီဆှၢဝဲ ကီၢ်ပယီၤသုးဖိ (၃၀) ဂၤဃၣ်ဃၣ်န့ၣ်လီၤ. ဖဲလါဒံၣ်စ့ဘၢၣ် ၁၀ သီ, ၂၀၂၅ နံၣ်အနံၤ ကဘၣ်ဖဲဂီၤခီ ၁၀ နၣ်ရံၣ် ဖဲအဝဲသ့ၣ်လဲၤဆူဒၤလံၤတိၤအဆၢကတီၢ် KNLA သုးပာ်ဖှိ ဒီး PDF သုးဖိတဖၣ်ခိးခး ဒီးထုးအဝဲသ့ၣ်ဒီးမ့ၣ်ပိၢ်ထုးပျံၤ လၢဘၣ်တၢ်ဒိးလီၤဃာ်အီၤ [လၢအအိၣ်ဒီးအမဲာ်ခွဲးလၢ KNLA/PDF ထုးပိၢ်ဖးအီၤန့ၢ်] တဖျၢၣ်န့ၣ် လီၤ. ခီဖျိဘၣ်တၢ်ခိးခးတၢ်အံၤအဃိ အသိလ့ၣ်အူအီၣ်ကဲၤထီၣ်ကွံာ်ဝဲဒီး ကီၢ်ပယီၤသုးဖိတနီၤသံကွံာ်ဝဲဒီးတနီၤဘၣ်ဒိဝဲဒၣ်န့ၣ် လီၤ. အ--- စံးအါထီၣ်ကဒီးဝဲ, “အဆိကတၢၢ်ယနၢ်ဟူဝဲတၢ်ကလုၢ်သီၣ် ‘အူၤ.’ ဒီး ယနၢ်ဟူကျိဖိသီၣ်တထံၣ်ခံထံၣ်လီၤ. ဖဲယ ဃၣ်ကဒါက့ၤယလီၢ်ခံအခါ ယထံၣ်လၢသိလ့ၣ်အံၤကဲၤထီၣ်လီၤ. ယဆိမိၣ်လၢယကဖုလီၤလၢသိလ့ၣ်ပူၤဘၣ်ဆၣ် DKBA သုးဖိ တဂၤမၢယဆဲးနီသိလ့ၣ်အံၤလီၤ. ယဆဲးနီကယံာ်ဝဲတမံးနံးဃၣ်ဃၣ်ဒီး ယဖုလီၤကွံာ်လၢသိလ့ၣ်ပူၤ ဖဲပလဲၤတုၤဖဲဒၤလံၤတိၤအ ဆၢကတီၢ်လီၤ. ဝံၤအလီၢ်ခံ သိလ့ၣ်အံၤအူအီၣ်ကွံာ်ဝဲဒီတခိၣ်ဒီးပိၢ်ဖးထီၣ်ကွံာ်ဝဲဒၣ်လီၤ. ” [လၢတၢ်ကဲထီၣ်သးအံၤအပူၤ အ--- တဘၣ်ဒိဘၣ်ထံးဘၣ်လီၤ.]

အ--- အသိၣ်လ့ၣ်အံၤ အဝဲပှ့ၤဘၣ်ဝဲ ၈၀,၀၀၀,၀၀၀ ကၠးဒီး အဝဲဒိးသန့ၤထီၣ်အသးလၢသိလ့ၣ်အံၤ လၢကဆီၣ်ထွဲဝဲအဟံၣ်ဖိ ဃီဖိအဂီၢ်န့ၣ်လီၤ. ဒ်အမ့ၢ်ပှၤနီသိလ့ၣ်ဖိတဂၤအသိး ဖဲအသိလ့ၣ်အူထီၣ်ဟးဂီၤဝံၤအလီၢ်ခံ အဝဲဘၣ်ကွၢ်ဆၢၣ်မဲာ်ဒီးတၢ်ကီတၢ်ခဲ တဖၣ် လၢကဆဲးမၤဝဲအတၢ်လုၢ်အီၣ်နီၢ်ခိသးသမူအတၢ်ဖံးတၢ်မၤ လၢကဆီၣ်ထွဲဝဲအဟံၣ်ဖိဃီဖိအဂီၢ်န့ၣ်လီၤ. အ--- လဲၤဝဲဆူ သုးခိၣ်နၣ်ကျဲၣ်အအိၣ်ဒ်သိးကထံၣ်လိာ်အသးဒီးအီၤ ဘၣ်ဆၣ်အဝဲတထံၣ်လိာ်ဘၣ်အသးဒီးအီၤဘၣ်လီၤ. အ--- ထံၣ်လိာ်သး ဒီး DKBA သုးဖိတဂၤဒီး သုးဖိတဂၤအံၤစံးဘၣ်အီၤလၢ တၢ်ဂ့ၢ်လၢအဘၣ်ဃးဒီးသိလ့ၣ်အူအီၣ်အံၤ ဘၣ်တၢ်ဆှၢထီၣ်အီၤဆူခိၣ်နၢ် တဖၣ်အအိၣ်လံန့ၣ်လီၤ. ဘၣ်ဆၣ်သနာ်က့ ဖဲလါယနူၤအါရံၤ ၂၀၂၆ အပူၤန့ၣ် အ--- တဒိးန့ၢ်ဘၣ်တၢ်စံးဆၢလၢ DKBA သုးဖိ တဖၣ်အအိၣ်နီတမံၤဒံးဘၣ်န့ၣ်လီၤ.

ကီၢ်ပယီၤသုးအတၢ်ခးလီၤကျိဖးဒိၣ်အဃိဟံၣ်တဖျၢၣ်ဒီးတၢ်သူၣ်တၢ်ဖျးအလီၢ်တတီၤဘၣ်ဒိဟးဂီၤကွံာ်ဝဲ

ဖဲလါယနူၤအါရံၤ ၆ သီ, ၂၀၂၆ နံၣ်အနံၤ KNLA သုးပာ်ဖှိၣ် [ဒီး PDF သုးဖိတဖၣ်] လဲၤခးဝဲ [ကီၢ်ပယီၤသုး] ခီၣ်သုးရ့ၣ် (ခလ ရ) နီၣ်ဂံၢ် (၃၂) လၢအအိၣ်ဆီလီၤအသးဖဲ ကီၢ်ပယီၤသုးတၢ်ပၢဟီၣ်ကဝီၤ ဖဲနိၣ်တကီကီၢ်ဆၣ် အပူၤန့ၣ်လီၤ. ကဘၣ်ဖဲ ၁၁ နၣ် ရံၣ်အဆၢကတီၢ် ကီၢ်ပယီၤသုးဖိသ့ၣ်တဖၣ်ခးလီၤနါစိၤဝဲကျိဖးဒိၣ် (၈၁ မမ) ဒီး (၁၂၀ မမ) သ့ၣ်တဖၣ်ဆူ သဝီတဖၣ်လၢအ အိၣ်ဘူးဒီးအဝဲသ့ၣ်အဟီၣ်ကဝီၤန့ၣ်လီၤ. ကျိဖးဒိၣ်ချံသ့ၣ်တဖၣ်လီၤတဲာ်လၢ အဘ--- သဝီ ဒီး အဒ--- သဝီ, နိၣ်တကီကရူၢ်, နိၣ်တကီကီၢ်ဆၣ်အပူၤန့ၣ်လီၤ. သဝီခံဖျၢၣ်အံၤအိၣ်ဘူးလိာ်အသးဒီး အိၣ်ဝဲလၢ ကညီဒီကလုာ်စၢဖှိၣ်ကရၢ (KNU) အတၢ်ပၢ ဆှၢဖီလာ်န့ၣ်လီၤ. ကျိဖးဒိၣ်ချံအကျါတဖျၢၣ်န့ၣ်လီၤတဲာ်လၢ အဘ--- သဝီပူၤဖဲ နီၢ်ဘ--- (သးနံၣ် ၃၈ နံၣ်) တဂၤအဟံၣ်လီၢ်ခံ အဃိ ဟံၣ်ခိၣ်ဒုး, ဃီၤထူၣ်ဒီးသဲးထူၣ်တဘျုးထူၣ်ဘၣ်ဒိဟးဂီၤကွံာ်ဝဲန့ၣ်လီၤ.

အဘ--- သဝီဖိ နီၢ်ဘ--- စံးဘၣ် KHRG လၢ, “ကျိဖးဒိၣ်ချံတၢတဖျၢၣ်လီၤတဲာ်လၢယဟံၣ်ကပၤဒီး ကျိဖးဒိၣ်အက့သ့ၣ်တဖၣ် ဖျိးပြံပြါဝဲ [ဘၣ်ဆၣ်တဘၣ်ဒိဟးဂီၤဟံၣ်ဘၣ်] လီၤ. ကျိဖးဒိၣ်ချံခံဖျၢၣ်တဖျၢၣ်လီၤတဲာ်ဖဲယဟံၣ်ကရၢၢ်ပူၤလီၤ. ဖဲကျိဖးဒိၣ်ချံအ တၢတဖျၢၣ်လီၤတဲာ်အဆၢကတီၢ် ဘၣ်ဖဲယဒီၣ်လီၤညၣ်ဃ့အဆၢကတီၢ်လီၤ. ဖဲန့ၣ်ယမိအိၣ်လၢဟံၣ်ပူၤလီၤ. ဘၣ်ဆၣ်အဝဲတဲ လၢ ကျိဖးဒိၣ်ချံအံၤလီၤတဲာ်ဘူးဒိၣ်မးအဃိ အဝဲဃ့ၢ်လီၤကွံာ်လၢဟံၣ်ဖီလာ်ဒီး အိၣ်ဝဲဖဲဟံၣ်ဖီလာ်လီၤ. ဝံၤအလီၢ်ခံ ယနၢ်ဟူက ဒီးဝဲတၢ်ခးထီၣ်ကျိဖးဒိၣ်ချံအသီတဖျၢၣ်လီၤ. ကျိဖးဒိၣ်ချံအံၤလီၤတဲာ်ဝဲဖဲလဲၣ်န့ၣ် ယတဲလီၤတံၢ်တဘၣ်ဘၣ်. လၢတၢ်န့ၣ်အဃိ ယဆၢတဲာ်လီၤယသးလၢယကလဲၤလီၤဆူဟံၣ်ဖီလာ်လီၤ. တချုးဒံးလၢယလဲၤတုၤဒံးဆူဟံၣ်အတြဲၤဖးဒိၣ်ဒံးဘၣ်န့ၣ် ကျိဖးဒိၣ် ချံအံၤလီၤတဲာ်ဝဲလီၤ. ယတူၢ်ဘၣ်လၢယနၢ်တအၢအဃိ ယတဲဘၣ်ယမိလၢယနၢ်တအၢလီၤ. ယဆိမိၣ်ယမ့ၢ်တဃ့ၢ်လီၤကွံာ်လၢ ဟံၣ်ဘၣ်န့ၣ် ယကဘၣ်ဒိဒီးကျိဖးဒိၣ်အက့သ့ၣ်တဖၣ်လီၤ.” [တၢ်ကဲထီၣ်သးအံၤဝံၤအလီၢ်ခံ နီၢ်ဘ--- တဘၣ်ဒိးကူစါယါဘျါအ သးဘၣ်.]

သဝီဖိတဖၣ်ပာ်ဖျါထီၣ်သးထီဒါဝဲသုးမီၤစိရိၤအတၢ်ဃုထၢ

ဖဲလါယနူၤအါရံၤ ၉ သီ, ၂၀၂၆ နံၣ်အနံၤဂီၤခီ ၉ နၣ်ရံၣ်အဆၢကတီၢ် သဝီဖိဒီးသူၣ်ဘီၣ်သးစၢ်လၢအအိၣ်ဖဲ ကီၢ်ဆၣ်လွံၢ်ဘ့ၣ် လၢာ်ဖဲ [ဒူပျာ်ယာ်] ကီၢ်ရ့ၣ်ပူၤတဖၣ်ပာ်ဖျါထီၣ်အသးလၢတၢ်လီၢ်တဘျုးတီၤန့ၣ်လီၤ. ဖဲနိၣ်တကီကီၢ်ဆၣ်အပူၤန့ၣ် သဝီဖိသ့ၣ် တဖၣ်ပာ်ဖျါထီၣ်အသးလၢတၢ်လီၢ်လွံၢ်တီၤ [ဖဲနိၣ်တီၤပျၢ်ကရူၢ်, နိၣ်တကီကရူၢ်, ဝၣ်မၢ်ကရူၢ်, ဒီးလ့ဝၣ်ဖျိကရူၢ်ပူၤ] လၢကထီဒါဝဲ တၢ်ဟ့ၣ်တၢ်ဖး [ခံဝီတဝီ ဒီး သၢဝီတဝီ] လၢ SAC [ထံကီၢ်တၢ်ပၢတၢ်ပြးကီၣ်ကးကရၢ ခဲအံၤဘၣ်တၢ်သ့ၣ်ညါအီၤဒ်ကီၢ်ပယီၤသုး မီၤစိရိၤ] ကမၤဝဲဖဲ လါယနူၤအါရံၤ ၂၀၂၆ နံၣ် [ဖဲ ၁၁ သီ ဒီး ၂၅ သီ] န့ၣ်လီၤ. လၢတၢ်န့ၣ်အဃိဖဲဂီၤခီ ၉ နၣ်ရံၣ်အဆၢကတီၢ် ပှၤ နီၣ်ဂံၢ် (၆၀၀) ဂၤဃၣ်ဃၣ် လၢအအိၣ်ဖဲကရူၢ်ခံဘ့ၣ်အပူၤလၢအမ့ၢ် နိၣ်တကီကရူၢ် ဒီး နိၣ်တီၤပျၢ်ကရ့ၣ် ပူၤတဖၣ်ပာ်ဖျါထီၣ်အ သးဖဲ အဃ--- သဝီပူၤန့ၣ်လီၤ. ဖဲတၢ်ပာ်ဖျါထီၣ်သးအဆၢကတီၢ် အဝဲသ့ၣ် [သဝီဖိတဖၣ်] ကိးသတြီထီၣ်ဝဲတၢ်ဂ့ၢ်ဃုထံၣ် [လၢ အထီဒါဝဲတၢ်ဃုထၢအံၤ] န့ၣ်လီၤ. တၢ်ကိးသတြီထီၣ်တဖၣ်မ့ၢ်ဝဲ:

၁. ပတလိၣ်ဘၣ်ပဒိၣ်ပပှၢ်လၢအမၤဆူးမၤဆါမၤသံထံဖိကီၢ်ဖိဘၣ်.

၂. ပတအဲၣ်ဒိးလၢသုးမီၤစိရိၤကမၤဝဲတၢ်ဃုထၢအယီၤအဘျၣ်အံၤဘၣ်.

၃. ပတအဲဒိးသုးမီၤစိရိၤသနူဒီးကလုာ်ဒိၣ်စိသနူဘၣ်.

၄. တၢ်သူၣ်ထီၣ်တၢ်ဃူတၢ်ဖှိးလၢကလုာ်ဒူၣ်ခဲလၢာ်အဘၢၣ်စၢၤန့ၣ်မ့ၢ်ဝဲပခွဲးပယာ်လီၤ.

၅. တၢ်သူၣ်ထီၣ်ကီၢ်သူလ့ၤပဒိၣ်ပပှၢ်န့ၣ်မ့ၢ်ပခွဲးပယာ်လီၤ.

၆. ဟ့ၣ်တၢ်ဖးလၢ ၂၀၂၆ နံၣ်ထွံၣ်သုး [ကီၢ်ပယီၤသုးမီၤစိရိၤ] အတၢ်ထူၣ်ဖျဲးအကျိၤအကျဲ [တၢ်ကူၣ်တရံးလၢတၢ်သု တပာ်ပနီၣ် အီၤဒ်သုးပၢဆူၣ်ပၢစိးတၢ်ဒီးကပာ်ပနီၣ်အီၤဒ်ပဒိၣ်လၢအဖိးသဲစး] တဂ့ၤ ဒီး ပာ်ဖျါထီၣ်သးထီဒါအီၤ.

အဝဲသ့ၣ်ပာ်ဖျါထီၣ်အတၢ်ထီဒါဒီး ကိးသတြီထီၣ်ဝဲတၢ်ဂ့ၢ်တဖၣ်အံၤယံာ်ဝဲတနၣ်ရံၣ်န့ၣ်လီၤ.

ဒ်လီၢ်ကဝီၤ [KNU] ခိၣ်နၢ်တဂၤလၢအမံၤမ့ၢ် စီၤဆ--- ပာ်ဖျါထီၣ်ဝဲအသိး ကီၢ်ပယီၤသုးတဖၣ်တိာ်ပာ်ဝဲလၢ ကမၤဝဲတၢ်ဃုထၢသၢ ဘျီတဘျီဖဲ နိၣ်တကီကီၢ်ဆၣ်အပူၤဖဲ လါယနူၤအါရံၤ ၂၅ သီ, ၂၀၂၆ နံၣ်အနံၤန့ၣ်လီၤ. တၢ်ဟ့ၣ်တၢ်ဖးအလီၢ်အိၣ်ဝဲဃုတီၤဖဲ [ကၠၤအ့စ့ၣ်ကၠံ] ဝ့ၢ်ပူၤဒီး တၢ်ဟ့ၣ်တၢ်ဖးအဂၤသၢတီၤန့ၣ်အိၣ်လၢဝ့ၢ်ချၢ လၢသဝီသ့ၣ်တဖၣ်အပူၤဖဲ နိၣ်တကီကီၢ်ဆၣ်အပူၤန့ၣ် လီၤ. တၢ်ဟ့ၣ်တၢ်ဖးအလီၢ်သ့ၣ်တဖၣ်အံၤ အိၣ်သူၣ်လီၤအသးဖဲ သၢတၢၤသဝီ ဒီး ကၠၤအ့သဝီ, နိၣ်တကီကရူၢ် ဒီး မ့ၤကလၢ်ကိ သဝီ, ကၠီးက့ခိၣ်ကရူၢ်အပူၤန့ၣ်လီၤ. စီၤဆ--- စံးစ့ၢ်ကီးဝဲလၢ ပှၤလၢအတတူၢ်လိာ်တၢ်ဃုထၢအယီၤအဘျၣ်အံၤ တမ့ၢ်ထဲပှၤကညီ ကလုာ်ဘၣ်ဒူၣ်ဧိၤဘၣ်. ပယီၤကလုာ်ဒူၣ်တဖၣ်စ့ၢ်ကီး တတူၢ်လိာ်ဝဲဒၣ်ဘၣ်န့ၣ်လီၤ. သဝီဖိသ့ၣ်တဖၣ်အံၤ ပာ်ဖျါထီၣ်သးထီဒါဝဲ တၢ်အံၤလၢ တၢ်သူၣ်ဆူၣ်သးဂဲၤအပူၤန့ၣ်လီၤ. သဝီနဲၣ်ရွဲၣ်လၢအမံၤမ့ၢ် စီၤဒ--- လၢအအိၣ်ဖဲ အရ--- သဝီ, မဲၣ်ပြးကရူၢ်, နိၣ်တကီ ကီၢ်ဆၣ်, လၢအနုာ်လီၤပၣ်ဃုာ်လၢ တၢ်ပာ်ဖျါထီဒါတၢ်အံၤတဂၤစံးဝဲလၢ, “မတဂၤမၣ်တမၢဆူၣ်ပှၤလၢ ပကပာ်ဖျါထီၣ်သးထီဒါ တၢ်ဘၣ်. ပနုာ်လီၤပၣ်ဃုာ်လၢတၢ်ပာ်ဖျါထီၣ်သးထီဒါတၢ်အံၤခီဖျိ ပတတူၢ်လိာ်တၢ်အံၤ [တၢ်ဃုထၢအယီၤအဘျၣ်] ဘၣ်လီၤ.”