ဖဲလါဖ့ၤဘြူၤအါရံၤ ၁၃ သီ, ၂၀၂၆ နံၣ်အနံ, ဟါခီ ၂း၀၀ နၣ်ရံၣ်အဆၢကတီၢ်, SAC [ထံကီၢ်တၢ်ပၢတၢ်ပြးကီၣ်ကးကရၢ, တၢ်သ့ၣ်ညါစ့ၢ်ကီးလၢအမ့ၢ်ကီၢ်ပယီၤသုး] ဒြိတဘ့ၣ်ဟဲတ့ၢ်လီၤဝဲမ့ၣ်ပိၢ်ခံဖျၢၣ်ဖဲအအ--- (တၢ်သ့ၣ်ညါစ့ၢ်ကီးအီၤဒ်အဘ---) သဝီ, ဝ့ၢ်ထူကရူၢ်, ဒီၣ်ဖါခိၣ်ကီၢ်ဆၣ်, တီအူကီၢ်ရ့ၣ်အပူၤန့ၣ်လီၤ. [ဖဲတၢ်ကဲထီၣ်သးအဆၢကတီၢ်န့ၣ်တၢ်ဒုးတၢ်ယၤတကဲထီၣ်သး ဘၣ်န့ၣ်လီၤ]. မ့ၣ်ပိၢ်တၢတဖျၢၣ်လီၤတဲာ်ဖဲသဝီချၢ [တၢ်ဘၣ်ဒိဘၣ်ထံးဒီးတၢ်ဟးဂူာ်ဟးဂီၤတအိၣ်ဘၣ်န့ၣ်လီၤ]. မ့ၣ်ပိၢ်ခံဖျၢၣ်တ ဖျၢၣ်လီၤတဲာ်ပိၢ်ဖးထီၣ်ဖဲသဝီခိၣ်ထိးဒီးဘၣ်ဟးဂီၤဝဲဟံၣ် (၆) ဖျၢၣ်န့ၣ်လီၤ.

ဖဲမ့ၣ်ပိၢ်တၢတဖျၢၣ်ပိၢ်ဖးထီၣ်ဝံၤအလီၢ်ခံသဝီဖိသ့ၣ်တဖၣ်ဃ့ၢ်အိၣ်ကဒုကွံာ်ဝဲဆူထံကျိကပၤလၢအအိၣ်ဘူးဒီးသဝီန့ၣ်လီၤ. လၢ တၢ်န့ၣ်အဃိဖဲမ့ၣ်ပိၢ်ခံဖျၢၣ်တဖျၢၣ်ပိၢ်ဖးထီၣ်ဖဲသဝီခိၣ်ထိးအဆၢကတီၢ်သဝီဖိသ့ၣ်တဖၣ်ထံၣ်ဝဲလၢတၢ်ခုၣ်ထီၣ်လၢတၢ်လီၢ်ဖဲန့ၣ် [သဝီခိၣ်ထီး] န့ၣ်လီၤ. ဖဲမ့ၣ်ပိၢ်ခံဖျၢၣ်တဖျၢၣ်ပိၢ်ဖးထီၣ်ဝံၤအလီၢ်ခံသဝီဖိသ့ၣ်တဖၣ်ဟဲက့ၤဆူသဝီပူၤဒီးကွၢ်က့ၤတၢ်ဘၣ်ဒိဘၣ် ထံးမနုၤအိၣ်လဲၣ်န့ၣ်လီၤ. သဝီဖိတဖၣ်ထံၣ်ဝဲဖံသးပှၢ်လၢအမံၤမ့ၢ်ဒီၤအ---, သးနံၣ် (၉၁) နံၣ် လၢဃ့ၢ်ပူၤဖျဲးအသးတချုး ဆၢချုးကတီၢ်ဘၣ်တဂၤခီဖျိအသးပှၢ်ဒီးဃ့ၢ်ဝဲတကဲဘၣ်အဃိန့ၣ်လီၤ. အဝဲဃ့ၢ်အိၣ်ခူသူၣ်ဖဲဟံၣ်တဖျၢၣ်အဖီလာ်န့ၣ်လီၤ. မ့ၣ်ပိၢ်ခံဖျၢၣ်တဖျၢၣ်လီၤတဲာ်ပိၢ်ဖးထီၣ်ဖဲ [တဃ့ၣ်ထူၣ်], ဘူးဒီးတၢ်လီၢ်လၢအဝဲဃ့ၢ်အိၣ်ခူသူၣ် န့ၣ်လီၤ. [အဝဲတဘၣ်ဒိဝဲနီတ ထံၣ်ဘၣ်န့ၣ်လီၤ]. သဝီဖိသ့ၣ်တဖၣ်တဲမုာ်ထီၣ်က့ၤအသးန့ၣ်လီၤ.

မ့ၣ်ပိၢ်လၢဒြိတ့ၢ်လီၤခံဖျၢၣ်တဖျၢၣ်အံၤလီၤတဲာ်ပိၢ်ဖးထီၣ်ဖဲတဃ့ၣ်ထူၣ်အဖီခိၣ်န့ၣ်လီၤ. မ့ၣ်ပိၢ်က့မၤဘၣ်ဒိဘၣ်ထံးစ့ၢ်ကီးတၢ်ဖံး အီၣ်မၤအီၣ်အလီၢ်ဒီးဘၣ်ဒိဟးဂီၤဝဲသဝီဖိဟံၣ် (၆) ဖျၢၣ်န့ၣ်လီၤ. အါတက့ၢ်ဟံၣ်ခိၣ်ဒုးသ့ၣ်တဖၣ်ဘၣ် ဒိဟးဂီၤဝဲန့ၣ်လီၤ. ဟံၣ်ဃုဖျၢၣ်အံၤအကစၢ်မ့ၢ်ဝဲ စီၤဘ--- သးနံၣ် (၆၂) နံၣ်, အူဆ--- သးနံၣ် (၅၃) နံၣ်, စီၤဒ--- သးနံၣ် (၄၁) နံၣ်, အူဃ--- သးနံၣ် (၅၈) နံၣ်, အူလ--- သးနံၣ် (၅၁) နံၣ်ဒီးဂ--- သးနံၣ် (၄၉) နံၣ်သ့ၣ်တဖၣ်န့ၣ်လီၤ.

ဖဲတၢ်သံကွၢ်အဆၢကတီၢ်, ပှၤလၢအကဲတ့ၢ်ကရူၢ်နဲၣ်ရွဲၣ်တဂၤလၢအမံၤမ့ၢ်စီၤဟ---တဂၤစံးဝဲလၢအဝဲနာ်ဝဲလၢဒြိဟဲတ့ၢ်လီၤ တၢ်အံၤကမ့ၢ်ဝဲအီၤခၠါတၤသုးကလၢၤလၢအအိၣ်ဖဲယ့ၤသၤဖြူၣ်တၢ်လီၢ် (ဝ့ၢ်ထူကရူၢ်) န့ၣ်လီၤ. အဝဲတဲအါထီၣ်ကဒီးတၢ်ဂ့ၢ်တၢ် ကျိၤလၢ, ဖဲလါဖ့ၤဘြူၤအါရံၤ ၁၃ သီ, ၂၀၂၆ နံၣ်အနံၤ, ကမျၢၢ်တၢ်ဒီသဒၢသုး (PDF) မၤဝဲသုးကၠံၣ်လီၤတၢ်မၤလိအမူးသး ဖှံဖဲတၢ်လီၤတတီၤလၢအအိၣ်ယံၤဒီးသဝီထဲဒၣ် (၁.၅) မံးလာ်ဧိၤန့ၣ်လီၤ. လၢတၢ်န့ၣ်အဃိအဝဲဆိမိၣ်တယာ်ဝဲလၢဒြိဟဲပညိၣ် ဝဲဒၣ်တၢ်လီၢ်ဖဲ PDF မၤသုးကၠံၣ်လီၤကၠိအမူးသးဖှံအလီၢ် [တမ့ၢ်သဝီပူၤဘၣ်], ဘၣ်ဆၣ်ဟဲတ့ၢ်လီၤကမၣ်ဘၣ်ဝဲ လၢသဝီပူၤန့ၣ် လီၤ.

ဖဲလါမးရှး ၂၈ သီ, ၂၀၂၆ နံၣ်အနံၤ, မုၢ်ထူၣ် ၁၂း ၃၀ နၣ်ရံၣ်အဆၢကတီၢ်, SAC ကဘီယူၤဒုးသုးတဘ့ၣ်ဟဲတ့ၢ်လီၤဝဲမ့ၣ်ပိၢ် (၂၅၀ ပီၣ်) ခံဖျၢၣ်ဖဲအဒ---သဝီ (တၢ်သ့ၣ်ညါစ့ၢ်ကီးလၢအဃ---သဝီ), ဝ့ၢ်ထူကရူၢ်ဒီးဘၣ်ဒိဝဲဖိသၣ်တဂၤန့ၣ်လီၤ. တၢ်ကဲ ထီၣ်သးဖဲနီၣ်ဧ---လဲၤဃုအီၣ်ကံကူၣ်ဒိး, နီၣ်တၢၢ်ကဆီဒိး, ဒီးလဲၤဃုအီၣ်ညၣ်ဖဲထံကျိဖိလၢအဘူးဒီးတၢ်ဘါ ယွၤသ ရိာ်န့ၣ်လီၤ. မ့ၣ်ပိၢ်ခံဖျၢၣ်လၢကဘီယူၤတ့ၢ်လီၤအံၤလီၤတဲာ်ဖဲမုၢ်ဃုနံၤတၢ်ဘါယွၤသရိၣ်လီၢ်ခံသရိာ်ကရၢၢ်ပူၤဖဲအဒ---သဝီန့ၣ်လီၤ. မ့ၣ်ပိၢ်အ ကျါတဖျၢၣ်လီၤတဲာ်[ဖဲတၢ်ပျီပူၤဒီးတပိၢ်ဖးထီၣ်ဘၣ်န့ၣ်လီၤ. KHRG တသ့ၣ်ညါထွဲလၢၤတၢ်ဂ့ၢ်ဘၣ် ဃးမ့ၣ်ပိၢ်လၢအတပိၢ်ဖးထီၣ် ဘၣ်တဖျၢၣ်အံၤကဲထီၣ်က့ၤအသးဒ်လဲၣ်ဘၣ်န့ၣ်လီၤ]. မ့ၣ်ပိၢ်ခံဖျၢၣ်တဖျၢၣ်လီၤတဲာ်ပိၢ်ဖးထီၣ်ဖဲသ့ၣ်တထူၣ်အလိၤဒီးအက့ဖျိးဝဲ သကုၤဆးဒးဖဲတၢ်လီၢ်ဝဲန့ၣ်ဒီးမဧ---ဘၣ်ဒိဝဲဖဲအဖံဘၣ်ခိၣ်အစ့ၣ်တကပၤ ဖဲအဝဲဃုအီၣ်တၢ်ဒိးဒီးညၣ်အဆၢကတီၢ်န့ၣ်လီၤ. မဧ---အံၤ PDF သုးဖိပာ်ထီၣ်အီၤလၢသိလ့ၣ်ယီၣ်အဖီခိၣ် ဒီးလဲၤဆှၢအီၤဆူအလ---တၢ်ဟ့ၣ်ကသံၣ်ဒၢးဖဲဝ့ၢ်ထူကရူၢ်, ဒိးန့ၢ်ဘၣ်ဝဲ တၢ်ကူစါယါဘျါဒီးကသံၣ်သရၣ်မုၣ်ပဲန့ၢ်အီၤကသံၣ်လၢအတၢ်ပူၤလီၢ်အပူၤန့ၣ်လီၤ. ဖဲတၢ်ထံၣ်လိာ်သံကွၢ်တၢ်ကလုၢ်အ ပူၤ ပာ်ဖျါထီၣ်ဝဲလၢ, အဝဲနာ်ဝဲလၢတၢ်ဟ့ၣ်ကသံၣ်ဒၢးတဖျၢၣ်အံၤဘၣ်တၢ်တီခိၣ်ရိၣ်မဲအီၤလၢ KDHW [ကညီဆူၣ်ချ့မၤစၢၤ ဝဲၤကျိၤ] န့ၣ်လီၤ. အဝဲတဘၣ်ဟ့ၣ်တၢ်လၢာ်ဘူၣ်လၢာ်စ့ၤလၢတၢ်ကူစါသးအဂီၢ်ဘၣ်န့ၣ်လီၤ. ဘၣ်ဆၣ်တၢ်ဟ့ၣ်ကူၣ်အီၤလၢကမၤဘူၣ်ဒီး ဟ့ၣ်ဝဲလၢတၢ်သးအိၣ်ဖီခိၣ်န့ၣ်လီၤ.