ပသးခုလၢ ပထုးထီၣ်ဘၣ်ကဒီးလံာ်တၢ်ကစီၣ်ပှဲၤထီၣ်ဝဲ ၂၄ ဝီတဝီန့ၣ်လီၤ. လံာ်တၢ်ကစီၣ်အံၤ ဘၣ်တၢ်ကွဲးအီၤတနံၣ်ခံဘျီ န့ၣ်လီၤ. လံာ်တၢ်ကစီၣ်လၢ အဘၣ်တၢ်ကွဲးအီၤခဲအံၤတဘ့ၣ်အံၤ ဘၣ်တၢ်ဟံးန့ၢ် တၢ်ဂ့ၢ်တၢ်ကျိၤ စးထီၣ်ဖဲလါစဲးပထ့ဘၢၣ် ၂၀၂၄ နံၣ် တုၤ လါဖ့ၤဘြူၤအါရံၤ ၂ဝ၂၅ နံၣ် အပူၤန့ၣ်လီၤ. ဘၣ်ဆၣ်နကထံၣ်ဘၣ်တၢ်ဂ့ၢ်တၢ်ကျိၤ, တၢ်ကဲထီၣ်သးလၢအပူၤကွံာ်တနီၤ လၢဘၣ်တၢ်ကွဲးပာ်ဖျါအီၤအိၣ်ဝဲ မ့ၢ်လၢတၢ်ဂ့ၢ်တၢ်ကျိၤသ့ၣ်တဖၣ်အံၤ ဘၣ်တၢ်ဒိးန့ၢ်ဘၣ်အီၤလၢ ဃုလါအတီၢ်ပူၤအဆၢကတီၢ်ပူၤအဃိန့ၣ်လီၤ.
KHRG ပှၤဟီၣ်ခိၣ်ဖိခွဲးယာ်အလံာ်တၢ်ကစီၣ်တဘ့ၣ်အံၤ မ့ၢ်ဝဲဒၣ်တၢ်ကွဲးပာ်ဖှိၣ်တၢ်ကစီၣ်လၢအအိၣ်ဟဲလၢကညီကီၢ်ရ့ၣ်နွံဘ့ၣ်အပူၤဒီး လၢတၢ်ကွဲးတဖၣ်အကျါ တၢ်မၤဘၣ်ဒိပှၤဟီၣ်ခိၣ်ဖိခွဲးယာ်တခါစုာ်စုာ် အတၢ်ဂ့ၢ်ကီသ့ၣ်တဖၣ် လၢကီၢ်ရ့ၣ်ကိးဘ့ၣ်ဒဲးအပူၤ အိၣ်ဝဲဒၣ်ဒီး အတၢ်လီၤပလိာ်လိာ်အသး ဒီးတၢ်လီၤဆီလိာ်သး အိၣ်ဝဲအါမးအဂ့ၢ်န့ၣ် မ့ၢ်တၢ်လၢပကြၢးသ့ၣ်ညါဘၣ်စ့ၢ်ကီးန့ၣ်လီၤ.
လံာ်တၢ်ပာ်ဖျါတဘ့ၣ်အံၤအပူၤ ပာ်ဖျါထီၣ်ဝဲ SAC သုး တၢ်ဒုးကဲထီၣ်လိၣ်ထီၣ်ဖးထီၣ်ထံကီၢ်တၢ်နုာ်လီၤကဲသုးသဲစးတၢ်ဘျၢ, ကီၢ်ပယီၤသုးကဘီယူၤခးလီၤတၢ်, တၢ်ထုးကွံာ် ကီၢ်ပယီၤဒီကလုာ်ပှၤဟီၣ်ခိၣ်ဖိခွဲးယာ်ကမံးတံာ် (MNHRC), တၢ်ခးလီၤကျိဖးဒိၣ်, တၢ်မၤတရီတပါသွံၣ်ထံးမုၣ်ခွါ, သုးအတၢ်ဟူးတၢ်ဂဲၤ, တၢ်ကူၣ်ဘၣ်ကူၣ်သ့ဒီးတၢ်အိၣ်ဆူၣ်အိၣ်ချ့တၢ်အိၣ်သး, ကျိချံမျိာ်သၣ်လီၢ်လံၤလၢအတပိၢ်ဖးထီၣ်ဒံးဘၣ်ဒီးဟီၣ်လာ်မ့ၣ်ပိၢ် တၢ်ကဲထီၣ်သးသ့ၣ်တဖၣ် အဂ့ၢ်န့ၣ်လီၤ.
လၢခံကတၢၢ် ပနာ်လၢပှၤဖးလံာ်ဖိသ့ၣ်တဖၣ် ကသ့ၣ်ညါအါထီၣ်ဘၣ်တၢ်မၤဘၣ်ဒိပှၤဟီၣ်ခိၣ်ဖိခွဲးယာ် အတၢ်အိၣ်သးလၢ ကီၢ်ပယီၤမုၢ်ထီၣ်ကလံၤထံးအပူၤဒီး ပနာ်စ့ၢ်ကီးလၢပှၤဖးလံာ်ဖိသ့ၣ်တဖၣ် ကပလၢၢ်ဘၣ်ဝဲ သဝီဖိလၢအအိၣ်လၢကီၢ်ရ့ၣ်တဘ့ၣ်စုာ်စုာ်အပူၤအတၢ်တူၢ်ဘၣ်သ့ၣ်တဖၣ်န့ၣ်လီၤ.